Mahabharata · Chapter 12.252
prakṛtestu vikārā ye kṣetrajñastairadhiṣṭhitaḥ /
na cainaṃ te prajānanti sa tu jānāti tānapi //
taiścaivaṃ kurute kāryaṃ manaḥṣaṣṭhairihendriyaiḥ /
sudāntairiva saṃyantā dṛḍhaiḥ paramavājibhiḥ //
indriyebhyaḥ pare hyarthā arthebhyaḥ paramaṃ manaḥ /
manasastu parā buddhirbuddherātmā mahānparaḥ //
mahataḥ paramavyaktamavyaktātpuruṣaḥ paraḥ /
puruṣānna paraṃ kiñcitsā kāṣṭhā sā parā gatiḥ //
evaṃ sarveṣu bhūteṣu gūḍhotmā na prakāśate /
dṛśyate tvagryayā buddhyā sūkṣmayā sūkṣmadarśibhiḥ //
antarātmani saṃlīya manaḥ ṣaṣṭhāni medhayā /
indriyāṇīndriyārthāṃśca bahucintyamacintayan //
dhyānoparamaṇaṃ kṛtvā vidyāsampāditaṃ manaḥ /
aniścaraḥ praśāntātmā tatorcchatyamṛtaṃ padam //
indriyāṇāṃ tu sarveṣāṃ paśyātmā calitasmṛtiḥ /
ātmanaḥ sampradānena martyo mṛtyumupāśnute //
hitvā tu sarvasankalpānsatve cittaṃ niveśayet /
satve cittaṃ samāveśya tataḥ kālañjaro bhavet //
cittaprasādena yatirjahātīha śubhāśubham /
prasannātmātmani sthitvā sukhamatyantamaśnute //
lakṣaṇaṃ tu prasādasya yathā tṛptaḥ sukhaṃ svapet /
nivāte vā yathā dīpo dīpyamāno na kampate //
evaṃ pūrvāpare rātrau yuñjannātmānamātmani /
laghvāhāro viśuddhātmā paśyatyātmānamātmani //
rahasyaṃ sarvavedānāmanaitihyamanāgatam /
ātmapratyayikaṃ śāstramidaṃ putrānuśāsanam //
dharmākhyāneṣu sarveṣu citrākhyāneṣu yadvasu /
dṛśyate ṛksahasrāṇi nirmathyāmṛtamuddhṛtam //
navanītaṃ yathā dadhnaḥ kāṣṭhādagniryathaiva ca /
tathaiva viduṣāṃ jñānaṃ putrahetoḥ samuddhṛtam //
snātakānāmidaṃ śāstraṃ vācyaṃ putrānuśāsanam /
taditaṃ nāpraśāntāya nādāntāyātapasvine //
nāvedaviduṣe vācyaṃ tathā nānugatāya ca /
nāsūyakāyānṛjave na cānirdiṣṭakāriṇe //
na tarkaśāstradagdhāya tathaiva piśunāya ca /
ślāghine ślāghanīyāya praśāntāya tapasvine //
idaṃ priyāya putrāya śiṣyāyānugatāya ca /
rahasyadharmaṃ vaktavyaṃ nānyasmai tu kathañcana //
yadyapyasya mahīṃ dadyādratnapūrṇāmimāṃ naraḥ /
idameva tataḥ śreya iti manyeta tattvavit //
ato guhyatarārthaṃ tadadhyātmamatimānuṣam /
yattanmaharṣibhirjuṣṭaṃ vedānteṣu ca gīyate //
tatte'haṃ sampravakṣyāmi yanmāṃ tvaṃ paripṛcchasi //
yacca te manasi vartate paraṃ yatra cāsti tava saṃśayaḥ kvacit /
śrūyatāmayamahaṃ tavāgrataḥ putra kiṃ hi kathayāmi te punaḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0