Mahabharata · Chapter 12.19

vedāhaṃ tāta śāstrāṇi aparāṇi parāṇi ca /
ubhayaṃ vedavacanaṃ kuru karma tyajeti ca //

ākulāni ca śāstrāṇi hetubhiścintitāni ca /
niścayaścaiva yo mantre vedāhaṃ taṃ yathāvidhi //

tvaṃ tu kevalaśāstrajño vīravratasamanvitaḥ /
śāstrārthaṃ tattvato gantuṃ na samarthaḥ kathañcana //

śāstrārthatattvadarśī yo dharmaniścayakovidaḥ /
tenāpyevaṃ na vācyo'yaṃ yadi dharmaṃ prapaśyasi //

bhrātṛsauhṛdamāsthāya yaduktaṃ vacanaṃ tvayā /
nyāyyaṃ yuktaṃ ca kaunteya prīto'haṃ tena te'rjuna //

maheśvarasamaṃ satvaṃ brahmaṇā caiva yatsamam /
vāsudevasamaṃ caiva na bhūtaṃ na bhaviṣyati //

tathā tvaṃ yodhamukhyeṣu satvaṃ paramamiṣyate //

balamindre ca vāyau ca balaṃ yacca janārdane /
tadvalaṃ bhīmasene ca tvayi cārjunā vidyate //

tvatsamaścitrayodhī ca dūrapātī ca pāṇḍava /
divyāstrabalasampannaḥ ko vā'nyastvatsamo naraḥ //

yuddhadharmeṣu sarveṣu kriyāṇāṃ naipuṇeṣu ca /
na tvayā sadṛśaḥ kaścintriṣu lokeṣu vidyate //

dhārmikaṃ dharmayuktaṃ ca niḥśeṣaṃ jñāyate mayā / dharmasūkṣmaṃ tu yadvācyaṃ tatra duṣprataraṃ tvayā /
dhanañjaya na me buddhimatiśaṅkitumarhasi //

yuddhaśāstravideva tvaṃ na vṛddhāḥ sevitāstvayā /
samāsavistaravidāṃ na teṣāṃ vetsi niścayam //

tapastyāgo vidhiriti niścayastāta dhīmatām /
parasparaṃ jyāya eṣāmiti naḥ śreyasī matiḥ //

yattvetanmanyase pārtha na jyāyo'sti dhanāditi /
tatra te vartayiṣyāmi yathā naitatpradhānataḥ //

tapaḥ svādhyāyaśīlā hi dṛśyante dhārmikā janāḥ /
ṛṣayastapasā yuktā yeṣāṃ lokāḥ sanātanāḥ //

ajātaśmaśravo dhīrāstathā'nye vanavāsinaḥ /
aruṇāḥ ketavaścaiva svādhyāyena divaṃ gatāḥ //

uttareṇa tu panthānamāryā viṣayanigrahāt /
abuddhijaṃ tamastyaktvā lokāṃstyāgavatāṃ gatāḥ //

dakṣiṇena tu panthānaṃ yaṃ bhāsvantaṃ pracakṣate /
ete kriyāvatāṃ lokā ye śmaśānāni bhejire //

anirdeśyā gatiḥ sā tu yāṃ prapaśyanti mokṣiṇaḥ /
tasmāttyāgaḥ pradhāneṣṭaḥ sa tu duḥkhaṃ praveditum //

anusmṛtya tu śāstrāṇi kavayaḥ samavasthitāḥ /
apīha syādapīha syātsārāsāradidṛkṣayā //

vedavādānatikramya śāstrāṇyāraṇyakāni ca /
vipāṭya kadalīstambhaṃ sāraṃ dadṛśire na te //

athaikāntavyudāsena śarīre pāñcabhautike /
icchādveṣasamāyuktamātmānaṃ prāhuriṅgitaiḥ //

agrāhyaṃ cakṣuṣā satvamanirdeśyaṃ ca tadgirā /
karmahetupuraskāraṃ bhūteṣu pasvirtate //

kalyāṇagocaraṃ kṛtvā mānaṃ tṛṣṇāṃ nigṛhya ca /
karmasantatimutsṛjya syānnirālambanaḥ sukhī //

asminnevaṃ sūkṣmagamye mārge sadbhirniṣevite /
kathamarthamanarthāḍhyamarjuna tvaṃ praśaṃsasi //

pūrvaśāstravido'pyevaṃ janāḥ paśyanti bhārata /
kriyāsu niratā nityaṃ dāne yajñe ca karmaṇi //

bhavanti sudurāvartā hetumanto'pi paṇḍitāḥ /
dṛḍhapūrve smṛtā mūḍhā naitadastīti vādinaḥ //

anṛtasyāvamantāro vaktāro janasaṃsadi /
caranti vasudhāṃ kṛtsnāṃ vāvadūkā bahuśrutāḥ //

pārtha yanna vijānīmaḥ kastāñjñātumihārhati /
evaṃ prājñāḥ śrutāścāpi mahāntaḥ śāstravittamāḥ //

tapasā mahadāpnoti buddhyā vai vindate mahat /
tyāgena sukhamāpnoti sadā kaunteya dharmavit //