Mahabharata · Chapter 12.176

īhamānaḥ samārambhānyadi nāsādayeddhanam /
dhanatṛṣṇābhibhūtaśca kiṃ kurvansukhamāpnuyāt //
bhīṣma uvāca /

sarvasāmyamanāyāsaḥ satyavākyaṃ ca bhārata /
nirvedaścāvidhitsā ca yasya syātsa sakhī naraḥ //

etānyeva padānyāhuḥ pañca vṛddhāḥ praśāntaye /
eṣa svargaśca dharmaśca sukhaṃ cānuttamaṃ satām //

atrāpyudāharantīmamitihāsaṃ purātanam /
nirvedānmaṅkinā gītaṃ tannibodha yudhiṣṭhira //

īhamāno dhanaṃ maṅkirbhagnehaśca punaḥ punaḥ /
kenaciddhanaleśena krītavāndamyagoyugam //

susambaddhau tu tau damyau damanāyābhiniḥsṛtau /
āsīnamuṣṭraṃ madhyena sahasaivābhyadhāvatām //

tayoḥ samprāptayoruṣṭraḥ skandhadeśamamarpaṇaḥ /
utthāyotkṣipya tau damyau pasasāra mahājavaḥ //

hriyamāṇau tu tau damyau tenoṣṭreṇa pramāthinā /
priyamāṇau ca samprekṣya maṅkistatrābravīdidam //

na jātvavihitaṃ śakyaṃ dakṣeṇāṣīhituṃ dhanam /
yuktena śraddhayā samyagīhāṃ samanutiṣṭhatā //

pūrvamaryairvihīnasya yuktasyāpyutiṣṭhataḥ /
imaṃ paśyata sangatyā mama daivamupaplavam //

udyamyodyamya me damyau viṣameṇaiva gacchataḥ /
utkṣipya kākatālīyamunmātheneva jambukaḥ //

maṇīvoṣṭrasya lamvete priyau vatsatarau mama /
śudvaṃ hi daivamevedaṃ haṭhe naivāsti pauruṣam //

yadi vā'pyupapadyeta pauruṣaṃ nāma karhicit /
anviṣyamāṇaṃ tadapi daivamevāvatiṣṭhate //

tasmānnirveda eveha gantavyaḥ sukhabhīpsatā /
sukhaṃ svapiti nirviṇṇo nirāśaścārthasādhane //

aho samyakśukenoktaṃ sarvataḥ parimucyatā /
pratiṣṭhatā mahāraṇyaṃ janakasya niveśanāt //

yaḥ kāmānāpnuyātsarvānyaścaitānkevalāṃstyajet /
prāpaṇātsarvakāmānāṃ parityāgo viśiṣyate //

nāntaṃ sarvavidhitsānāṃ gatapūrvo'sti kaścana /
śarīre jīvite caiva tṛṣṇā martyasya vardhate //

nivartasya vidhitsābhyaḥ śāmya nirvidya kāmuka /
asakṛccāsi nikṛto na ca nirvidyase manaḥ //

yadi nāhaṃ vināśyaste yadyevaṃ ramase mayā /
mā māṃ yojaya lobhena vṛthā'tvaṃ vittakāmuka //

sañcitaṃ sañcitaṃ dravyaṃ naṣṭaṃ tava punaḥ punaḥ /
kadā tāṃ mokṣyase mūḍha dhanehāṃ dhanakāmuka //

aho nu mama bāliśyaṃ yo'haṃ krīḍanakastava / kleśairnānāvidhairnityaṃ saṃyojayasi nirghṛṇaḥ /
kiṃ naivaṃ jātu puruṣaḥ pareṣāṃ preṣyatāmiyāt //

na pūrve nāpare jātu kāmānāmantamāpnuvan /
tyaktvā sarvasamārambhānpratibuddho'smi jāgṛmi //

nūnaṃ me hṛdayaṃ kāmaṃ vajrasāramayaṃ dṛḍham /
yadanarthaśatāviṣṭaṃ śatadhā na vidīryate //

tyajāmi kāma tvāṃ caiva yacca kiñcitpriyaṃ tava /
tavāhaṃ priyamanvicchannātmanyupalabhe sukham //

kāma jānāmi te mūlaṃ sankalpātkila jāyase /
na tvāṃ sankalpayiṣyāmi samūlo nabhaviṣyasi //

