Mahabharata · Chapter 12.253

adhyātmaṃ vistareṇeha punareva vadasva me /
yadadhyātmaṃ yathā veda bhagavannṛṣisattama //
vyāsa uvāca /

adhyātmaṃ yadidaṃ tāta puruṣasyeha vidyate /
tatte'haṃ vartayiṣyāmi tasya vyākhyāmimāṃ śṛṇu //

bhūmirāpastathā jyotirvāyurākāśa eva ca /
mahābhūtāni bhūtānāṃ sāgarasyormayo yathā //

prasāryeha yathā'ṅgāni kūrmaḥ saṃharate punaḥ /
tadvanmahānti bhūtāni yavīyaḥsu vikurvate //

iti tanmayamevedaṃ sarvaṃ sthāvarajaṅgamam /
sarge ca pralaye caiva tasminnirdiśyate tathā //

mahābhūtāni pañcaiva sarvabhūteṣu bhūtakṛt /
akarottāta vaiṣamyaṃ yasminyadanupaśyati //
śuka uvāca /

akarodyaccharīreṣu kathaṃ tadupalakṣayet /
indriyāṇi guṇāḥ kecitkathaṃ tānupalakṣayet //
vyāsa uvāca /

etatte vartayiṣyāmi yathāvadanupūrvakaḥ /
śṛṇu tattvamihaikāgro yathā tattvaṃ yathā ca tat //

śabdaḥ śrotraṃ tathā khāni trayamākāśasambhavam /
prāṇaśreṣṭā tathā sparśa ete vāyuguṇāstrayaḥ //

rūpaṃ cakṣurvipākaśca tridhā jyotirvidhīyate /
raso'tha rasanaṃ sneho guṇāstvete trayo'mbhasaḥ //

ghreyaṃ ghrāṇaṃ śarīraṃ ca bhūmerete guṇāstrayaḥ /
śrotraṃ tvakcakṣuṣī jihvā nāsikā caiva pañcamī //

etāvānindriyagrāmo vyākhyātaḥ pāñcabhautikaḥ / vāyoḥ sparśo raso'dbhyaśca jyotiṣo rupamucyate /
ākāśaprabhavaḥ śabdo gandho bhūmiguṇaḥ smṛtaḥ //

mano buddhiḥ svabhāvaśca traya ete manomayāḥ /
na guṇānativartante guṇebhyaḥ paramāgatāḥ //

yathā kūrma ihāṅgāni prasārya viniyacchati /
evamevendriyagrāmaṃ buddhiḥ sṛṣṭvā niyacchati //

yadūrdhvaṃ pādatalayoravāṅbhūrdhnaśca paśyati /
etasminneva kṛtye tu vartate buddhiruttamā //

guṇānnenīyate buddhirbuddhirevendriyāṇyapi /
manaḥ ṣaṣṭhāni sarvāṇi buddhya bhāve kṛto guṇāḥ //

indriyāṇi nare pañca ṣaṣṭhaṃ tu mana ucyate /
saptamīṃ buddhimevāhuḥ kṣetrajñaṃ punaraṣṭamam //

cakṣurālocanāyaiva saṃśayaṃ kurute manaḥ /
buddhiradhyavasānāya sākṣī kṣetrajña ucyate //

rajastamaśca satvaṃ ca traya ete svayonijāḥ /
samāḥ sarveṣu bhūteṣu tānguṇānupalakṣayet //

tatra yatprītisaṃyuktaṃ kiñcidātmani lakṣayet /
praśāntamiva saṃśuddhaṃ satvaṃ tadupadhārayet //

yattu santāpasaṃyuktaṃ kāye manasi vā bhavet /
pravṛttaṃ raja ityevaṃ tatra cāpyupalakṣayet //

yattu sammohasaṃyuktamavyaktaviṣayaṃ bhavet /
apratarkyamavijñeyaṃ tamastadupadhāryatām //

praharṣaḥ prītirānandaḥ sāmyaṃ svasthātmacittatā /
akasmādyadi vā kasmādvartante sātvikā guṇāḥ //

abhimāno mṛṣāvādo lobho mohastathā'kṣamā /
liṅgāni rajasastāni vartante hetvahetutaḥ //

tathā mohaḥ pramādaśca nidrā tandrā prabodhitā /
kathañcidabhivartante vijñeyāstāmasā guṇāḥ //