Mahabharata · Chapter 12.204

tadeva satataṃ manye na śakyamanuvarṇitum /
yathā nidarśanaṃ vastu na śakyamanubodhitum //

yathāhi sāraṃ jānāti na kathañcana saṃsthitam /
parakāyacchavistadvaddehe'yaṃ cetanastathā //

vinā kāyaṃ na sā cchāyā tāṃ vinā kāyamastyuta /
tadvadeva vinā nāsti prakṛteriha vartanam //

idaṃ vai nāsti nedamasti paraṃ vinā /
jīvātmanā tvasau chinnastveṣa caiva parātmanā //

tattaveti viduḥ kecidatathyamiti cāpare /
ubhayaṃ me mataṃ vidvanmuktihetau samāhitam //

vimuktaiśca mṛgaḥ so'pi dṛśyate saṃyatendriyaḥ /
sarveṣāṃ na hi dṛśyo hi taṭidvatsphurati hyasau //

brāhmaṇasya samādṛśyo vartate so'pi kiṃ punaḥ /
vidyate paramaḥ śuddhaḥ sākṣibhūto vibhāvasuḥ //

śrutireṣā tato nityā tasmādekaḥ paro mataḥ /
na prayojanamuddiśya ceṣṭā tasya mahātmanaḥ //

tādṛśostviti mantavyastathā satyaṃ mahātmanā / nānāsaṃsthena bhedena sadā gativibhedavat /
tasya bhedaḥ samākhyāto bhedo hyasti tathāvidhaḥ //

evaṃ vidvanvijānīhi paramātmānamavyayam /
tattadguṇaviśeṣeṇa sañjñānāmanusaṃyutam //

sarveśvaraḥ sarvamayaḥ sa ca sarvapravartakaḥ /
sarvātmakaḥ sarvaśaktiḥ sarvakāraṇakāraṇam //

sarvasādhāraṇaḥ sarvairupāsyaśca mahātmabhiḥ / vāsudeveti vikhyātastaṃ viditvā'śnute'mṛtam //

yadā te pa़ñcabhiḥ pañca yuktāni manasā saha /
atha taddrakṣyate brahma maṇau sūtramivārpitam //

tadeva ca yathā sūtraṃ suvarṇe vartate punaḥ /
muktāsvatha pravāleṣu mṛnmaye rājate tathā //

tadvadgo'śvamanuṣyeṣu tadvaddhastimṛgādiṣu /
tadvatkīṭapataṅgeṣu prasaktātmā svakarmabhiḥ //

yenayena śarīreṇa yadyatkarma karotyayam /
tenatena śarīreṇa tattatphalamupāśnute //

yathā hyekarasā bhūmiroṣadhyarthānusāriṇī /
tathā karmānugā buddhirantarātmā'nudarśinī //

jñānapūrvodbhavā lipsā lipsāpūrvābhisandhitā /
abhisandhipūrvakaṃ karma karmamūlaṃ tataḥ phalam //

phalaṃ karmatmakaṃ vidyātkarma jñeyātmakaṃ tathā /
jñeyaṃ jñānātmakaṃ vidyājjñānaṃ sadasadātmakam //

tadevamiṣyate brahma saṃkhyānādvinibhidyate / jñānānāṃ ca phalānāṃ ca jñeyānāṃ karmaṇāṃ tathā /
kṣayānte yatphalaṃ vidyājjñānaṃ jñeyapratiṣṭhitam //

mahaddhi paramaṃ bhūtaṃ yuktāḥ paśyanti yoginaḥ /
abudhāstaṃ na paśyanti hyātmasthaṃ guṇabuddhayaḥ //

pṛthivīrupato rūpamapāmiha mahattaram /
adbhyo mahattaraṃ tejastejasaḥ pavano mahān //

pavanācca mahadvyoma tasmātparataraṃ manaḥ /
manaso mahatī buddhirbuddheḥ kālo mahānsmṛtaḥ //

