Mahabharata · Chapter 12.222

janako naradevastu jñāpitaḥ paramarṣiṇā /
punarevānupapraccha sāmparāye bhavābhavau //
janaka uvāca /

bhagavanyadi na pretya sañjñā bhavati kasyacit /
evaṃ sati kimajñānaṃ jñānaṃ vā kiṃ kariṣyati //

sarvamucchedaniṣṭhaṃ syātpaśya caitaddvijottama /
apramattaḥ pramatto vā kiṃ viśeṣaṃ kariṣyati //

asaṃsargo hi bhūteṣu saṃsargo vā vināśiṣu /
kasmai kriyeta tatvena niścayaḥ ko'tra tattvataḥ //
bhīṣma uvāca /

tamasā hi praticchannaṃ vibhrāntamiva cāturam /
punaḥ praśamayanvākyaiḥ kaviḥ pañcaśikho'bravīt //

ucchedaniṣṭhā nehāsti bhā niṣṭhā na vidyate / ayaṃ hyapi samāhāraḥ śarīrendriyacetasām /
vartate pṛthaganyonyamapyapāśritya karmasu //

dhāvataḥ pañca teṣāṃ tu khaṃ vāyurjyotirambu bhūḥ /
te svabhāvena tiṣṭhanti viyujyante svabhāvataḥ //

ākāśo vāyurūṣmā ca sneho yaścāpi pārthivaḥ /
eṣa pañcasamāhāraḥ śarīramapi naikadhā //

ahaṃ vācyaṃ dvijānāṃ yadviśiṣṭaṃ buddhirūpavat /
vācāmagocaraṃ nityaṃ jñeyamevaṃ bhaviṣyati //

jñānaṃ jñeyaṃ tathā jñānaṃ trividhaṃ jñānamucyate / jñānamūṣmā ca vāyuśca trividhaḥ karmasangrahaḥ //

indriyāṇīndriyārthāśca svabhāvaścetanā manaḥ /
prāṇāpānau vikāraśca dhātavaścātra niḥsṛtāḥ //

prāṇādayastathā sparśā na sambādhagatāstathā /
putrādhīnaṃ bhaviṣyeta cinmātraḥ sa paraḥ pumān //

śravaṇaṃ sparśanaṃ jihvā dṛṣṭirnāsā tathaiva ca /
indriyāṇīti pañcaite cittapūrvagamā guṇāḥ //

tatra vijñānasaṃyuktā trividhā cetanā dhruvā /
sukhaduḥkheti yāmāhuraduḥkhetyasukheti ca //

śabdaḥ sparśaśca rūpaṃ ca raso gandhaśca mūrtayaḥ /
ete hyāmaraṇātpañca ṣaṅguṇā jñānasiddhaye //

teṣu karmavisargaśca sarvatatvārthaniścayaḥ /
tamāhuḥ paramaṃ śukraṃ pāre ca rajasaḥ prabhum //

virāgādvartate tasminmato rajasi nityagam /
tasminprasanne sampaśye dvuddhirityavyayaṃ mahat //

imaṃ guṇasamāhāramātmabhāvena paśyataḥ /
asamyadgarśino duḥkhamanantaṃ nopaśāmyati //

tasmādeteṣu medhāvī na prasajyeta buddhimān / anātmeti ca yaddṛṣṭaṃ tannāhaṃ na mametyapi /
vartate kimadhiṣṭhānā prasaktā duḥkhasantatiḥ //

yatra samyaṅbhano nāma tyāgamātramanuttamam /
śṛṇu yattava mokṣāya bhāṣyamāṇaṃ bhaviṣyati //

tyāga eva hi sarveṣāṃ yuktānāmapi karmaṇām /
nityaduḥkhavinītānāṃ śleṣo duḥkhavaho hataḥ //

dravyatyāge tu karmāṇi bhogatyāge vratānyapi /
sukhatyāge tapoyogaṃ sarvatyāge samāpanā //

tasya mārgo'yamadvaidhaḥ sarvatyāgasya darśitaḥ /
viprahāṇāya duḥkhasya durgatistvanyathā bhavet //

śete jarāmṛtyubhayairvimuktaḥ kṣīṇe puṇye vigate ca pāpe /
taponimitte vigate ca niṣṭhe phale yathā'kāśamaliṅga eva //

pañcajñānendriyāṇyuktvā manaḥṣaṣṭhāni cetasi /
manaḥṣaṣṭhāni vakṣyāmi pañcakarmendriyāṇi tu //

hastau karmendriyaṃ jñeyamatha pādau gatīndriyam /
prajanānandayoḥ śepho nisarge pāyurindriyam //

vākca śabdaviśeṣārthaṃ gatiṃ pañcānvitāṃ viduḥ /
evamekādaśaitāni buddhyā tūpahataṃ manaḥ //

karṇau śabdaśca cittaṃ ca trayaḥ śravaṇasangrahe /
tathā sparśe tathā rūpe tathaiva rasagandhayoḥ //

evaṃ pañcatrikā hyete guṇāstadupalabdhaye /
yenāyaṃ trividho bhāvaḥ paryāyātsamumpasthitaḥ //

sātviko rājasaścāpi tāmasaścāpi te trayaḥ /
trividhā vedanā yeṣu prasūtāḥ sarvasādhanāḥ //

praharṣaḥ prītirānandaḥ sukhaṃ saṃśāntacittatā /
akutaścitkutaścidvā cintitaḥ sātviko guṇaḥ //

atuṣṭiḥ paritāpaśca śoko lobhastathā'kṣamā /
liṅgāni rajasastāni dṛśyante hetvahetutaḥ //

avivekastathā mohaḥ pramādaḥ svapnatandritā /
kathañcidapi vartante vividhāstāmasā guṇāḥ //

tatra yatprītisaṃyuktaṃ kāye manasi vā bhavet /
vartate sātviko bhāva ityapekṣeta tattathā //

yattu santāpasaṃyuktamaprītikaramātmanaḥ /
pravṛttaṃ raja ityevaṃ tatastadapi cintayet //

atha yanmohasaṃyuktaṃ kāye manasi vā bhavet /
apratarkyamavijñeyaṃ tamastadupadhārayet //

