Mahabharata · Chapter 12.203

duḥkhopaghāte śārīre mānase cāpyupasthite /
yasminna śakyate kartuṃ yatnastaṃ nānucintayet //

bhaiṣajyametadduḥkhasya yadetannānucintayet /
cintyamānaṃ hi cābhyeti bhūyaścāpi pravartate //

prajñayā mānasaṃ duḥkhaṃ hanyācchārīramauṣadhaiḥ /
etadvijñānasāmarthyaṃ na bālaiḥ samatāmiyāt //

anityaṃ yauvanaṃ rūpaṃ jīvitaṃ dravyasañcayaḥ /
ārogyaṃ priyasaṃvāso gṛdhyettatra na paṇḍitaḥ //

na jānapadikaṃ duḥkhamekaḥ śocitumarhati /
aśocanpratikurvīta yadi paśyedupakramam //

sukhādbahutaraṃ duḥkhaṃ jīvite nāsti saṃśayaḥ /
srigdhasya cendriyārtheṣu mohānmaraṇamapriyam //

parityajati yo duḥkhaṃ sukhaṃ vā'pyubhayaṃ naraḥ /
abhyeti brahma sotyantaṃ na te śocanti paṇḍitāḥ //

duḥkhamarthā hi yujyante pālane na ca te sukham /
duḥkhena cādhigamyante nāśameṣāṃ na cintayet //

jñānaṃ jñeyābhirnivṛttaṃ viddhi jñānaguṇaṃ manaḥ /
prajñākaraṇasaṃyuktaṃ tato buddhiḥ pravartate //

yadā karmaguṇopetā buddhirmanasi vartate /
tadā prajñāyate brahma dhyānayogasamādhinā //

seyaṃ guṇavatī buddhirguṇeṣvevābhivartate /
aparādabhiniḥ srauti gireḥ śṛṅgādivodakam //

yadā nirguṇamāpnoti dhyānaṃ manasi pūrvajam /
tadā prajñāyate brahma nikaṣaṃ nikaṣe yathā //

manastvasaṃhṛtaṃ buddhyā hīndriyārthanidarśakam /
na samarthaṃ guṇāpekṣi nirguṇasya nidarśane //

sarvāṇyetāni saṃvārya dvārāṇi manasi sthitaḥ /
manasyekāgratāṃ kṛtvā tatparaṃ pratipadyate //

yathā mahānti bhūtāni nivartante guṇakṣaye /
tathendriyāṇyupādāya buddhirmanasi vartate //

yadā manasi sā buddhirvartate'ntaracāriṇī /
vyavasāyaguṇopetā tadā sampadyate manaḥ //

guṇavadbhirguṇopetaṃ yadā dhyānagataṃ manaḥ /
tadā sarvānguṇānhitvā nirguṇaṃ pratipadyate //

avyaktasyeha vijñāne nāsti tulyaṃ nidarśanam /
yatra nāsti padanyāsaḥ kastaṃ viṣayamāpnuyāt //

tapasā cānumānena guṇairjātyā śrutena ca /
ninīṣetparamaṃ brahma viśuddhenāntarātmanā //

guṇahīno hi taṃ mārgaṃ bahiḥ samanuvartate /
guṇābhāvātprakṛtyā vā nistarkyaṃ jñeyasammitam //

nairguṇyādbrahma cāpnoti saguṇatvānnivartate /
guṇaprasāriṇī buddhirhutāśana ivendhane //

yadā pañca viyuktāni indriyāṇi svakarmabhiḥ /
tadā tatparamaṃ brahma sammuktaṃ prakṛteḥ param //

evaṃ prakṛtitaḥ sarve sambhavanti śarīriṇaḥ /
nivartante nivṛttau ca svarge naivopayānti ca //

puruṣaprakṛtirbuddhirviśeṣāścendriyāṇi ca /
ahankāro'bhimānaśca sambhūto bhūtasañjñakaḥ //

etasyādyā pravṛttistu pradhānātsampravartate /
dvitīyā mithunavyaktimaviśeṣānniyacchati //

dharmādutkṛṣyate śreyastathā dharmo'ṣyadharmataḥ /
rāgavānprakṛtiṃ hyeti virakto jñānavānbhavam //