Mahabharata · Chapter 12.242

atha cedrocayedetaduhyate manasā tathā /
unmajjaṃśca nimajjaṃśca jñānavānplavavānbhavet //

prajñayā nirmitairdhīrāstārayantyabudhānplavaiḥ /
nābudhāstārayantyanyānātmānaṃ vā kathañcana //

chinnadoṣo muniryogayukto yuñjīta dvādaśa /
daśakarmasukhānarthānupāyāpāyaniṣkriyaḥ //

cakṣurācārasangrāhairmanasā darśanena ca /
yacchedvāṅbhanasī buddhyā ya icchejjñānamuttamam //

jñānena yacchedātmānaṃ ya icchecchāntimātmanaḥ /
eteṣāṃ cedanudraṣṭā puruṣo'pi sudāruṇaḥ //

yadi vā sarvavedajño yadi vā'pyanṛco dvijaḥ /
yadi vā dhārmiko yajvā yadi vā pāpakṛttamaḥ //

yadi vā puruṣavyāghro yadi vaiklavyadhāraṇaḥ /
taratyevaṃ mahādurgaṃ jarāmaraṇasāgaram //

evaṃ hyetena yogena yuñjāno hyevamantataḥ /
api jijñāsamāno'pi śabdabrahmā'tivartate //

dharmopastho hrīvarūtha upāyāpāyakūvaraḥ /
apānākṣaḥ prāṇayugaḥ prajñāyurjīvavandhanaḥ //

cetanābandhuraścāruścācāragrahanemimān /
darśanasparśanavaho ghrāṇaśravaṇavāhanaḥ //

prajñānābhiḥ sarvatantrapratodo jñānasārathiḥ /
kṣetrajñādhiṣṭhito dhīraḥ śraddhādamapuraḥ saraḥ //

tyāgaraśmyanugaḥ kṣemyaḥ śaucago dhyānagotaraḥ /
jīvayukto ratho divyo brahmaloke dhirājate //

atha santvaramāṇasya rathamevaṃ yuyukṣataḥ /
akṣaraṃ gantumanaso vidhiṃ vakṣyāmi śīghragam //

sapta yo dhāraṇāḥ kṛtsnā vāgyataḥ pratipadyate /
pṛṣṭhataḥ pārśvataścānyāstāvatyastāḥ pradhāraṇāḥ //

kramaśaḥ pārthivaṃ yacca vāyavyaṃ khaṃ tathā payaḥ / jyotiṣo yattadaiśvaryamahankārasya buddhitaḥ /
avyaktasya tathaiśvaryaṃ kramaśaḥ pratipadyate //

vikramāścāpi yasyaite tathā yuṅkte sa yogataḥ /
tathā'sya yogayuktasya siddhimātmani paśyataḥ //

nirmucyamānaḥ sūkṣmatvādrūpāṇīmāni paśyataḥ /
śaiśirastu yathā dhūmaḥ sūkṣmaḥ saṃśrayate nabhaḥ //

tathā dehādvimuktasya pūrvarūpaṃ bhavatyuta /
atha dhūmasya virameddvitīyaṃ rūpadarśanam //

jalarūpamivākāśe tatraivātmani paśyati /
apāṃ vyatikrame cāsya vahnirūpaṃ prakāśate //

tasminnuparate cāsya vāyavyaṃ sūkṣmamavyayam /
rūpaṃ prakāśate tasya pītavastravadavyayam //

tasminnuparate rupamākāśasya prakāśate / tasminnuparate cāsya buddhirūpaṃ prakāśate /
ūrṇārūpasavarṇasya tasya rūpaṃ prakāśate //

atha śvetāṃ gatiṃ gatvā sohaṅkāre prakāśate /
suśuklaṃ cetasaḥ saukṣmyamapyuktaṃ brāhmaṇasya vai //

eteṣvapi hi jāteṣu phalajātāni me śṛṇu /
jātasya pārthivaiśvaryaiḥ sṛṣṭiriṣṭā vidhīyate //

prajāpatirivākṣobhyaḥ śarīrātsṛjate prajāḥ /
aṅgulyaṅguṣṭhamātreṇa hastapādena vā tathā //

pṛthivīṃ kampayatyeko guṇo vāyoriti śrutiḥ / ākāśabhūtaścākāśe savarṇatvātprakāśate /
varṇato gṛhyate cāpsu nāpaḥ pibati cāśayā //

na cāsya tejasāṃ rūpaṃ dṛśyate śāmyate tathā /
ahankāre'sya vijite pañcaite syurvaśānugāḥ //

ṣaṇṇāmātmani buddhau ca jitāyāṃ prabhavatyatha /
nirdoṣā pratibhā hyenaṃ kṛtsnā samabhivartate //

tathaiva vyaktamātmānamavyaktaṃ pratipadyate /
yato niḥsarate loko bhavati vyaktasañjñakaḥ //

tatrāvyaktamayīṃ vidyāṃ śṛṇu tvaṃ vistareṇa me /
tathā vyaktamayaṃ caiva saṃkhyāpūrvaṃ nibodha me //

pañcaviṃsatitattvāni tulyānyubhayataḥ samam /
yoge sāṅkhye'pi ca tathā viśeṣaṃ tatra me śṛṇu //

proktaṃ tadvyaktamityeva jāyate vardhate ca yat /
jīryate mriyate caiva caturbhirlakṣaṇairyutam //

viparītamato yattu tadavyaktamudāhṛtam /
dvāvātmānau ca vedeṣu siddhānteṣvapyudāhṛtau //

caturlakṣaṇajaṃ tvādyaṃ caturvargaṃ pracakṣate /
vyaktamavyaktajaṃ caiva tathā buddhirathetarat //
satvaṃ kṣetrajña ityetaddvayamavyaktadarśanam //

dvāvātmānau ca vedeṣu viṣayeṣvanurajyataḥ /
viṣayātpratisaṃhāraḥ sāṅkhyānāṃ viddhi lakṣaṇam //

nirmamaścānahankāro nirdvandvaśchinnasaṃśayaḥ /
naiva krudhyati na dveṣṭi nānṛtā bhāṣate giraḥ //

ākruṣṭastāḍitaścaiva maitrīyaṃ dhyāti nāśubham /
vāgdaṇḍakarmamanasāṃ trayāṇāṃ ca nivartakaḥ //

samaḥ sarveṣu bhūteṣu brahmāṇamabhivartate /
naivecchati na cāniccho yātrāmātravyavasthitaḥ //

alolupo'vyatho dānto nākṛtirna nirākṛtiḥ /
nāsyendriyamanekāgraṃ nāvikṣiptamanorathaḥ //

sarvabhūtasadṛṅbhaitraḥ samaloṣṭāśmakāñcanaḥ /
tulyapriyāpriyo dhīrastulyanindātmasaṃstutiḥ //

aspṛhaḥ sarvakāmebhyo brahmacaryadṛḍhavrataḥ /
ahiṃsraḥ sarvabhūtānāmīdṛksāṅkhyo vimucyate //

yathā yogādvimucyante kāraṇairyairnibodha tat /
yogaiśvaryamatikrānto yo'tikrāmati mucyate //

ityeṣā bhāvajā buddhiḥ kathitā te na saṃśayaḥ /
evaṃ bhavati nirdvandvo brahmāṇaṃ cādhigacchati //