Mahabharata · Chapter 12.241

trayīṃ vidyāmavekṣeta vedepūttamatāṃ gataḥ /
ṛksāmavarṇākṣarato yajuṣo'tharvaṇastathā //

[tiṣṭhatyeteṣu bhagavānṣaṭ्su karmasu saṃsthitaḥ.] vedavādeṣu kuśalā hyadhyātmakuśalāśca ye //

satvavanto mahābhāgāḥ paśyanti prabhavāpyayau /
evaṃ dharmeṇa varteta kriyāḥ śiṣṭavadācaret //

asaṃrodhena bhūtānāṃ vṛttiṃ lipseta vai dvijaḥ /
sadbhya āgatavijñānaḥ śiṣṭaḥ śāstravicakṣaṇaḥ //

svadharmeṇa kriyā loke kurvāṇaḥ so'pyasaṅkaraḥ /
tiṣṭhate teṣu gṛhavānṣaṭ्su karmasu sa dvijaḥ //

pañcabhiḥ satataṃ yajñaiḥ śraddadhāno yajeta ca / dhṛtimānapramattaśca dānto dharmavidātmavān /
vītaharṣamadakrodho brāhmaṇo nāvasīdati //

dānamadhyayanaṃ yajñastapo hrīrārjavaṃ damaḥ /
etairvivardhate tejaḥ pāpmānaṃ cāpakarṣati //

dhūtapāpmā ca medhāvī laghvāhāro jitendriyaḥ /
kāmakrodhau vaśe kṛtvā ninīṣedbrahmaṇaḥ padam //

agnīṃśca brāhmaṇāṃścārceddevatāḥ praṇameta ca /
varjayeduśatīṃ vācaṃ hiṃsāṃ cādharmasaṃhitām //

eṣā pūrvatarā vṛttirbrāhmaṇasya vidhīyate /
jñānāgamena karmāṇi kurvankarmasu siddhyati //

pañcendriyajalāṃ ghorāṃ lobhakūlāṃ sudustarām /
manyupaṅkāmanādhṛṣyāṃ nadīṃ tarati buddhimān //

kālamabhyudyataṃ paśyennityamatyantamohanam //

mahatā vidhidṛṣṭena balinā'pratighātinā /
svabhāvasrotasā vṛttamuhyate satataṃ jagat //

kālodakena mahatā varṣāvartena santatam /
māsormiṇartuvegena pakṣolapatṛṇena ca //

nirmaṣonmeṣaphenena ahorātrajavena ca /
kāmagrāheṇa ghoreṇa vedayajñaplavena ca //

dharmadvīpena bhūtānāṃ cārthakāmaraveṇa ca /
ṛtavāṅbhokṣatīreṇa vihiṃsātaruvāhinā //

yugahradaughamadhyena brahmaprāyabhavena ca /
dhātrā sṛṣṭāni bhūtāni kṛṣyante yamasādanam //

etatprajñāmayairdhīrā nistaranti manīṣiṇaḥ /
plavairaplavavanto hi kiṃ kariṣyantyacetasaḥ //

upapannaṃ hi yatprājño nistarennetaro janaḥ /
dūrato guṇadoṣau hi prājñaḥ sarvatra paśyati //

saṃśayāttu sa kāmātmā calacitto'lpacetanaḥ /
aprājño na taratyenaṃ yo hyāste na sa gacchati //

aplavo hi mahādoṣaṃ muhyamāno na gacchati /
kāmagrāhagṛhītasya jñānamapyasya na plavaḥ //

tasmādunmajjanasyārthe prayateta vicakṣaṇaḥ /
etadunmajjanaṃ tasya yadayaṃ brāhmaṇo bhavet //

tryavadāte kule jātastrisandehastrikarmakṛt /
tasmādunmajjanaṃ tiṣṭhetprajñayā nistaredyathā //

saṃskṛtasya hi dāntasya niyatasya yatātmanaḥ /
prājñasyānantarā siddhiriha loke paratra ca //

varteta teṣu gṛhavānakrudhyannanasūyakaḥ /
pañcabhiḥ satataṃ yajñairvighasāśī yajeta ca //

satāṃ dharmeṇa varteta kriyāṃ śiṣṭavadācaret /
asaṃrodhena lokasya vṛttiṃ lipsedagarhitām //

śrutavijñānatattvajñaḥ śiṣṭācāravicakṣaṇaḥ /
svadharmeṇa kriyāvāṃśca karmaṇā so'pyasankaraḥ //

kriyāvāñśraddadhāno kahi dāntaḥ prāyo'nasūyakaḥ /
dhamārdharmaviśeṣajñaḥ sarvaṃ tarati dustaram //

dhṛtimānapramattaśca dānto dharmavidātmavān /
vītaharṣamadakrodho brāhmaṇo nāvasīdati //

eṣā purātanī vṛttirbrāhmaṇasya vidhīyate /
jñānavṛddhyaiva karmāṇi kurvansarvatra sidhyati //

adharmaṃ dharmakāmo hi karoti hyavicakṣaṇaḥ /
dharmaṃ vā dharmasankāśaṃ śocanniva karoti saḥ //

dharmaṃ karomīti karotyadharma madharmakāmaśca karoti dharmam /
ubhe bālaḥ karmaṇī na prajānam sañjāyate mriyate cāpi dehī //