Mahabharata · Chapter 12.260

hṛdi kāmadrumaścitro mohasañcayasambhavaḥ /
krodhamānamahāskandho vivitsāpariveṣaṇaḥ //

tasya cājñānamādhāraḥ pramādaḥ pariṣecanam /
so'bhyasūyāpalāśo hi purā duṣkṛtasāravān //

sammohacintāviṭapaḥ śokaśākho bhayāṅkuraḥ /
mohanībhiḥ pipāsābhirlatābhiranuveṣṭitaḥ //

upāsate mahāvṛkṣaṃ sulubdhāstatphalepsavaḥ /
āyataiḥ saṃyutāḥ pāśaiḥ phaladaṃ pariveṣṭya tam //

yastānpāśānvaśe kṛtvā taṃ vṛkṣamapakarṣati /
gataḥ sa duḥkhayorantaṃ jarāmaraṇayordvayoḥ //

saṃrohatyakṛtaprajñaḥ sasatvo hanti pādapam /
sa tamevāhato hanti viṣaṃ grastamivāturam //

tasyānugatamūlasya mūlamudbhiyate balāt /
yogaprasādātkṛtinā sāmyena paramāsinā //

evaṃ yo veda kāmasya kevalaṃ parisarpaṇam /
etacca kāmaśāstrasya suduḥkhānyativartate //

śarīraṃ puramityāhuḥ svāminī buddhiriṣyate /
tatra buddheḥ śarīrasthaṃ mano nāmārthacintakam //

indriyāṇi janāḥ paurāstadarthaṃ tu parā kṛtiḥ / tatra dvau dāruṇau doṣau tamo nāma rajastathā /
tadarthamupajīvanti paurāḥ saha pureśvaraiḥ //

advāreṇa tamevārthaṃ dvau doṣāvupajīvataḥ /
tatra buddhirhi durdharṣā manaḥ sādharmyamucyate //

paurāścāpi manastṛptāsteṣāmapi calā sthitiḥ /
yadarthaṃ buddhiradhyāste so'narthaḥ pariṣīdati //

pauramantraviyuktāyāḥ so'rthaḥ saṃsīdati kramāt /
yadarthaṃ pṛthagadhyāste manastatpariṣīdati //

pṛthagbhūtaṃ mano buddhyā mano bhavati kevalam /
tatrainaṃ vikṛtaṃ śūnyaṃ rajaḥ paryavatiṣṭhate //

tanmanaḥ kurute sakhyaṃ rajasā saha sangatam /
taṃ cādāya janaṃ pauraṃ rajase samprayacchati //