Mahabharata · Chapter 12.223

kiṃ kāraṇaṃ mahāprājña dahyamānaśca maithilaḥ /
mithilāṃ neha dharmātmā prāha vīkṣya vidāhitām //
bhīṣma uvāca /

śrṛyatāṃ nṛpaśārdūla yadarthaṃ dīpitā purā /
vahninā dīpitā sā tu tanme śṛṇu mahāmate //

janako janadevastu karmāṇyādhyāya cātmani /
sarvabhāvamanuprāpya bhāvena vicacāra saḥ //

yajandadaṃstathā juhvanpālayanpṛthivīmimām /
adhyātmavinmahāprājñastanmayatvena niṣṭhitaḥ //

sa tasya hṛdi sankalpaṃ jñātumaicchatsvayaṃ prabhuḥ /
sarvalokādhipastatra dvijarūpeṇa saṃyutaḥ //

mithilāyāṃ mahābuddhirvyalīkaṃ kiñcidācaran /
sa gṛhītvā dvijaśreṣṭhairnṛpāya prativeditaḥ //

aparādhaṃ samuddiśya taṃ rājā pratyabhāṣata /
na tvāṃ brāhmaṇa daṇḍena niyokṣyāmi kathañcana //

mama rājyādvinirgaccha yāvatsīmā bhuvo mama /
tacchrutvā brāhmaṇo gatvā rājānaṃ pratyuvāca ha //

kariṣye vacanaṃ rājanbravīhi mama jānataḥ /
kā sīmā tava bhūmestu brūhi dharmaṃ mamādya vai //

tacchrutvā maithilo rājā lajjayāvanatānanaḥ /
novāca vacanaṃ vipraṃ tatvabuddhyā samīkṣya tat //

punaḥpunaśca taṃ vipraścodayāmāsa satvaram /
brūhi rājendra gacchāmi tava rājyā dvivāsitaḥ //

tato nṛpo vicāryaivamāha brāhmaṇapuṅgavam / āvāso vā na me'styatra sarvā vā pṛthivī mama /
gaccha vā tiṣṭha vā brahmanniti me niścitā matiḥ //

ityuktaḥ sa tathā tena maithilena dvijottamaḥ /
abravīttaṃ mahātmānaṃ rājānaṃ mantribhirvṛtam //

tvamevaṃ padmanābhasya nityaṃ pakṣapadāhitaḥ /
aho siddhārtharūpo'si gamiṣye svasti te'stu vai //

ityuktvā prayayau viprastajjijñāsurdvijottamān /
adahaccāgninā tasya mithilāṃ bhagavānsvayam //

pradīpyamānāṃ mithilāṃ dṛṣṭvā rājā na kampitaḥ /
janaiḥ sa paripṛṣṭastu vākyametaduvāca ha //

anantaṃ vata me vittaṃ bhāvyaṃ me nāsti kiñcana /
mithilāyāṃ pradīptāyāṃ na me kiñcana dahyate //

tadasya bhāṣamāṇasya śrutvā śrutvā hṛdi sthitam /
punaḥ sañjīvayāmāsa mithilāṃ tāṃ dvijottamaḥ //

ātmānaṃ darśayāmāsa varaṃ cāsnai dadrau punaḥ /
dharme tiṣṭhasva sadbhāvo buddhiste'rthe narādhipa //

satye tiṣṭhasva nirviṇṇaḥ svasti te'stu vrajāmyaham / ityuktvā bhagavāṃścainaṃ tatraivāntaradhīyata /
etatte kathitaṃ rājankiṃ bhūyaḥ śrotumicchasi //