Mahabharata · Chapter 12.199

kiṃ phalaṃ jñānayogasya vedānāṃ niyamasya ca /
bhūtātmā ca kathaṃ jñeyastanme brūhi pitāmaha //
bhīṣma uvāca /

atrāpyudāharantīmamitihāsaṃ purātanam /
manoḥ prajāpatervādaṃ maharṣeśca bṛhaspateḥ //

prajāpatiṃ śreṣṭhatamaṃ prajānāṃ devarṣisaṅapravaro maharṣiḥ /
bṛhaspatiḥ praśnamimaṃ purāṇaṃ prapaccha śiṣyo'tha guruṃ praṇamya //

yatkāraṇaṃ mantravidhiḥ pravṛtto jñāne phalaṃ yatpravadanti viprāḥ /
yanmantraśabdairakṛtaprakāśaṃ taducyatāṃ me bhagavanyathāvat //

yatstotraśāstrāgamamantrividbhi ryajñairanekairatha gopradānaiḥ /
phalaṃ mahadbhiryadupāsyate ca kiṃ tatkathaṃ vā bhavitā kva vā tat //

mahī mahījāḥ pavano'ntarikṣaṃ jalaukasaścaiva jalaṃ tathā dyauḥ /
divaukasaścāpi yataḥ prasūtā staducyatāṃ me bhagavanpurāṇam //

jñānaṃ yataḥ prārthayate naro vai tatastadarthā bhavati pravṛttiḥ /
na cāpyahaṃ veda paraṃ purāṇaṃ mithyāpravṛttiṃ ca kathaṃ nu kuryām //

ṛksāmasaṅghāṃśca yajūṃṣi cāhaṃ chandāṃsi nakṣatragatiṃ niruktam /
adhītya ca vyākaraṇaṃ sakalpaṃ śikṣāṃ ca bhūtaprakṛtiṃ na vedmi //

sa me bhavāñśaṃsatu sarvameta tsāmānyaśabdaiśca viśeṣaṇaiśca /
sa me bhavāñśaṃsatu tāvadeta jjñāne phalaṃ karmaṇi vā yadasti //

yathā ca dehāccyavate śarīrī punaḥ śarīraṃ ca yathā'bhyupaiti /
manuruvāca /
yadyatpriyaṃ yasya sukhaṃ tadāhu stadeva duḥkhaṃ pravadantyaniṣṭam //

iṣṭaṃ ca me syāditaracca na syā detatkṛte karmavidhiḥ pravṛttaḥ /
iṣṭaṃ tvaniṣṭaṃ ca na māṃ bhajete tyetatkṛte jñānavidhiḥ pravṛttaḥ //

[kāmātmakāśchandasi karmayogā ebhirvimuktaḥ paramaśnuvīt /
nānāvidhe karmapathe sukhārthī naraḥ pravṛtto nirayaṃ prayāti.]
bṛhaspatiruvāca / iṣṭaṃ tvaniṣṭaṃ ca sukhāsukhe ca sāśīstapaśchandati karmabhiśca //
manuruvāca /

ebhirvimuktaḥ paramāviveśa etatkṛte karmavidhiḥ pravṛttaḥ /
[kāmātmakāṃśchandati karmayoga ebhirvimuktaḥ paramādadīta // ]

ātmādibhiḥ karmabhiridhyamāno dharme pravṛtto dyutimānsukhārthī /
paraṃ hi tatkarmaphalādapetaṃ nirāśiṣo yatpadamāpnuvanti //

prajāḥ sṛṣṭā manasā karmaṇā ca dvāvevaitau satpathau lokajuṣṭau /
dṛṣṭaṃ karmāśāśvataṃ cāntavacca manastyāge kāraṇaṃ nānyadasti //

kāmātmakau chandasi kāmabhogā vebhirviyuktaḥ paramaśnuvīta /
nānāvidhe karmaphale sukhārthī naraḥ pramatto na paraṃ prayāti / phalaṃ hi tatkarmaphalādapetaṃ nirāśiṣo brahma paraṃ hyupetam //

svenātmanā cakṣuriva praṇetā niśātyaye tamasā saṃvṛtātmā /
jñānaṃ tu vijñānaguṇena yuktaṃ karmāśubhaṃ paśyati varjanīyam //

sarpānkṛśāgrāṇi tathodapānaṃ tvā manuṣyāḥ parivarjayanti /
ajñāmatastatra patanti mūḍhā jñāne phalaṃ paśya yathā viśiṣṭam //

kṛtsnastu mantro vidhivatprayukto yajñā yathoktāstviha dakṣiṇāśca /
annapradānaṃ manasaḥ samādhiḥ pañcātmakaṃ karmaphalaṃ vadanti //

guṇātmakaṃ karma vadanti vedā stasmānmantro mannapūrvaṃ hi karma /
vidhirvidheyaṃ manasopapattiḥ phalasya bhoktā tu tathā śarīrī //

śabdāśca rūpāṇi rasāśca puṇyāḥ / sparśāśca gandhāśca śubhāstathaiva /
naro'tra hi sthānagataḥ prabhuḥ syā detatphalaṃ siddhyati karmaṇo'sya //

yadyaccharīreṇa karoti karma śarīrayuktaḥ samupāśnute tat /
śarīramevāyatanaṃ sukhasya duḥkhasya cāpyāyatanaṃ śarīram //

vācā tu yatkarma karoti kiñci dvācaiva sarvaṃ samupāśnute tat /
manastu yatkarma karoti kiñci nmanaḥstha evāyamupāśnute tat //

yathāyathā karmaguṇāṃ phalārthī karotyayaṃ karmaphale niviṣṭaḥ /
tathātathā'yaṃ guṇasamprayuktaḥ śubhāśubhaṃ karmaphalaṃ bhunasti //

matsyo yathā srota ivābhipātī tathā kṛtaṃ pūrvamupaiti karma /
śubhe tvasau tuṣyati duṣkṛte tu na tuṣyate vai paramaḥ śarīrī //

yato jagatsarvamidaṃ prasūtaṃ jñātvā'tmavanto hyupayānti śāntim /
yanmantraśabderakṛtaprakāśaṃ taducyamānaṃ śaṇu me paraṃ yat //

rasairvimuktaṃ vividhaiśca gandhai raśabdamasparśamarūpavacca /
agrāhyamavyaktamavarṇamekaṃ pañcaprakārānsasṛje prajānām //

na strī pumānnāpi napuṃsakaṃ ca na sanna cāsatsadasacca tanna /
paśyanti tadbrahmavido manuṣyā stadakṣaraṃ na kṣaratīti viddhi //