śrotraṃ vyomāśritaṃ bhūtaṃ śabdaḥ śrotraṃ samāśritaḥ /
nobhayaṃ śabdavijñāne vijñānastetarasya vā //

evaṃ tvakcakṣuṣī jihvā nāsikā ceti pañcamī /
sparśe rūpe rase gandhe tāni ceto manaśca tat //

svakarmayugapadbhāvo daśasveteṣu tiṣṭhati /
cittamekādaśaṃ viddhi buddhirdvādaśamī bhavet //

teṣāmayugapadbhāva ucchedo nāsti tāmasaḥ /
āsthito yugapadbhāve vyavahāraḥ sa laukikaḥ //

indriyāṇyupasṛtyāpi dṛṣṭvā pūrvaṃ śrutāgamāt /
cintayannanuparyeti tribhirevānvito guṇaiḥ //

yattamopahataṃ cittamāśusañcāramadhruvam /
karotyuparamaṃ kāye tadāhustāmasaṃ sukham //

yadyadāgamasaṃyuktaṃ na kṛcchrādupaśāmyati /
atha tatrāpyupādatte tamo vyaktamivānṛtam //

evameva prasaṅkhyātaḥ svakarmapratyayo guṇaḥ /
kathañcidvartate samyakkeṣāñcidvā nivartate //

ahamityeṣa vai bhāvo nānyatra pratitiṣṭhati /
yasya bhāvo dṛḍho nityaṃ sa vai vidvāṃstathetaraḥ //

dehadharmastathā nityaṃ sarvabhūteṣu vai dṛḍhaḥ /
etenaivānumānena tyājyo dharmastathā hyasau //

jñānena mucyate janturdharmātmā jñānavānbhavet /
dharmeṇa dhāryate lokaḥ sarvaṃ dharme pratiṣṭhitam //

sarvārthajanakaścaiva dharmaḥ sarvasya kāraṇam /
sarvo hi dṛśyate loke na sarvārthaḥ kathañcana //

sarvatyāge kṛte tasmātparamātmā prasīdati / vyaktādavyaktamatulaṃ lokeṣu parivartate //

etadāhuḥ samāhāraṃ kṣetramadhyātmacintakāḥ /
sthito manasi yo bhāvaḥ sa vai kṣetrajña ucyate //

evaṃ sati ka ucchedaḥ śāśvato vā kathaṃ bhavet /
svabhāvādvartamāneṣu sarvabhūteṣu hetuṣu //

yathārṇavagatā nadyo vyaktīrjahati nāma ca /
natu svatāṃ niyacchanti tādṛśaḥ satvasankṣayaḥ //

evaṃ sati kutaḥ sañjñā pretyabhāve punarbhavet /
pratisammiśrite jīve gṛhyamāṇe ca sarvataḥ //

imāṃ ca yo veda vimokṣabuddhi mātmānamanvicchati cāpramattaḥ /
na lipyate karmaphalairaniṣṭaiḥ patraṃ bisasyeva jalena siktam //

dṛḍhairhi pāśairbahubhirvimuktaḥ prajānimittairapi daivataiśca /
yadā hyasau sukhaduḥkhe jahāti muktastadāgryāṃ gatimetyaliṅgaḥ //

śrutipramāṇāgamamaṅgalaiśca śete jarāmṛtyubhayādabhītaḥ /
kṣīṇe ca puṇye vigate ca pāpe tato nimitte ca phale vinaṣṭe / alepamākāśamaliṅgameva māsthāya paśyanti mahatyasaktāḥ //

yathorṇanābhiḥ parivartamāna stantukṣaye tiṣṭhati pātyamānaḥ /
tathā vimuktaḥ prajahāti duḥkhaṃ bidhvaṃsate loṣṭha ivādrimṛcchan //

yathā ruruḥ śṛṅgamatho purāṇaṃ hitvā tvacaṃ vā'pyurago yathā ca /
vihāya gacchatyanavekṣamāṇa stathā vimukto vijahāti duḥkham //

drumaṃ yathāvā'pyudakai patanta mutsṛjya pakṣī nipatatyasaktaḥ /
tathā hyasau sukhaduḥkhe vihāya muktaḥ parāddharyāṃ gatimetyaliṅgaḥ //

imānsvalokānanupaśya sarvā nvrajanyathā'kāśamivāpnukāmaḥ /
imāṃ hi gāthāṃ pralapanyathā'sti samastasaṅkalpaviśeṣamuktaḥ / ahaṃ hi sarvaṃ kila sarvabhāve hyahaṃ tadantarhyahameva bhoktā //

apica bhavati maithilena gītaṃ nagaramupāhitamagninā'bhivīkṣya /
na khalu mama tuṣo'pi dahyate'tra svayamidamāha kila sma bhūmipālaḥ //
bhīṣma uvāca /

idamamṛtapadaṃ videharājā svayamiha pañcaśikhena bhāṣyamāṇam /
nikhilamabhisamīkṣya niścitārthaḥ paramasukhī vijahāra vītaśokaḥ //

imaṃ hi yaḥ paṭhati vimokṣaniścayaṃ mahīpate satatamavekṣate tathā /
upadravānnānubhavatyaduḥkhitaḥ pramucyate kapilamivaitya maithilaḥ //