īhā dhanasya na sukhā lubdhvā cintā ca bhūyasī /
labdhanāśo yathā mṛtyurlabdhaṃ bhavati vā na vā //

parityāge na labhate tato duḥkhataraṃ nu kim /
na ca tuṣyati labdhena bhūya eva ca mārgati //

anutarpula evārthaḥ svādu gāṅgabhivodakam /
madvilāpanametatu pratibuddho'smi santyaja //

ya imaṃ māmakaṃ dehaṃ bhūtagrāmaḥ samāśritaḥ /
sa yātvito yathākāmaṃ vasatāṃ vā yathāsukham //

na yuṣmāsviha me prītiḥ kāmalobhānusāriṣu /
tasmādutsṛjya vaḥ sarvānsatvamevāśrayāmyaham //

sarva bhūtānyahaṃ dehe paśyanmanasi cātmanaḥ /
yoge buddhiṃ śrute satvaṃ mano brahmaṇi dhārayan //

vihariṣyāmyanāsaktaḥ sukhī lokānnirāmayaḥ /
yathā māṃ tvaṃ punarnaivaṃ duḥkheṣu praṇidhāsyasi //

tvayā hi me praṇunnasya gatiranyā na vidyate /
tṛṣṇā śokaśramāṇāṃ hi tvaṃ kāma prabhavaḥ sadā //

dhananāśe'dhikaṃ duḥkhaṃ manye sarvamahattaram /
jñātayo hyavamanyante mitrāṇi ca dhanāccyutam //

avajñānasahasraistu doṣāḥ kaṣṭatarā'dhane /
dhane sukhakalā yā tu sā'pi duḥkhairvidhīyate //

dhanamasyeti puruṣaṃ puro nighnanti dasyavaḥ /
kliśyanti vividhairdaṇḍairnityamudvejayanti ca //

dhanalolupatā duḥkhamiti buddhaṃ cirānmayā /
yadyadālambase kāmaṃ tattadevānurudhyase //

atattvajño'si bālaśca dustoṣo'pūraṇo'nalaḥ /
naiva tvaṃ vettha sulabhaṃ naiva tvaṃ vettha durlabham //

pātāla iva duṣpūro māṃ duḥkhairyoktumicchasi /
nāhamadya samāveṣṭuṃ śakyaḥ kāma punastvayā //

nirvedamahamāsādya dravyanāśādyadṛcchayā /
nivṛttiṃ paramāṃ prāpya nādya kāmānvicintaye //

atikleśānsahāmīha nāhaṃ buddhyāmyabuddhimān /
nikṛto dhananāśena śaye sarvāṅgavijvaraḥ //

parityajāmi kāma tvāṃ hitvā sarvaṃ manogatam /
na tvaṃ mayā punaḥ kāma nasyoteneva raṃsyase //

kṣamiṣye kṣipamāṇānāṃ na hiṃsiṣye vihiṃsitaḥ /
dveṣyamuktaḥ priyaṃ vakṣyāmyanādṛtya tadapriyam //

tṛptaḥ svasthendriyo nityaṃ yathālabdhena vartayan /
na sakāmaṃ kariṣyāmi tvāmahaṃ śatrumātmanaḥ //

nirvedaṃ nirvṛtiṃ tṛptiṃ śāntiṃ satyaṃ damaṃ kṣamām /
sarvabhūtadayāṃ caiva viddhi māṃ śaraṇāgatam //

