Mahabharata · Chapter 12.255

sṛjate triguṇānsatvaṃ kṣetrajñastvadhitiṣṭhati /
guṇānvikriyate sarvānudāsīnavadīśvaraḥ //

svabhāvayuktaṃ tatsatvaṃ yadimānsṛjate guṇān /
ūrṇanābhiryathā sūtraṃ sṛjate tantuvadguṇān //

pradhvastā na nivartante pravṛttirnopalabhyate /
evameke vyavasyanti nivṛttiriti cāpare //

ubhayaṃ sampradhāryaitadadhyavasyedyathāmati /
anenaiva vidhānena bhavedgarbhaśayo mahān //

anādinidhanaṃ nityaṃ taṃ buddhvā vicarennaraḥ /
akrudhyannaprahṛṣyaṃśca nityaṃ vigatamatsaraḥ //

ityevaṃ hṛdayagranthiṃ buddhicintāmayaṃ dṛḍham /
atītya sukhamāsīta aśocaṃśchinnasaṃśayaḥ //

tāmyeyuḥ pracyutāḥ pṛthvyāṃ yathā pūrṇāṃ nadīṃ narāḥ /
avagāḍhā hyavidvāṃso viddhi lokamimaṃ tathā //

na tu tāmyati vai vidvānsthale carati tattvavit /
evaṃ yo vindate'tmānaṃ kevalaṃ jñānamātmanaḥ //

evaṃ buddhvā naraḥ sarvaṃ bhūtānāmāgatiṃ gatim /
samavekṣya ca vaiṣamyaṃ labhate śamamuttamam //

etadvai janmasāmarthyaṃ brāhmaṇasya viśeṣataḥ /
ātmajñānaṃ śamaścaiva paryāptaṃ tatparāyaṇam //

etadbuddhvā bhavedbuddhaḥ kimanyadbuddhalakṣaṇam /
vijñāyaitadvimucyante kṛtakṛtyā manīṣiṇaḥ //

na bhavati viduṣāṃ mahadbhayaṃ yadaviduṣāṃ sumahadbhayaṃ paratra /
na hi gatiradhikā'sti kasyaci dbhavati hi yā viduṣaḥ sanātanī //

lokamāturamasūyate jana stattadeva ca nirīkṣya śocate /
tatra paśya kuśalānaśocato ye vidustadubhayaṃ kṛtākṛtam //

yatkarotyanabhisandhipūrvakaṃ tacca nirṇudati ---
na priyaṃ tadubhayaṃ na cāpriya tasya tajjanayatīha kurvataḥ //