Mahabharata · Chapter 12.262

ya ime pṛthivīpālāḥ śerate pṛthivītale /
pṛtanāmadhya ete hi gatasattvā mahābalāḥ //

ekaikaśo bhīmabalā nāgāyutabalāstathā /
ete hi nihatāḥ saṅkhye tulyatejībalairnaraiḥ //

naiṣāṃ paśyāmi hantāraṃ prāṇināṃ saṃyuge purā /
vikrameṇopasampannāstejobalasamanvitāḥ //

atha ceme mahāprājñāḥ śerate hi gatāsavaḥ /
mṛtā iti ca śabdo'yaṃ vartatyeṣu gatāsuṣu //

ime mṛtā nṛpatayaḥ prāyaśo bhīmavikramāḥ /
tatra me saṃśayo jātaḥ kutaḥ sañjñā mṛtā iti //

kasya mṛtyuḥ kuto mṛtyuḥ kena mṛtyuriha prajāḥ /
haratyamarasankāśa tanme brūhi pitāmaha //
bhīṣma uvāca /

purā kṛtayuge tāta rājā hyāsīdakampanaḥ /
sa śatruvaśamāpannaḥ sangrāme kṣīṇavāhanaḥ //

tasya putro harirnāma nārāyaṇasamo bale /
sa śatrubhirhataḥ saṅkhye sabalaḥ sapadānugaḥ //

sa rājā śatruvaśagaḥ putraśokasamanvitaḥ /
yadṛcchayā śāntiparo dadarśa bhuvi nāradam //

tasmai sa sarvamācaṣṭa yathāvṛttaṃ janeśvaraḥ /
śatrubhirgrahaṇaṃ saṅkhye putrasya maraṇaṃ tathā //

tasya tadvacanaṃ śrutvā nārado'tha tapodhanaḥ /
ākhyānamidamācaṣṭa putraśokāpahaṃ tadā //
nārada uvāca /

rājañśṛṇu mahākhyānaṃ mamedaṃ bahuvistaram /
yathāvṛttaṃ śrutaṃ caiva mayā'pi vasudhādhipa //

prajāḥ sṛṣṭvā mahātejāḥ prajāsarge pitāmahaḥ /
atīva vṛddhā bahulā nāmṛṣyata punaḥ prajāḥ //

na hyantaramabhūtkiñcitkvacijjantubhiracyuta /
nirucchvāsamivonnaddhaṃ trailokyamabhavannṛpa //

tasya cintā samutpannā saṃhāraṃ prati bhūpate /
cintayannādhyagacchacca saṃhāre hetukāraṇam //

tasya ropānmahārāja khebhyo'gnirudatiṣṭhata /
tena sarvā diśo rājandadāha sa pitāmahaḥ //

tato divaṃ bhuvaṃ khaṃ ca jagacca sacarācaram /
dadāha pāvako rājanbhagavatkopasambhavaḥ //

tatrādahyanta bhūtāni jaṅgamāni dhruvāṇi ca /
mahatā krodhavegena kupite prapitāmahe //

tato haro jaṭī sthāṇurdevo'dhvarapatiḥ śivaḥ /
jagāma śaraṇaṃ devo brahmāṇaṃ parameṣṭhinam //

tasminnabhigate sthāṇau prajānāṃ hitakāmyayā /
abravīdvarado devo jvalanniva tadā śivam //

karavāṇyadya kaṃ kāmaṃ vnarārho'si mato mama /
kartā hyasi priyaṃ śambho tava yaddhṛdi vartate //