tasmātkāmaśca lobhaśca tṛṣṇā kārpaṇyameva ca /
tyajantu māṃ pratiṣṭhantaṃ satvastho hyasmi sāmpratam //

prahāya kāmaṃ lobhaṃ ca krodhaṃ pāruṣyameva ca /
nādya lobhavaśaṃ prāpto duḥkhaṃ prāpsyāmyanātmavān //

yadyastyajati kāmānāṃ tatsukhasyābhipūryate /
kāmasya vaśago nityaṃ duḥkhameva prapadyate //

kāmānubandhaṃ nudate yatkiñcitpuruṣo rajaḥ /
kāmakrodhodbhavaṃ duḥkhamahrīraratireva ca //

eṣa brahmapratiṣṭho'haṃ grīṣme śītamiva hradam /
śāmyāmi parinirvāmi sukhamāse ca kevalam //

yacca kāmasukhaṃ loke yacca divyaṃ mahatsukham /
tṛṣṇākṣayasukhasyaite nārhataḥ ṣoḍaśīṃ kalām //

ātmanā saptamaṃ kāmaṃ hatvā śatrumivottamam /
prāpyāvadhyaṃ brahmapuraṃ rājeva ca vasāmyaham //

etāṃ buddhiṃ samāsthāya maṅkirnirvedamāgataḥ /
sarvānkāmānparityajya prāpya brahma mahatsukham //

damyanāśakṛte maṅkiramṛtatvaṃ kilāgamat /
acchinatkāmamūlaṃ sa tena prāpa parāṃ gatim //

atrāpyudāharantīmaṃ ślokaṃ mokṣopasaṃhitam /
gītaṃ videharājena janakena praśāmyatā //

anantamiva me vittaṃ yasya me nāsti kiñcana /
mithilāyāṃ pradīptāyāṃ na me dahyati kiñcana //

atraivodāharantīmaṃ bodhyasya padasañcayam /
nirvedaṃ prati vinyastaṃ taṃ nibodha yudhiṣṭhira //

bodhyaṃ śāntamṛṣiṃ rājā nāhuṣaḥ paryapṛcchata /
nirvedācchāntimāpannaṃ śāstraprajñānatarpitam //

upadeśaṃ mahāprājña śamasyopadiśasva me /
kāṃ buddhiṃ samanuprāpya śāntaścarasi nirvṛtaḥ //
bodhya uvāca /

upadeśena vartāmi nānuśāsmīha kañcana /
lakṣaṇaṃ tasya vakṣye'haṃ tatsvayaṃ parimṛṣyatām //

piṅgalā kuraraḥ sarpaḥ sāraṅgānveṣaṇaṃ vane /
iṣukāraḥ kumārī ca ṣaḍete guravo mama //
[*bhīṣma uvāca /

āśā balavatī rājannairāśyaṃ paramaṃ sukham /
āśāṃ nirāśāṃ kṛtvā tu sukhaṃ svapiti piṅgalā //

sāmiṣaṃ kuraraṃ dṛṣṭvā vadhyamānaṃ nirāmiṣaiḥ /
āmiṣasya parityāgātkuraraḥ sukhamedhate //

gṛhārambho hi duḥkhāya na sukhāya kadācana /
sarpaḥ parakṛtaṃ veśma praviśya sukhamedhate //

sukhaṃ jīvanti munayo bhaikṣyavṛttiṃ samāśritāḥ /
adrohaṇaiva bhūtānāṃ sāraṅga iva pakṣiṇaḥ //

alpebhyaśca mahadbhyaśca śāstrebhyo matimānnaraḥ / sarvataḥ sāramādadyātpuṣpebhya iva ṣaṭ्padaḥ //

iṣukāro naraḥ kaścidipāvāsaktamānasaḥ /
samīpenāpi gacchantaṃ rājānaṃ nāvabuddhavān //

bahūnāṃ kalaho nityaṃ dvayoḥ sankathanaṃ dhruvam / ekākī vicariṣyāni kumārīśaṅkhako yathā // ] //