Mahabharata · Chapter 12.17

asantoṣaḥ pramādaśca mado rāgo'praśāntatā /
balaṃ moho'bhimānaścāpyudvegaścaiva sarvaśaḥ //

ebhiḥ pāpmabhirāviṣṭo rājyaṃ tvamabhikāṅkṣase /
nirāmiṣo vinirmuktaḥ praśāntaḥ susukhī bhava //

ya imāmakhilāṃ bhūmiṃ śiṣyādeko mahīpatiḥ /
tasyāpyudaramekaṃ vai kimidaṃ tvaṃ praśaṃsasi //

nāhnā pūrayituṃ śakyāṃ na māsairbharatarṣabha /
apūryāṃ pūrayannicchāmāyuṣā'pi na śaknuyāt //

yatheddhaḥ prajvalatyagnirasamiddhaḥ praśāmyati /
alpāhāratayāgniṃ tvaṃ śamayaudaryamutthitam //

ātmodarakṛte'prājñaḥ karoti viśasaṃ bahu /
jayodaraṃ pṛthivyā te śreyo nirjitayā jitam //

mānuṣānkāmabhogāṃstvamaiśvaryaṃ ca praśaṃsasi /
abhogino'balāścaiva yānti sthānamanuttamam //

yogaḥ kṣemaśca rāṣṭrasya dharmādharmau tvayi sthitau /
mucyasva mahato bhārāttyāgamevābhisaṃśraya //

ekodarakṛte vyāghraḥ karoti viśasaṃ bahu /
tamanye'pyupajīvanti mandavegatarā mṛgāḥ //

viṣayānpratisangṛhya sannyāse kurute matim /
na ca tuṣyanti rājānaḥ paśya buddhyantaraṃ yathā //

patrāhārairaśmakuṭṭairdantolūkhalikaistathā /
abbhakṣairvāyubhakṣaiśca terayaṃ narako jitaḥ //

yastvimāṃ vasudhāṃ kṛtsnāṃ praśāsedakhilāṃ nṛpaḥ /
tulyāśmakāñcano yaśca sa kṛtārtho na pārthivaḥ //

sankalpeṣu nirārambho nirāśīrnirmamo bhava /
aśokaṃ sthānamātiṣṭha iha cāmutra cāvyayam //

nirāmiṣā na śocanti śocanti tvāmiṣaiṣiṇaḥ /
parityajyāmiṣaṃ sarvaṃ mṛṣāvādātpramokṣyase //

panthānau pitṛyānaśca devayānaśca viśrutau /
ījānāḥ pitṛyānena devayānena mokṣiṇaḥ //

tapasā brahmaryeṇa svādhyāyena maharṣayaḥ /
vimucya dehāṃste yānti mṛtyoraviṣayaṃ gatāḥ //

āmiṣaṃ bandhanaṃ loke karmehoktaṃ tathā'miṣam /
tābhyāṃ vimuktaḥ pāpābhyāṃ padamāpnoti tatparam //

api gāthāṃ purā gītāṃ janakena vadantyuta /
nirdvandvena vimuktena mokṣaṃ samanupaśyatā //

anantaṃ bata me vittaṃ yasya me nāsti kiñcana /
mithilāyāṃ pradīptāyāṃ na me kiñcitpradahyate //

prajñāprāsādamāruhya na śocecchocato janān /
jagatīstho'thavā'dristho mandabuddhirnacekṣate //

dṛśyaṃ paśyati yaḥ paśyansa cakṣuṣmānsa buddhimān /
ajñātānāṃ ca vijñānātsambodhādruddhirucyate //

yastu mānaṃ vijānāti bahumānamiyātsa vai /
brahmabhāvaprabhūtānāṃ vaidyānāṃ bhāvitātmanām //

yadā bhūtapṛthagbhāvamekasthamanupaśyati /
tata eva ca vistāraṃ brahma sampadyate tadā //

te janāstāṃ gatiṃ yānti nāvidvāṃso'lpacetasaḥ /
nābuddhayo nātapasaḥ sarvaṃ buddhau pratiṣṭhitam //