Mahabharata · Chapter 12.259

śarīrādvipramuktaṃ hi sūkṣmabhūtaṃ śarīriṇam /
karmabhiḥ paripaśyanti śāstroktaiḥ śāstracetasaḥ //

yathā marīcyaḥ sahitāścaranti gacchanti tiṣṭhanti ca dṛśyamānāḥ /
dehairvimuktāni varanti lokāṃ stathaiva satvānyatimānuṣāṇi //

pratirūpaṃ yathaivāpsu tāvatsūryasya lakṣyate /
satvavāṃstu tathā satvaṃ pratirūpaṃ sa paśyati //

tāni sūkṣmāṇi satvāni vimuktāni śarīrataḥ /
tena tatvena tatvajñāḥ paśyanti niyatendriyāḥ //

svapatāṃ jāgratāṃ caiṣa sarveṣāmātmacintitam /
pradhānādvaidhayuktānāṃ dahyate karmajaṃ rajaḥ //

yathā'hani tathā rātrau yathā rātrau tathā'hani /
vaśe tiṣṭhati satvātmā satataṃ yogayoginām //

teṣāṃ nityaṃ sadā nityo bhūtātmā satataṃ guṇaiḥ /
saptabhistvanvitaḥ sūkṣmaiścariṣṇurajarāmaraḥ //

manovuddhiparābhūtaḥ svadehaparadehavit /
svapneṣvapi bhavatyeṣa vijñātā sukhaduḥkhayoḥ //

tatrāpi labhate duḥkhaṃ tatrāpi labhate sukham /
kāmaṃ krodhaṃ ca tatrāpi kṛtvā vyasanamṛcchati //

prīṇitaścāpi bhavati mahato'rthānavāpya hi /
karoti puṇyaṃ tatrāpi jāgranniva ca paśyati //

sadoṣmāntargataścāpi garbhatvaṃ samupeyivān /
daśa māsānvasankukṣau naiṣo'nnamiva jīryate //

tametamatitejoṃśaṃ bhūtātmānaṃ hṛdi sthitam /
tamorajobhyāmāviṣṭā nānupaśyanti mūrtiṣu //

yogaśāstraparā bhūtvā svamātmānaṃ parīpsavaḥ / tamorajobhyāṃ nirmuktāstaṃ prapaśyanti mūrtiṣu /
anucchvāsānyamūrtāni yāni vajropamānyapi //

pṛthagbhūteṣu sṛṣṭeṣu caturṣvāśramakarmasu /
samādhau yogamevaitacchāṇḍilyaḥ samamabravīt //

viditvā saptasūkṣmāṇi ṣaḍaṅgaṃ ca maheśvaram /
pradhānaviniyogajñaḥ paraṃ brahmānupaśyati //