Mahabharata · Chapter 12.226

dvijātayo vratopetā yadidaṃ bhuñjate haviḥ /
annaṃ brāhmaṇakāmāya kathametatpitāmaha //
bhīṣma uvāca /

avedoktavratopetā bhuñjānāḥ kāryakāriṇaḥ /
vedokteṣu ca bhuñjānā vratalubdhā yudhiṣṭhira //
yudhiṣṭhira uvāca /

yadidaṃ tapa ityāhurupavāsaṃ pṛthagjanāḥ /
etattapo mahārāja utāho kiṃ tapo bhavet //
bhīṣma uvāca /

māsapakṣopavāsena manyante yattapo janāḥ /
ātmatantropadhātastu na tapastatsatāṃ matam //

tyāgaśca sannatiścaiva śiṣyate tapa uttamam /
sadopavāsī sa bhavedbrahmacārī sadā bhavet //

muniśca syātsadā vipro daivataṃ ca sadā bhavet /
kuṭumbiko dharmaparaḥ sadā'svapnaśca bhārata //

amāṃsādī sadā ca syātpavitrī ca sadā bhavet /
amṛtāśī sadā ca syānna ca syādviṣabhojanaḥ //

vidhasāśī sadā ca syātsadā caivātithipriyaḥ /
[śraddadhānaḥ sadā ca syāddevatādvijapūjakaḥ] //
yudhiṣṭhira uvāca /

kathaṃ sadopavāsī syādbrahmacārī kathaṃ bhavet /
vighasāśī kathaṃ ca syātsadā caivātithiprayiḥ //
bhīṣma uvāca /

antarā prātarāśaṃ ca sāyamāśaṃ tathaiva ca /
sadopavāsī sa bhavedyo na bhuṅkte'ntarā punaḥ //

bhāryāṃ gacchanbrahmacārī ṛtau bhavati brāhmaṇaḥ /
ṛtavādī bhavennityaṃ jñānanityaśca yo naraḥ //

na bhakṣayedvṛthā māṃsamamāṃsāśī bhavatyapi /
dānanityaḥ pavitrīsyādasvapnaśca divā'svapan //

bhṛtyātithiṣu yo bhuṅkte bhuktavatsu sadā naraḥ /
amṛtaṃ kevalaṃ bhuṅkte iti viddhi yudhiṣṭhira //

abhuktavatsu bhuñjāno viṣamaśnāti vai dvijaḥ / adattvā yo'tithibhyo'nnaṃ na bhuṅkte sotithipriyaḥ /
abhuktvā daivatebhyaśca yo na bhuṅkte sadaivatam

devatābhyaḥ pitṛbhyaśca bhṛtyebhyo'tithibhiḥ saha /
avaśiṣṭaṃ tu yo'śnāti tamāhurvighasāśinam //

teṣāṃ lokā hyaparyantāḥ sadane brahmaṇā saha /
upasthitāścāpsarobhiḥ pariyānti divaukasaḥ //

devatābhiśca ye sārdhaṃ pitṛbhyaścopabhuñjate /
ramante putrapautraiśca teṣāṃ gatiranuttamā //