kālātsa bhagavānviṣṇuryasya sarvamidaṃ jagat /
nādirna madhyaṃ naivāntastasya devasya vidyate //

anāditvādamadhyatvādanantatvācca so'vyayaḥ /
atyeti sarvaduḥkhāni duḥkhaṃ hyantavaducyate //

tadbrahma paramaṃ proktaṃ taddhāma paramaṃ padam /
tadgatvā kālaviṣayādvimuktā mokṣamāśritāḥ //

guṇeṣvete prakāśante nirguṇatvāttataḥ param /
nivṛttilakṣaṇo dharmastathā'nantyāya kalpate //

ṛco yajūṃṣi sāmāni śarīrāṇi vyapāśritāḥ /
jihvāgreṣu pravartante yatnasādhyāvināśinaḥ //

na caivamiṣyate brahma śarīrāśrayasambhavam /
na yatnasādhyaṃ tadbrahma nādimadhyaṃ na cāntavan //

ṛcāmādistathā sāmnāṃ yajuṣāmādirucyate /
antaścādimatāṃ dṛṣṭo na tvādirbrahmaṇaḥ smṛtaḥ //

anāditvādanantatvāttadanantamathāvyayam /
avyayatvācca nirduḥkhaṃ dvandvābhāvastataḥ param //

adṛṣṭato'nupāyācca pratisandheśca karmaṇaḥ /
na tena martyāḥ paśyanti yena gacchānta tatpadam //

viṣayeṣu ca saṃsargācchāśvatasya ca saṃśayāt /
manasā cānyadākāṅkṣanparaṃ na pratipadyate //

guṇānyadiha paśyanti tadicchantyapare janāḥ /
paraṃ naivābhikāṅkṣanti nirguṇatvādguṇārthinaḥ //

guṇairyastvavarairyuktaḥ kathaṃ vidyādguṇānimān /
anumānāddhi gantavyaṃ guṇairavayavaiḥ param //

sūkṣmeṇa manasā vidmo vācā vaktuṃ na śaknumaḥ /
mano hi manasā grāhyaṃ darśanena ca darśanam //

jñānena nirmalīkṛtya buddhiṃ buddhyā manastathā /
manasā cendriyagrāmamakṣaraṃ pratipadyate //

buddhiprahīṇo manasā samṛddha stathā'nirāśīrguṇatāmupaiti /
paraṃ tyajantīha vilobhyamānā hutāśanaṃ vāyurivendhanastham //

guṇādāne viprayoge ca teṣāṃ manaḥ sadā viddhi parāvarābhyām /
anenaiva vidhinā sampravṛtto guṇādāne brahma śarīrameti //

avyaktātmā puruṣo'vyaktakarmā so'vyaktatvaṃ gacchati hyantakāle /
tairevāyaṃ cendriyairvardhamānai rglāyadbhirvā vartate'kāmarūpaḥ //

sarvairayaṃ cendriyaiḥ samprayukto dehaṃ prāptaḥ yañcabhūtāśrayaḥ syāt /
na sāmarthyādgacchati karmaṇeha hīnastena parameṇāvyayena //

pṛthvyā naraḥ paśyati nāntamasyā hyantaścāsyā bhavitā ceti viddhi /
paraṃ na yātīha vilobhyamāno yathā plavaṃ vāyurivārṇavastham //

divākaro guṇamupalabhya nirguṇo yathā bhavedapagataraśmimaṇḍalaḥ /
tathāṃ hyasau muniriha nirviśeṣavān sa nirguṇaṃ praviśati brahma cāvyayam //

anāgataṃ sukṛtavatāṃ parāṃ gatiṃ svayambhuvaṃ prabhavanidhānamavyayam /
sanātanaṃ yadamṛtamavyayaṃ dhruvaṃ nicāyya tatparamamṛtatvamaśnute //