મહાભારત · અધ્યાય 12.20

અસ્મિન્વાક્યાન્તરે વક્તા દેવસ્થાનો મહાતપાઃ ।
અભિનીતતરં વાક્યમિત્યુવાચ યુધિષ્ઠિરમ્ ॥
દેવસ્થાન ઉવાચ ।

યદ્વચઃ ફલ્ગુનેનોક્તં ન જ્યાયોઽસ્તિ ધનાદિતિ ।
અત્ર તે વર્તયિષ્યામિ તદેકાન્તમનાઃ શૃણુ ॥

અજાતશત્રો ધર્મેણ કૃત્સ્ના તે વસુધા જિતા ।
તાં જિત્વા ચ વૃથા રાજન્ન પરિત્યક્તુમર્હસિ ॥

ચતુષ્પદી હિ નિઃશ્રેણી બ્રહ્મણ્યેષા પ્રતિષ્ઠિતા । તાં ક્રમેણ મહાબાહો યથાવજ્જય પાર્થિવ ।
તસ્માત્પાર્થ મહાયજ્ઞૈર્યજસ્વ બહુદક્ષિણૈઃ ॥

સ્વાધ્યાયયજ્ઞા ઋષયો જ્ઞાનયજ્ઞાસ્તથાઽપરે ।
કર્મનિષ્ઠાશ્ચ બુદ્ધ્યર્થાસ્તપોનિષ્ઠાશ્ચ પાર્થિવ ॥

વૈખાનસાનાં કૌન્તેય વચનં શ્રૂયતે યથા ॥

ઈહેત ધનહેતોર્યસ્તસ્યાનીહા ગરીયસી ।
ભૂયાન્દોષો હિ વર્ધેત યસ્તત્કર્મ સમાશ્રયેત્ ॥

કૃત્સ્નં ચ ધનસંહારં કુર્વન્તિ વિધિકારણાત્ ।
આત્મના તૃપિતો બુદ્ધ્યા ભ્રૂણહત્યાં ન બુધ્યતે ॥

અનર્હતે યદ્દદાતિ ન દદાતિ યદર્હતે ।
અર્હાનર્હાપરિજ્ઞાનાદ્દાનધર્મોઽપિ દુષ્કરઃ ॥

યજ્ઞાય સૃષ્ટાનિ ધનાનિ ધાત્રા યજ્ઞાદિષ્ટઃ પુરુષો રક્ષિતા ચ ।
તસ્માત્સર્વં યજ્ઞ એવોપયોજ્યં ધનં તતોઽનન્તર એવ કામઃ ॥

યજ્ઞૈરિન્દ્રો વિવિધૈ રત્નવદ્ભિ ર્દેવાન્સર્વાનભ્યયાદ્ભૂરિતેજાઃ ।
તેનેન્દ્રત્વં પ્રાપ્ય વિભ્રાજતેઽસૌ તસ્માદ્યજ્ઞે સર્વમેવોપયોજ્યમ્ ॥

મહાદેવઃ સર્વયજ્ઞે મહાત્મા હુત્વાઽત્માનં દેવદેવો બભૂવ ।
વિશ્વાઁલ્લોકાન્વ્યાપ્ય વિષ્ટભ્ય કીર્ત્યા વિરાજતે દ્યુતિમાન્કૃત્તિવાસાઃ ॥

આવિક્ષિતઃ પાર્થિવોઽસૌ મરુત્તો વૃદ્ધ્યા શક્રં યોઽજયદ્દેવરાજમ્ ।
યજ્ઞે યસ્ય શ્રીઃ સ્વયં સન્નિવિષ્ટા યસ્મિન્ભાણ્ડં કાઞ્ચનં સર્વમાસીત્ ॥

હરિશ્ચન્દ્રઃ પાર્થિવેન્દ્રઃ શ્રુતસ્તે યજ્ઞૈરિષ્ટ્વા પુણ્યભાગ્વીતશોકઃ ।
ઋદ્ધ્યા શક્રં યોઽજયન્માનુષઃ સં સ્તસ્માદ્યજ્ઞે સર્વમેવોપયોજ્યમ્ ॥