Mahabharata · Chapter 12.225
kiṃ kurvansukhamāpnoti kiṃ kurvanduḥkhamāpnuyāt /
kiṃ kurvannirbhayo loke siddhaścarati bhārata //
bhīṣma uvāca /
damameva praśaṃsanti vṛddhāḥ śrutisamādhayaḥ /
sarveṣāmeva varṇānāṃ brāhmaṇasya viśeṣataḥ //
nādāntasya kriyāsiddhiryathāvadupapadyate /
kriyā tapaśca devāśca dame sarvaṃ pratiṣṭhitam //
damastejo vardhayati pavitraṃ dama ucyate /
vipāṣmā nirbhayo dāntaḥ puruṣo vindate mahat //
sukhaṃ dāntaḥ prasvapiti sukhaṃ ca pratibudhyate /
sukhaṃ loke viparyeti manaścāsya prasīdati //
tejo damana dhriyate tatra tīkṣṇo'dhigacchati /
amitrāṃśca bahūnnityaṃ pṛthagātmani paśyati //
kravyādbhya iva bhūtānāmadāntebhyaḥ sadā bhayam /
teṣāṃ vipratiṣedhārthaṃ rājā sṛṣṭaḥ svayambhuvā //
āśrameṣu ca sarveṣu dama eva viśiṣyate / 12-225-8bdharmaḥ saṃrakṣyate taistu yataste dharmasetavaḥ /
yacca teṣu phalaṃ dharmyaṃ bhūyo dānte taducyate //
teṣāṃ liṅgāni vakṣyāni yeṣāṃ samudayo damaḥ /
akārpaṇyamasaṃrambhaḥ santoṣaḥ śraddadhānatā //
akrodha ārjavaṃ nityaṃ nātivādo'bhimānitā /
gurupūjā'nasūyā ca dayā bhūteṣvapaiśunam //
janavādamṛṣāvādastutinindāvivarjanam /
sādhukāmāṃśca spṛhayennāyatiṃ pratyayeṣu ca //
avairakṛtsūpacāraḥ samo nindāpraśaṃsayoḥ /
suvṛttaḥ śīlasampannaḥ prasannātmā'tmavāñśuciḥ //
prāpya loke ca satkāraṃ svargaṃ vai pretya gacchati /
durgamaṃ sarvabhūtānāṃ prāpayanmodate sukhī //
sarvabhūtahite yukto na sma yo dviṣate janam /
mahāhrada ivākṣobhyaḥ prājñastṛptaḥ prasīdati //
abhayaṃ yasya bhūtebhyaḥ sarveṣāmabhayaṃ yataḥ /
namasyaḥ sarvabhūtānāṃ dānto bhavati buddhimān //
na hṛṣyati mahatyarthe vyasane ca na śocati /
sadā'parimitaprajñaḥ sa dānto dvija ucyate //
karmabhiḥ śrutasampannaḥ sadbhirācāretaḥ śuciḥ /
sadaiva damasaṃyuktastasya bhuṅkte mahāphalam //
anasūyā'kṣamā śāntiḥ santoṣaḥ priyavāditā /
satyaṃ dānamanāyāso naiṣa mārgo durātmanām //
kāmakrodhau ca lobhaśca parasyerṣyā vikatthanā / atuṣṭiranṛtaṃ moha eṣa mārgo durātmanām //
kāmakrodhau vaśe kṛtvā brahmacārī jitendriyaḥ / vikramya ghore tamasi brāhmaṇaḥ saṃśitavrataḥ /
kālākāṅkṣī carellokānnirapāya ivātmavān //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0