Mahabharata · Chapter 12.168

tasyāṃ niśāyāṃ vyuṣṭāyāṃ gate tasmindvijottame /
niṣkramya gautamo'gacchaddhanārthī vicacāra ha //

sāmudrikānsavaṇijastato'paśyatsthitānpathi /
sa tena saha sārthena prayayau sāgaraṃ prati //

sa tu sārtho mahārāja kasmiṃścidgirigahvare /
mattena dviradenātha nihataḥ prāyaśo'bhavat //

sa kathañcidbhayāttasmādvimukto prāyaśo'bhavat /
kāndigbhūto jīvitārthī pradudrāvottarāṃ diśam //

tatastu sa paribhraṣṭaḥ sārthāddeśāttathā'rthataḥ /
ekākī vyabhramattatra vane kāpuruṣo yathā //

sa panthānamathāsādya samudrābhisaraṃ tadā /
āsasāda vanaṃ ramyaṃ mahatpuṣpitapādapam //

sarvartukairāmravaṇaiḥ puṣpitairupaśobhitam /
nandanoddeśasadṛśaṃ yakṣakinnarasevitam //

sālatālaghavāśvatthaplakṣāguruvanaistathā / candanasya ca mukhyasya pādapairupaśobhitam /
giriprastheṣu ramyeṣu sukheṣu sukhagandhiṣu //

samantato dvijaśreṣṭhā valgu kūjanti tatra vai /
manuṣyavadanāścānye bhāruṇḍā iti viśrutāḥ //

sa tānyatimanojñāni vihagānāṃ rutāni vai /
śṛṇvansuramaṇīyāni vipro'gacchata gautamaḥ //

tato'paśyatsuramyeṣu suvarṇasikatācite / deśabhāge same citre svargoddeśasamaprabhe /
śriyā juṣṭaṃ dadarśātha nyagrodhaṃ ca sumaṇḍalam //

śākhābhiranurūpābhiḥ saṃvṛtaṃ chatrasannibham /
tasya mūlaṃ ca saṃsiktaṃ varacandanavāriṇā //

divyapuṣpānvitaṃ śrīmatpitāmahasadopamam /
taṃ dṛṣṭvā gautamaḥ prīto manaḥkāntamanuttamam //

medhyaṃ suragṛhaprakhyaṃ puṣpitaiḥ pādapairvṛtam /
tamāsādya mudā yuktastasyādhastādupāviśat //

tatrāsīnasya kaunteya gautamasya narādhipa / puṣpāṇi samupaspṛśya pravavāvanilaḥ śubhaḥ /
hlādayaṃstasya gātrāṇi gautamasya tadā nṛpa //

sa tu vipraḥ pariśrāntiḥ spṛṣṭaḥ puṇyena vāyunā /
sukhamāsādya suṣvāpa bhāskaraścāstamabhyayāt //

tato'staṃ bhāskare yāte sandhyākāla upasthite /
ājagāma svabhavanaṃ brahmalokātkhagottamaḥ //

nāḍījaṅgha iti khyāto dayito brahmaṇaḥ sakhā /
bakarājo mahāprājñaḥ kāśyapasyātmasambhavaḥ //

rājadharmeti vikhyāto babhūvāpratibho bhuvi /
devakanyāsutaḥ śrīmānvidvāndevasamaprabhaḥ //

mṛṣṭahāṭakasañchanno bhūṣaṇairarkasannibhaiḥ /
bhūṣitaḥ sarvagātreṣu devagarbhaḥ śriyā jvalan //

tamāgataṃ khagaṃ dṛṣṭvā gautamo vismito'bhavat /
kṣutpipāsāparītātmā hiṃsārthaṃ cainamaikṣata //
rājadharmovāca /

svāgataṃ bhavato vipra diṣṭyā prāpto'si me gṛhān /
astaṃ ca savitā yātaḥ sandhyeyaṃ samupasthitā //

mama tvaṃ nilayaṃ prāptaḥ priyātithiraninditaḥ /
pūjito yāsyasi prātarvidhidṛṣṭena karmaṇā //