Mahabharata · Chapter 12.244

eṣā pūrvatarā vṛttirbrāhmaṇasya vidhīyate /
jñānavāneva karmāṇi kurvansarvatra siddhyati //

tatra cenna bhavedevaṃ saṃśayaḥ karmaniścaye /
kintu karmasvabhāvo'yaṃ jñānaṃ karmeti vā punaḥ //

tatra vedavivitsāyāṃ jñānaṃ cetpuruṣaṃ prati /
upapattyupalabdhibhyāṃ varṇayiṣyāmi tacchṝṇu //

pauruṣaṃ kāraṇaṃ kecidāhuḥ karmasu mānavāḥ /
daivameke praśaṃsanti svabhāvamapare janāḥ //

pauruṣaṃ karma daivaṃ ca phalavṛttisvabhāvataḥ /
trayametatpṛthagbhūtamavivekaṃ tu kecana //

etadevaṃ ca naivaṃ na ca cobhe nānubhe tathā /
karmasthā viṣayaṃ brūyuḥ satvasthāḥ samadarśinaḥ //

tretāyāṃ dvāpare caiva kalijāśca sasaṃśayāḥ /
tapasvinaḥ praśāntāśca satvasthāśca kṛte yuge //

apṛthagdarśanāḥ sarve ṛksāmasu yajuḥṣu ca /
kāmadvaṣau pṛthagdṛṣṭvā tapaḥ kṛta upāsate //

tapodharmeṇa saṃyuktastaponityaḥ susaṃśitaḥ /
tena sarvānavāpnoti kāmānyānmanasecchati //

tapasā tadavāpnoti yadbhūtaṃ sṛjate jagat /
tadbhūtaśca tataḥ sarvabhūtānāṃ bhavati prabhuḥ //

taduktaṃ vedavādeṣu gahanaṃ vedadarśibhiḥ /
vedānteṣu punarvyaktaṃ kramayogena lakṣyate //

ārambhayajñāḥ kṣavrāśca haviryajñā viśaḥ smṛtāḥ /
paricārayajñāḥ śūdrāśca japayajñā dvijātayaḥ //

pariniṣṭhitakāryo hi svādhyāyena dvijo bhavet /
kuryādanyanna vā kuryānmaitro brāhmaṇa ucyate //

tretādau sakalā vedā yajñā varṇāśramāstathā /
saṃrodhādāyuṣastvete vyasyante dvāpare yuge //

dvāpare viplavaṃ yānti vedāḥ kaliyuge tathā /
dṛśyante nāpi dṛśyante kalerante punaḥ kila //

utsīdanti svadharmāśca tatrādharmeṇa pīḍitāḥ /
gavāṃ bhūmeśca ye cāpāmoṣadhīnāṃ ca ye rasāḥ //

adharmāntarhitā vedā vedadharmāstathā'śramāḥ /
vikriyante svadharmāśca sthāvarāṇi carāṇi ca //

yathā sarvāṇi bhūtāni vṛṣṭathā tṛpyanti prāvṛṣi /
sṛjante sarvato'ṅgāni tathā vedā yugeyuge //

vihitaṃ kālanānātvamanādinidhanaṃ ca yat /
kīrtitaṃ yatpurastātte yataḥ saṃyānti ca prajāḥ //

yaccedaṃ prabhavaḥ sthānaṃ bhūtānāṃ saṃyamo yamaḥ /
svabhāvenaiva vartante dvandvasṛṣṭāni bhūriśaḥ //

sargaḥ kālo dhṛtirvedāḥ kartā kāryaṃ kriyāphalam /
etatte kathitaṃ tāta yanmāṃ tvaṃ paripṛcchasi //