Mahabharata · Chapter 12.217

duranteṣvindriyārtheṣu saktāḥ sīdanti jantavaḥ /
ye tvasaktā mahātmānaste yānti paramāṃ gatim //

janmamṛtyujarāduḥkhairvyādhibhirmānasaklamaiḥ /
dṛṣṭvaiva santataṃ lokaṃ ghaṭenmokṣāya buddhimān //

vāṅbhanobhyāṃ śarīreṇa śuciḥ syādanahankṛtaḥ /
praśānto jñānavānbhikṣurnirapekṣaścaretsukham //

vaśā mokṣavatāṃ pāśāstāsāṃ rūpaṃ pradarśakam /
durgrahaṃ paśyamāno'pi manyate mohitastadā //

evaṃ paśyantamātmānamanudhyātaṃ hi bandhuṣu / ayathātvena jānāmi bhedarūpeṇa saṃsthitam //

athavā manasaḥ saṅgaṃ paśyedbhūtānukampayā /
tatrāpyupekṣāṃ kurvīta jñātvā karmaphalaṃ jagat //

yatkṛtaṃ syācchubhaṃ karma pāpaṃ vā yadi vā'śnute /
tasmācchubhāni karmāṇi kuryādvā buddhikarmabhiḥ //

ahiṃsā satyavacanaṃ sarvabhūteṣu cārjavam /
kṣamā caivāpramādaśca yasyaite sa sukhī bhavet //

anakṣasādhyaṃ tadbrahma nirmalaṃ jagataḥ param /
svātmaprakāśamagrāhyamahetukamacañcalam //

vivekajñānavācistho hyāśurūpeṇa saṃsthitaḥ / vaikārikātpradṛśyetai gairike madhudhāravat //

yaścainaṃ paramaṃ dharmaṃ sarvabhūtasukhāvaham /
duḥkhānniḥ saraṇaṃ veda tattvajñaḥ sa sukhī bhavet //

tasmātsamāhitaṃ buddhyā mano bhūteṣu dhārayet /
nāpathyāyenna spṛhayennābaddhaṃ cintayedasat //

athāmoghaprayatnena mano jñāne niveśayet /
suvāco'tha prayogeṇa manojñaṃ sampravartate //

vivekayitvā tadvākyaṃ dharmasūkṣmamavekṣya ca /
satyāṃ vācamahiṃsrāṃ ca vadedanapavādinīm //

kalkāpetāmaparuṣāmanṛśaṃsāmapaiśunīm /
īdṛgalpaṃ ca vaktavyamavikṣiptena cetasā //

vākyabandhena saṃrāgavihārādvyāharedyadi /
buddhyā'pyanugṛhītena manasā karma tāmasam //

rajobhūtairhi karaṇaiḥ karmaṇi pratipadyate / sa duḥkhaṃ prāpya loke'sminnarakāyopapadyate /
tasmānmanovākśarīrairācaredvairyamātmanaḥ //

prakīrṇa eva bhāro hi yadvaddhāryeta dasyubhiḥ / pratilomāṃ diśaṃ buddhvā saṃsāramabudhāstathā /
saṃsāramārgamāpannaḥ pratilomaṃ vivarjayet //

tāmeva ca yathā dasyūnhatvā gacchecchivāṃ diśam /
tathā rajastamaḥ karmāṇyutsṛjya prāpnuyācchubham //

niḥsandigdhamanīho vai muktaḥ sarvaparigrahaiḥ /
viviktacārī laghvāśī tapasvī niyatendriyaḥ //

jñānadagdhaparikleśaḥ prayogaratirātmavān /
niṣpracāreṇa manasā paraṃ tadadhigacchati //

dhṛtimānātmavānbuddhiṃ nigṛhṇīyādasaṃśayam / mano buddhyā nigṛhṇīyādviṣayānmanasā'tmanaḥ /
yojayitvā manastatra niścalaṃ paramātmani //

yogābhisandhiyuktasya brahma tatsamprakāśate /
aikāntyaṃ tadidaṃ viddhi sarvavastvantarasthitiḥ //

viśeṣahīnaṃ gṛhṇanti viśeṣāṃ kāraṇātmikām / athavā na prabhustatra paramātmani vartitum /
āgāmittattvaṃ yogātmā yogatantramupakramet //

nigṛhītendriyasyāsya kurvāṇasya mano vaśe /
devatāstāḥ prakāśante hṛṣṭā yānti tamīśvaram //

tābhiḥ saṃyuktamanaso brahma tatsamprakāśate /
śanaiścāpagate satve brahmabhūyāya kalpate //

athavā na pravarteta yogatantrairupakramet /
yogatantramayaṃ tantraṃ vṛttiḥ syāttatadācaret //

kaṇakulmāṣapiṇyākaśākayāvakasaktavaḥ /
tathā mūlaphalaṃ bhaikṣyaṃ paryāyeṇopayojayet //

āhāraniyamaṃ caiva deśe kāle ca sātvikaḥ /
tatparīkṣyānuvarteta yatpravṛttyanuvartakam //

pravṛttaṃ noparundheta śanairagnimivendhayet /
jñānaidhitaṃ tathā jñānamarkavatsamprakāśate //

jñānādhiṣṭhānamajñānaṃ trīllom̐kānadhitiṣṭhati /
vijñānānugataṃ jñānamajñānenāpakṛṣyate //

pṛthaktvātsamprayogācca nāsūyurveda śāśvatam /
sa tayorapavargajño vītarāgo vimucyate //

vayotīto jarāmṛtyū jitvā brahma sanātanam /
amṛtaṃ tadavāpnoti yattadakṣaramavyayam //