Mahabharata · Chapter 12.200

akṣarātkhaṃ tato vāyustato jyotistato jalam /
jalātprasūtā jagatī jagatyā jāyate jagat //

ime śarīrairjalameva gatvā jalācca tejaḥ pavanāntarikṣam /
khādvai nivartanti na bhāvinaste ye bhāvinaste paramāpnuvanti //

noṣṇaṃ na śītaṃ mṛdu nāpi tīkṣṇaṃ nāmlaṃ kaṣāyaṃ madhuraṃ na tiktam /
na śabdavannāpi ca gandhavatta nna rūpavattatparamasvabhāvam //

sparśaṃ tanurveda rasaṃ ca jihvā ghrāṇaṃ ca gandhāñśravaṇe ca śabdān /
rūpāṇi cakṣurnaca tatparaṃ ya dgṛhṇantyanadhyātmavido manuṣyāḥ //

nivartayitvā rasanāṃ rasebhyo ghrāṇaṃ ca gandhācchravaṇe ca śabdāt /
sparśāttanuṃ rūpaguṇāttu cakṣu stataḥ paraṃ paśyati tatsvabhāvam //

yato gṛhītvā hi karoti yacca yasmiṃśca yāmārabhate pravṛttim /
yasmai ca yadyena ca yaśca kartā yatkāraṇaṃ taṃ svamupeyamāhuḥ //

yadvā'pyabhūdvyāpakaṃ sādhakaṃ ca yanmantravatsthāsyati cāpi loke /
yaḥ sarvahetuḥ paramārthakārī tatkāraṇaṃ kāryamato yadanyat //

yathā hi kaścitsukṛtairmanuṣyaḥ śubhāśubhaṃ prāpnute cāvirodhāt /
evaṃ śarīreṣu śubhāśubheṣu svakarmabhirjñānamidaṃ nivaddham //

yathā pradīptaḥ purataḥ pradīpaḥ / prakāśamanyasya karoti dīpyan /
tatheha pañcendriyadīpavṛkṣā jñānapradīptāḥ paravanta eva //

yathā ca rājño bahavo hyamātyāḥ pṛthak pramāṇaṃ pravadanti yuktāḥ /
tadvaccharīreṣu bhavanti pañca jñānaikadeśāḥ paramaḥ sa tebhyaḥ //

yathārciṣo'gneḥ pavanasya vegā marīcayo'rkasya nadīṣu cāpaḥ /
gacchanti cāyānti ca saṃyatāśca tadvaccharīrāṇi śarīriṇāṃ tu //

yathā ca kaścitparaśuṃ gṛhītvā dhūmaṃ na paśyejjvalanaṃ ca kāṣṭhe /
tadvaccharīrodarapāṇipādaṃ chittvā na paśyanti tato yadanya //

tānyeva kāṣṭhāni yathā vimathya dhūmaṃ ca paśyejjvalanaṃ ca yogāt /
tadvatsubuddhiḥ samamindriyārthai rbuddhaḥ paraṃ paśyati tatsvabhāvam //

yathātmano'ṅgaṃ patitaṃ pṛthivyāṃ svapnāntare paśyati cātmano'nyat /
śrotrādiyuktaḥ sumanāḥ subuddhi rliṅgāttathā gacchati liṅgamanyat //

utpattivṛddhikṣayamasannipātai rna yujyate'sau paramaḥ śarīrī /
anena liṅgena tu liṅgamanya dgacchatyadṛṣṭaḥ pratisandhiyogāt //

na cakṣuṣā paśyati rūpamātmano na cāpi saṃsparśamupaiti kiñcit /
na cāpi taiḥ sādhayate svakāryaṃ te taṃ na paśyanti sa paśyate tān //

yathā samīpe jvalato'nalasya santāpajaṃ rūpamupaiti kaścit /
na cāntarā rūpaguṇaṃ bibharti tathaiva taddṛśyate rūpamasya //

tathā manuṣyaḥ parimucya kāya madṛśyamanyadviśate śarīram /
visṛjya bhūteṣu mahatsu dehaṃ tadāśrayaṃ caiva bibharti rūpam //

khaṃ vāyumagniṃ salilaṃ tathorvī samantato'bhyāviśate śarīrī /
nānyāśrayāḥ karmasu vartamānāḥ śrotrādayaḥ pañcaguṇāñśrayante //

śrotraṃ nabho ghrāṇamatho pṛthivyā stejomayaṃ rūpamatho vipākaḥ /
jalāśrayaṃ teja uktaṃ rasaṃ ca vāyvātmakaḥ sparśakṛto guṇaśca //

mahatsu bhūteṣu ca santi pañca pañcendriyārtheṣu tathendriyāṇi /
sarvāṇi caitāni manonugāni buddhiṃ mano'nveti matiḥ svabhāvam //

śubhāśubhaṃ karma kṛtaṃ yadasya tadeva pretyādadate'nyadehe /
mano'nuvartanti parāvarāṇi jalaukasaḥ srota ivānukūlam //

calaṃ yathā dṛṣṭipathaṃ paraiti sūkṣmaṃ mahadrūpamivāvabhāti /
tātapyamāno na patecca dhīraḥ paraṃ tathā buddhipathaṃ paraiti //