Mahabharata · Chapter 12.179

yadyasti dattamiṣṭaṃ vā tapastaptaṃ tathaiva ca /
gurūṇāṃ vā'pi śuśrūṣā tanme brūhi pitāmaha //
bhīṣma uvāca /

yathā'smiṃśca tathā tatra jānīyāṃ nṛpasattama / duṣkartāro yathā loke yatkurvanti tathā śṛṇu //

ātmanā'narthayuktena pāpe niviśate manaḥ /
svakarma kaluṣaṃ kṛtvā duḥkhe mahati dhīyate //

durbhikṣādeva durbhikṣaṃ kleśātkleśaṃ bhayādbhayam /
mṛtebhyaḥ pramṛtā yānti daridrāḥ pāpakāriṇaḥ //

utsavādutsavaṃ yānti svargātsvargaṃ sukhātsukham /
śraddadhānāśca dāntāśca satvasthāḥ śubhakāriṇāḥ //

vyālakuñjaradurgeṣu sarpacorabhayeṣu ca /
hastāvāpena gacchanti nāstikāḥ kimataḥ param //

priyadevātitheyāśca vadānyāḥ priyasādhavaḥ /
kṣemyamātmavatāṃ mārgamāsthitā hastadakṣiṇam //

pulākā iva dhānyeṣu puttikā iva pakṣiṣu /
tadvidhāste manuṣyeṣu yeṣāṃ dharmo na kāraṇam //

suśīghramapi dhāvantaṃ vidhānamanudhāvati /
śete saha śayānena yenayena yathākṛtam //

upatiṣṭhati tiṣṭhantaṃ gacchantamanugacchati /
karoti kurvataḥ karma chāyevā'nuvidhīyate //

yenayena yathā yadyatpurā karma samārjitam /
tattadeva naro bhuṅkte nityaṃ vihitamātmanā //

svakarmaphalanikṣepaṃ vidhānaparirakṣitam /
bhūtagrāmamimaṃ kālaḥ samantātparikarṣati //

acodyamānāni yathā puṣpāṇi ca phalāni ca /
svaṃ kālaṃ nātivartante tathā karma purākṛtam //

sammānaścāvamānaśca lābhālābhau kṣayodayau /
pravṛttāni vivartante vidyānānte punaḥpunaḥ //

ātmanā vihitaṃ duḥkhamātmanā vihitaṃ sukham /
garbhaśayyāmupādāya bhujyate paurvadehikam //

bālo yuvā ca vṛddhaśca yatkaroti śubhāśubham /
tasyāntasyāmavasthāyāṃ bhuṅkte janmanijanmani //

yathā dhenusahasreṣu vatso vindati mātaram /
tathā pūrvakṛtaṃ karma kartāramanugacchati //

sanklinnamagrato vastraṃ paścācchudhyati vāriṇā /
duṣkarmāpi tathā paścātpūyate puṇyakarmaṇā //

tapasā tapyate dehastapasā vindate mahat // upavāsaiḥ prataptānāṃ dīrghaṃ sukhamanantaram //

dīrghakālena tapasā sevitena tapovane /
dharmanirdhūtapāpānāṃ saṃsiddhyante manorathāḥ //

śakunīnāmivākāśe matsyānāmiva codake /
padaṃ yathā na dṛśyeta tathā dharmavidāṃ gatiḥ //

alamanyairupālambhaiḥ kīrtitaiśca vyatikramaiḥ /
peśalaṃ cānurūpaṃ ca kartavyaṃ hitamātmanaḥ //