Mahabharata · Chapter 12.247

yadidaṃ vedavacanaṃ kuru karma tyajeti ca /
kāṃ diśaṃ vidyayā yānti kāṃ ca gacchanti karmaṇā //

etadvai śrotumicchāmi tadbhavānprabravītu me /
etaccānyonyavairūpye vartete pratikūlataḥ //
bhīṣma uvāca /

ityuktaḥ pratyuvācedaṃ parāśarasutaḥ sutam /
karmavidyāmayāvetau vyākhyāsyāmi kṣarākṣarau //

yāṃ diśaṃ vidyayā yānti yāṃ ca gacchanti karmaṇā /
śṛṇuṣvaikamanā vatsa gahvaraṃ hyetadantaram //

asti dharma iti hyuktvā nāstītyatraiva yo vadet /
tasya pakṣasya sadṛśamidaṃ mama bhavedatha //

dvāvimāvatha panthānau yatra vedāḥ pratiṣṭhitāḥ /
pravṛttilakṣaṇo dharmo nivṛttau ca vyavasthitaḥ //

karmaṇā badhyate janturvidyayā tu pramucyate /
tasmātkarma na kurvanti yatayaḥ pāradarśinaḥ //

karmaṇā jāyate pretya mūrtimānṣoḍaśātmakaḥ /
vidyayā jāyate nityamavyayo hyakṣarātmakaḥ //

karma tveke praśaṃsanti svalpabuddhitayā narāḥ /
tena te dehajālāni ramayanta upāsate //

ye sma buddhiṃ parāṃ prāptā dhamairnapuṇyadarśinaḥ /
na te karma praśaṃsanti kūpaṃ nadyāṃ pibanniva //

karmaṇaḥ phalamāpnoti sukhaduḥkhe bhavābhavau /
vidyayā tadavāpnoti yatra gatvā na śocati //

yatra gatvā na mriyate yatra gatvā na jāyate /
na jīryate yatra gatvā yatra gatvā na vardhate //

yatra tadbrahma paramamavyaktamacalaṃ dhravam /
avyāhatamanāyāsamamṛtaṃ cāviyogi ca //

dvandvairna yatra bādhyante mānasena ca karmaṇā /
samāḥ sarvatra maitrāśca sarvabhūtahite ratāḥ //

vidyāmayo'nyaḥ puruṣastāta karmamayo'paraḥ / viddhi candramasaṃ darśe sūkṣmayā kalayā sthitam /
vidyāmayaṃ taṃ puruṣaṃ nityaṃ jñānaguṇātmakam //

tadetadṛṣiṇā proktaṃ vistareṇānumīyate /
navaṃ tu śaśinaṃ dṛṣṭvā vakratantumivāmbare //

ekādaśavikārātmā kalāsambhārasambhṛtaḥ /
mṛrtimāniti taṃ viddhi tāta karma guṇātmakam //

tasminyaḥ saṃsthito hyagnirnityaṃsthālyāmivāhitaḥ /
ātmānaṃ taṃ vijānīhi nityaṃ tyāgajitātmakaṃ //

devo yaḥ saṃśritastasminnabvinduriva puṣkare /
kṣetrajñaṃ taṃ vijānīyānnityaṃ yogajitātmakam //

tamorajaśca sattvaṃ ca viddhi jīvaguṇātmakam /
jīvamātmaguṇaṃ vidyādātmānaṃ pa-----naḥ //

acetanaṃ jīvaguṇaṃ vadanti sa ceṣṭate ceṣṭayate ca sarvam
tataḥ paraṃ kṣetravido vadanti prākalpayadyo bhuvanāni sapta //