Mahabharata · Chapter 12.16

arjunasya vacaḥ śrutvā bhīmaseno'tyamarṣaṇaḥ /
dhairyamāsthāya taṃ jyeṣṭhaṃ bhrātā bhrātaramabravīt //

rājanviditadharmo'si na te'styaviditaṃ bhuvi /
upaśikṣāma te vṛttaṃ sadaiva na ca śaknumaḥ //

na vakṣyāmi na vakṣyāmītyevaṃ me manasi sthitam /
atiduḥkhāttu vakṣyāmi tannibodha janādhipa //

bhavataḥ sampramohena sarvaṃ saṃśayitaṃ kṛtam /
viklabatvaṃ ca naḥ prāptamabalatvaṃ tathaiva ca //

kathaṃ hi rājā lokasya sarvaśāstraviśāradaḥ /
mohamāpadyase dainyādyathā kāpuruṣastathā //

āgatiśca gatiścaiva lokasya viditā tava /
āyatyāṃ ca tadātve ca na te'styaviditaṃ prabho //

evaṃ gate mahārāja rājyaṃ prati janādhipa /
hetumātraṃ tu vakṣyāmi tamihaikamanāḥ śrṛṇu //

dvividho jāyate vyādhiḥ śārīro mānasastathā /
parasparaṃ tayorjanma nirdvandvaṃ nopalabhyate //

śārīrājjāyate vyādhirmānaso nātra saṃśayaḥ /
mānasājjāyate vyādhiḥ śārīra iti niścayaḥ //

śārīramānase duḥkhe yo'tīte tvanuśocati /
duḥkhena labhate duḥkhaṃ dvāvanarthau ca vindati //

śītoṣṇe caiva vāyuśca trayaḥ śārīrajā guṇāḥ /
teṣāṃ guṇānāṃ sāmyaṃ yattadāhuḥ svasthalakṣaṇam //

teṣāmanyatamodreke vidhānamupadiśyate / uṣṇena bādhyate śītaṃ śītenoṣṇaṃ prabādhyate /
ubhābhyāṃ bādhyate vāyurvidhānamidamucyate //

satvaṃ rajastaya iti mānasāḥ syustrayo guṇāḥ /
teṣāṃ guṇānāṃ sāmyaṃ yattadāhuḥ svasthalakṣaṇam //

teṣāmanyatamodreke vidhānamupadiśyate / harṣeṇa bādhyate śoko harṣaḥ śokena bādhyate /
ubhābhyāṃ bādhyate moho vidhānamidamucyate //

kaścitsukhe vartamāno duḥkhasya smartumicchati /
kaścidduḥkhe vartamānaḥ sukhasya smartumicchati //

sa tvaṃ na duḥkhī duḥkhasya na sukhī ca sukhasya ca / nāduḥkhī duḥkhabhāgasya nāsukhī ca sukhasya ca /
smartumarhasi kauravya diṣṭaṃ hi balavattaram //

athavā te svabhāvo'yaṃ yena pārthiva tuṣyase / dṛṣṭvā sabhāgatāṃ kṛṣṇāmekavastrāṃ rajasvalām /
miṣatāṃ pāṇḍuputrāṇāṃ na tasya smartumarhasi //

pravrājanaṃ ca nagarādajinaiśca vivāsanam /
mahāraṇyanivāsaśca na tasya smartumarhasi //

jaṭāsurātparikleśaṃ citrasenena cāhavam /
saindhavācca parikleśaṃ kathaṃ vismṛtavānasi //

punarajñātacaryāyāṃ kīcakena padā vadham /
draupadyā rājaputryāṃśca kathaṃ vismṛtavānasi //

yacca te droṇabhīṣmābhyāṃ yuddhamāsīdarindam /
manasaikena yoddhavyaṃ tatte yuddhamupasthitam //

yatra nāsti śaraiḥ kāryaṃ na mitrairna ca bandhubhiḥ /
ātmanaikena yoddhavyaṃ tatte yuddhamupasthitam //

tasminnanirjite yuddhe prāṇānyadi vimokṣyase /
anyaṃ dehaṃ samāsthāya tatastairiha yotsyase //

yo hyanāḍhyaḥ sa patitastaducchiṣṭaṃ tadalpakam / bahvapathyaṃ balavato na kiñcitrāyate balam //

tasmādadyaiva gantavyaṃ yudhyasva bharatarṣabha /
paramavyaktarūpasya vyaktaṃ tyaktvā svakarmabhiḥ //

tasminnanirjite yuddhe kāmavasthāṃ gamiṣyasi /
etajjitvā mahārāja kṛtakṛtyo bhaviṣyasi //

etāṃ buddhiṃ viniścitya bhūtānāmāgatiṃ gatim /
pitṛpaitāmahe vṛtte śādhi rājyaṃ yathocitam //

diṣṭyā duryodhanaḥ pāpo nihataḥ sānugo yudhi /
draupadyāḥ keśapakṣasya diṣṭyā te padavīṃ gatāḥ //

yajasva vājimedhena vidhivaddakṣiṇāvatā /
vayaṃ te kinkarāḥ pārtha vāsudevaśca vīryavān //