Mahabharata · Chapter 12.218

niṣkalmaṣaṃ brahmacaryamicchatācarituṃ sadā /
nidrā sarvātmanā tyājyā svapnadoṣamavekṣatā //

svapne hi rajasā dehī tamasā cābhibhūyate /
dehāntaramivāpannaścaratyapagatasmṛtiḥ //

jñānābhyāsājjāgaritā jijñāsārthamanantaram /
vijñānābhiniveśāttu sa jāgartyaniśaṃ sadā //

atrāha konvayaṃ bhāvaḥ svapne viṣayavāniva /
pralīnairindriyairdehī vartate dehavāniva //

atrocyate yathā hyetadveda yogeśvaro hariḥ /
tathaitadupapannārthaṃ varṇayanti maharṣayaḥ //

indriyāṇāṃ śramātsvapnamāhuḥ sarvagataṃ manaḥ /
tanmayānīndriyāṇyāhustāvadgacchanti tāni vai //

atrāhustritayaṃ nityamatathyamiti cecca na /
prathame vartamāno'sau tritayaṃ ceti sarvadā //

netarāvupasangamya vijānāti kathañcana /
svapnāvasthāgato hyeṣa svapna ityeva vetti ca //

tadapyasadṛśaṃ yuktyā tritayaṃ mohalakṣaṇam / yadātmatritayānmuktastadā jānātyasatkṛtaḥ //

manasastvapralīnatvāttattadāhurnidarśanam / kārye cāsaktamanasaḥ sankalpo jāgrato hyapi /
yadvanmanorathaiścaryaṃ svapne tadvanmanogatam //

saṃsārāṇāmasaṃkhyānāṃ kāmātmā tadavāpnuyāt /
manasyantarhitaṃ sarvaṃ veda sottamapūruṣaḥ //

guṇānāmapi yadyetatkarmaṇā cāpyupasthitam /
tattacchaṃsanti bhūtāni mano yadbhāvitaṃ yathā //

tatastamupasarpanti guṇā rājasatāmasāḥ /
sātvikā vā yathāyogamānantaryaphalodayam //

tataḥ paśyantyasambandhānvātapittakaphottarān /
rajastamobhavairbhāvaistadapyāhurduratyayam //

prasannairindriyairyadyatsankalpayati mānasam /
tattatsvapnepyuparate mano buddhirnirīkṣate //

vyāpakaṃ sarvabhūteṣu vartate dīpavanmanaḥ /
ātmaprabhāvāttaṃ vidyātsarvā hyātmani devatāḥ //

manasyantarhitaṃ dvāraṃ dehamāsthāya mānuṣam /
yattatsadasadavyaktaṃ svapityasminnidarśanam //

vyaktabhedamatīto'sau cinmātraṃ paridṛśyate / sarvabhūtātmabhūtasthaṃ tamadhyātmaguṇaṃ viduḥ //

lipsena manasā yaśca sankalpādaiśvaraṃ guṇam /
ātmaprasādāttaṃ vidyātsarvā hyātmani devatāḥ //

evaṃ hi tapasā yuñjyādarkavattamasaḥ param /
trailokyaprakṛtirdehī tamasonte maheśvaram //

tapo hyadhiṣṭhitaṃ devaistapoghnamasuraistamaḥ /
etaddevāsurairguptaṃ tadāhurjñānalakṣaṇam //

sattvaṃ rajastamaśceti devāsuraguṇānviduḥ /
sattvaṃ devaguṇaṃ vidyāditarāvāsurau guṇau //

sattvaṃ manastathā buddhirdevā ityabhiśambditāḥ /
taireva hi vṛtastasmājjñātvaivaṃ paramaṃ----- //

nidrāvikalpena satāṃ---- viśati lokavat /
svastho bhavati gūḍhātmā kaluṣaiḥ parivarjitaḥ //

niśādikā ye kathitā lokānāṃ kaluṣā matāḥ / tairhīnaṃ yatpuraṃ śuddhaṃ bāhyābhyantaravartinam /
sadānandamayaṃ nityaṃ bhūtvā tatparamanviyāt //

evamākhyātamatyarthaṃ brahmacaryamakalmaṣam / sarvasaṃyogahīnaṃ tadviṣṇvākhyaṃ paramaṃ padam /
acintyamadbhutaṃ loke jñānena parivartate //

brahma tatparamaṃ jñānamamṛtaṃ jyotirakṣaram /
ye vidurbhāvitātmānaste yānti paramāṃ gatim //

hetumacchakyamākhyātumetāvajjñānacakṣuṣā /
pratyāhāreṇa vā śakyamavyaktaṃ brahma veditum //