Mahabharata · Chapter 12.201

yadindriyaistūpagataiḥ purastā tprāptānguṇānsaṃsmarate cirāya /
teṣvindriyeṣūpahateṣu paścā tsa buddhirūpaḥ paramaḥ svabhāvaḥ //

ya indriyārthānyugapatsamantā nnāvekṣate kṛtsnaśastulyakālam /
yathākramaṃ sañcarate sa vidvāṃ stasmātsa ekaḥ paramaḥ śarīrī //

rajastamaḥ satvamatho tṛtīyaṃ gacchatyasau jñānaguṇānvirūpān /
na tairnibaddhaḥ sa tu badhnāti viśvaṃ na cānuyātīhāguṇānparātmā / tathendriyāṇyāviśate śarīrī hutāśanaṃ vāyurivendhanastham //

na cakṣuṣā paśyati rūpamātmano na paśyati sparśanamindriyendriyam /
na śrotraliṅgaṃ śravaṇena darśanaṃ tathā kṛtaṃ paśyati tadvinaśyati //

śrotrādīni na paśyanti svaṃsvamātmānamātmanā /
sarvajñaḥ sarvadarśī ca kṣetrajñastāni paśyati //

yathā himavataḥ pārśve pṛṣṭhaṃ candramaso yathā /
na dṛṣṭapūrvaṃ manujairna ca tannāsti tāvatā //

tadvadbhūteṣu bhūtātmā sūkṣmo jñānātmavānasau /
adṛṣṭapūrvaścakṣurmyāṃ na cāsau nāsti tāvatā //

paśyannapi yathā lakṣma janaḥ somena vindati /
evamasti na cotpannaṃ na ca tanna parāyaṇam //

rūpavantamarūpatvādudayāstamane budhāḥ /
dhiyā samanupaśyanti tadgatāḥ saviturgatim //

tathā buddhipradīpena dūrasthaṃ suvipaścitaḥ /
pratyāsannaṃ niṣīdanti jñeyaṃ jñānābhisaṃhitam //

na hi svalvanupāyena kaścidartho'bhisiddhyati /
sūtrajālairyathā matsyānbadhnanti jalajīvinaḥ //

mṛgairmṛgāṇāṃ grahaṇaṃ pakṣiṇāṃ pakṣibhiryathā /
gajānāṃ ca gajaireva jñeyaṃ jñānena gṛhyate //

ahireva hyaheḥ pādānpaśyatīti nidarśanam /
tadvanmūrtiṣu mūrtisthaṃ jñeyaṃ jñānena paśyati //

notsahante yathā vettumindriyairindriyāṇyapi /
tathaiveha parā buddhiḥ paraṃ buddhyā na paśyati //

yathā candro hyamāvāsyāmaliṅgatvānna dṛśyate /
na ca nāśo'sya bhavati tathā viddhi śarīriṇam //

kṣīṇakośo hyamāvāsyāṃ candramā na prakāśate /
tadvanmūrtivimukto'sau śarīrī nopalabhyate //

yathā kośāntaraṃ prāpya candramā bhrājate punaḥ /
tadvalliṅgāntaraṃ prāpya śarīrī bhrājate punaḥ //

janma buddhiḥ kṣayaścāsya pratyakṣeṇopalabhyate /
sā tu candramaso vyaktirna tu tasya śarīriṇaḥ //

utpattivṛddhivyayato yathā sa iti gṛhyate /
candra eva tvamāvāsyāṃ tathā bhavati mūrtimān //

nābhisarpadvimuñcadvā śaśinaṃ dṛśyate tamaḥ /
visṛjaṃścopasarpaṃśca tadvatpaśya śarīriṇam //

yathā candrārkasaṃyuktaṃ tamastadupalabhyate /
tadvaccharīrasaṃyuktaṃ jñānaṃ tadupalabhyate //

yathā candrārkanirmuktaḥ sa rāhurnopalabhyate /
tadvaccharīranirmuktaḥ śarīrī nopalabhyate //

yathā candro hyamāvāsyāṃ nakṣatrairyujyate gataḥ /
tadvaccharīranirmuktaḥ phalairyujyati karmaṇaḥ //