Mahabharata · Chapter 12.202

yathā vyaktamidaṃ śete svapne carati cetanam /
jñānamindriyasaṃyuktaṃ tadvatpretya bhavābhavau //

yathā'mbhasi prasanne tu rūpaṃ paśyati cakṣuṣā /
tadvatprasannendriyavāñjñeyaṃ jñānena paśyati //

sa eva lulite tasminyathā rūpaṃ na paśyati /
tathendriyākulībhāve jñeyaṃ jñāne na paśyati //

abuddhirajñānakṛtā abuddhyā dūṣyate manaḥ /
duṣṭasya manasaḥ pañca sampraduṣyanti mānasāḥ //

ajñānatṛpto viṣayeṣvavagāḍho na paśyati /
sa dṛṣṭvaiva tu pūtātmā viṣayebhyo nivartate //

tarṣacchedo na bhavati puruṣasyeha kalmaṣāt /
nivartate tadā tarṣaḥ pāpamantargataṃ yadā //

antargatena pāpena dahyamānena cetasā / śubhāśubhavikāreṇa na sa bhūyo'bhijāyate //

viṣayeṣu tu saṃsargācchāśvatasya tu saṃśrayāt /
manasā cānyathā kāḍkṣanparaṃ na pratipadyate //

jñānamutpadyate puṃsāṃ kṣayātpāpasya karmaṇaḥ /
athādarśatalaprakhye paśyatyātmānamātmani //

prasṛtairindriyairduḥkhī taireva niyataiḥ sukhī /
tasmādindriyacorebhyo yacchedātmānamātmanā //

indriyebhyo manaḥ pūrvaṃ buddhiḥ paratarā tataḥ /
buddheḥ parataraṃ jñānaṃ jñānātparataraṃ param //

avyaktātprasṛtaṃ jñānaṃ tato buddhistato manaḥ /
manaḥ śrotrādibhiryuktaṃ śabdādīnsādhu paśyati //

yastāṃstyajati śabdādīnsarvāśca vyaktayastathā / prasṛtānīndriyāṇyeva pratisaṃharati kūrmavat /
vimuñcatyākṛtigrāmāṃstānmuktvā'mṛtamaśnute //

udyanhi savitā yadvatsṛjate raśmimaṇḍalam / dṛśyate maṇḍalaṃ tasya na ca dṛśyeta maṇḍalī /
tadvaddehastu sandṛśya ātmā'dṛśyaḥ paraḥ sadā //

grastaṃ hyudgirate nityamudgīthaṃ vetti nityaśaḥ / bālye rathābhyāṃ yogena tatvajñānaṃ tu sammatam //

sa evāstamupāgacchaṃstadevātmani yacchati / ādatte sarvabhūtānāṃ rasabhūtaṃ vikāsavān //

antarātmā tathā dehamāviśyendriyaraśmibhiḥ / prāpyendri guṇānpañca so'stamāvṛttya gacchati /
raśmimaṇḍa hīnastu na cāsau nāsti tāvatā //

praṇītaṃ karmaṇā mārgaṃ nīyamānaḥ punaḥ punaḥ /
prāpnotyayaṃ karmaphalaṃ pravṛttaṃ dharmamāptavān //

viṣayā vinivartante nirāhārasya dehinaḥ /
rasavarjaṃ raso'pyasya paraṃ dṛṣṭvā nivartate //

buddhiḥ karmaguṇairhīnā yadā manasi vartate /
tadā sampadyate brahma tatraiva pralayaṃ gatam //

asparśanamaśṛṇvānamanāsvādamadarśanam /
aghrāṇamavitarkaṃ ca satvaṃ praviśate param //

avyaktātprasṛtaṃ jñānaṃ tato buddhistato manaḥ /
ātmanaḥ prasṛtā buddhiravyaktaṃ jñānamucyate //

tasmādbuddhiḥ smṛtā tajjñairmanastasmāttataḥ smṛtam /
tasmādākṛtayaḥ pañca manaḥ paramamucyate //

tasmātparatarā buddhirjñānaṃ tasmātparaṃ smṛtam / tataḥ sūkṣmastato hyātmā tasmātparataraṃ na ca /
indriyāṇi nirīkṣante manasaitāni sarvaśaḥ //

manasyākṛtayo magnā manastvabhigataṃ matim /
matistvabhigatā jñānaṃ jñānaṃ cābhigataṃ mahat //

nendriyairmanasaḥ siddhirna buddhiṃ budhyate manaḥ /
na buddhirbudhyate'vyaktaṃ sūkṣmaṃ tvetāni paśyati //