Mahabharata · Chapter 12.20

asminvākyāntare vaktā devasthāno mahātapāḥ /
abhinītataraṃ vākyamityuvāca yudhiṣṭhiram //
devasthāna uvāca /

yadvacaḥ phalgunenoktaṃ na jyāyo'sti dhanāditi /
atra te vartayiṣyāmi tadekāntamanāḥ śṛṇu //

ajātaśatro dharmeṇa kṛtsnā te vasudhā jitā /
tāṃ jitvā ca vṛthā rājanna parityaktumarhasi //

catuṣpadī hi niḥśreṇī brahmaṇyeṣā pratiṣṭhitā / tāṃ krameṇa mahābāho yathāvajjaya pārthiva /
tasmātpārtha mahāyajñairyajasva bahudakṣiṇaiḥ //

svādhyāyayajñā ṛṣayo jñānayajñāstathā'pare /
karmaniṣṭhāśca buddhyarthāstaponiṣṭhāśca pārthiva //

vaikhānasānāṃ kaunteya vacanaṃ śrūyate yathā //

īheta dhanahetoryastasyānīhā garīyasī /
bhūyāndoṣo hi vardheta yastatkarma samāśrayet //

kṛtsnaṃ ca dhanasaṃhāraṃ kurvanti vidhikāraṇāt /
ātmanā tṛpito buddhyā bhrūṇahatyāṃ na budhyate //

anarhate yaddadāti na dadāti yadarhate /
arhānarhāparijñānāddānadharmo'pi duṣkaraḥ //

yajñāya sṛṣṭāni dhanāni dhātrā yajñādiṣṭaḥ puruṣo rakṣitā ca /
tasmātsarvaṃ yajña evopayojyaṃ dhanaṃ tato'nantara eva kāmaḥ //

yajñairindro vividhai ratnavadbhi rdevānsarvānabhyayādbhūritejāḥ /
tenendratvaṃ prāpya vibhrājate'sau tasmādyajñe sarvamevopayojyam //

mahādevaḥ sarvayajñe mahātmā hutvā'tmānaṃ devadevo babhūva /
viśvām̐llokānvyāpya viṣṭabhya kīrtyā virājate dyutimānkṛttivāsāḥ //

āvikṣitaḥ pārthivo'sau marutto vṛddhyā śakraṃ yo'jayaddevarājam /
yajñe yasya śrīḥ svayaṃ sanniviṣṭā yasminbhāṇḍaṃ kāñcanaṃ sarvamāsīt //

hariścandraḥ pārthivendraḥ śrutaste yajñairiṣṭvā puṇyabhāgvītaśokaḥ /
ṛddhyā śakraṃ yo'jayanmānuṣaḥ saṃ stasmādyajñe sarvamevopayojyam //