Mahabharata · Chapter 12.21

atraivodāharantīmamitihāsaṃ purātanam /
indreṇa samaye pṛṣṭo yaduvāca bṛhaspatiḥ //

santoṣo vai svargasamaḥ santoṣaḥ paramaṃ sukham /
tuṣṭerna kiñcitparataḥ sā samyakpratitiṣṭhati //

yadā saṃharate kāmānkūrmo'ṅgānīva sarvaśaḥ /
tadā'tmajyotiracirātsvātmanyeva prasīdati //

na vibheti yadā cāyaṃ yadā cāsmānna bibhyati /
kāmadveṣau ca jayati tadā'tmānaṃ ca paśyati //

yadā'sau sarvabhūtānāṃ na druhyati na kāṅkṣati /
karmaṇā manasā vācā brahma sampadyate tadā //

evaṃ kaunteya bhūtāni tantaṃ dharmaṃ tathātathā /
tadā'tmanā prapaśyanti tasmādvudhyasva bhārata //

anye sāma praśaṃsanti vyāyāmamapare janāḥ /
naikaṃ na cāparaṃ kecidubhayaṃ ca tathā'pare //

yajñameke praśaṃsanti sannyāsamapare janāḥ / naikaṃ na cāparaṃ kecidubhayaṃ ca tathā'pare //

dānameke praśaṃsanti keciccaiva pratigraham /
kecitsarvaṃ parityajya tūṣṇīṃ dhyāyanta āsate //

rājyameke praśaṃsanti prajānāṃ paripālanam /
hatvā chittvā ca bhittvā ca kecidekāntaśīlinaḥ //

etatsarvaṃ samālokya budhānāmeva niścayaḥ /
adroheṇaiva bhūtānāṃ yo dharmaḥ sa satāṃ mataḥ //

adrohaḥ satyavacanaṃ saṃvibhāgo dayā damaḥ /
prajanaṃ sveṣu dāreṣu mārdavaṃ hīracāpalam //

evaṃ dharmaṃ pradhāneṣṭaṃ manuḥ svāyambhuvo'bravīt /
tasmādetatprayatnena kaunteya pratipālaya //

yo hi rājye sthitaḥ śaśvadvaśī tulyapriyāpriyaḥ /
kṣatriyo yajñaśiṣṭāśī rājā śāstrārthatattvavit //

asādhunigraharataḥ sādhūnāṃ pragrahe rataḥ /
dharmavartmani saṃsthāpya prajā varteta dharmataḥ //

putrasankrāmitaśrīśca vane vanyena vartayet /
vidhānamāśramāṇāṃ vai kuryātkarmāṇyatandritaḥ //

ya evaṃ vartate rājansa rājā dharmaniścitaḥ /
tasyāyaṃ ca paraścaiva lokaḥ syātsamphalodayaḥ //

nirvāṇaṃ hi suduṣprāpyaṃ bahuvighnaṃ ca me matam //

evaṃ dharmamanukrāntāḥ satyadānatapaḥ parāḥ /
ānṛśaṃsyaguṇairyuktāḥ kāmakrodhavivarjitāḥ //

prajānāṃ pālane yuktā dharmamuttamamāsthitāḥ /
gobrāhmaṇārthe yudhyantaḥ prāptā gatimanuttamām //

evaṃ rudrāḥ savasavastathā'dityāḥ parantapa / sādhyā rājarṣisaṅghāśca dharmametaṃ samāśritāḥ /
apramattāstataḥ svargaṃ prāptāḥ puṇyaiḥ svakarmabhiḥ //