Mahabharata · Chapter 12.169

giraṃ tāṃ madhurāṃ śrutvā gautamo vismitastadā /
kautūhalānvito rājanrājadharmāṇamaikṣata //
rājadharmovāca /

bhoḥ kāśyapasya putro'haṃ mātā dākṣāyaṇī mama /
satī tvaṃ ca guṇopetaḥ svāgataṃ te dvijottama //
bhīṣma uvāca /

tasmai dattvā sa satkāraṃ vidhidṛṣṭena karmaṇā /
śālapuṣpamayīṃ divyāṃ bṛsīṃ samupakalpayat //

bhagīratharathākrāntadeśāngaṅgāniṣevitān /
ye caranti mahāmīnāstāṃśca tasyānvakalpayat //

vahniṃ cāpi susandīptaṃ mīnāṃścāpi supīvarān /
sa gautamāyātithaye nyavedayata kāśyapiḥ //

bhuktavantaṃ ca taṃ vipraṃ prītātmānaṃ mahāmanāḥ /
śramāpanayanārthaṃ sa pakṣābhyāmabhyavījayat //

tano viśrāntamāsīnaṃ gotravṛttamapṛcchata /
so'bravīdgautamo'smīti brāhmaṇosmītyudāharat //

tasmai parṇamayaṃ divyaṃ divyapuṣpādhivāsitam /
gandhāḍhyaṃ śayanaṃ prādātsa śiśye tatra vai sukham //

apopaviṣṭaṃ śayane gautamaṃ vākyavittamaḥ /
papraccha kāśyapirvāgmī kimāgamanamityuta //

tato'bravīdgautamastaṃ daridro'haṃ mahāmate /
samudragamanākāṅkṣī dravyārthamiti bhārata //

taṃ kāśyapo'bravītprītyā notkaṇṭhāṃ kartumarhasi /
kṛtakāryo dvijaśreṣṭha sadravyo yāsyase gṛhān //

caturvidhā hyarthagatirbṛhaspatimataṃ yathā /
mitraṃ vidyā hiraṇyaṃ ca buddhiśceti budhepsitā //

prādurbhūto'smi te mitraṃ suhṛttvaṃ ca mahattaram /
so'haṃ tathā yatiṣyāmi bhaviṣyasi yathārthavān //

tataḥ prabhātasamaye sukhaṃ pṛṣṭvā'bravīdidam /
gaccha saumya pathā'nena kṛtakṛtyo bhaviṣyasi //

itastriyojanaṃ gatvā rākṣasādhipatirmahān /
virūpākṣa iti khyātaḥ sakhā mama mahābalaḥ //

taṃ gaccha dvijamukhya tvaṃ sa madvākyapracoditaḥ /
kāmānabhīpsitāṃstubhyaṃ dātā nāstyatra saṃśayaḥ //

ityuktaḥ prayayau rājangautamo vigataklamaḥ /
phalānyamṛtakalpāni bhakṣayāno yatheṣṭataḥ //

candanāgurumukhyāni patratvacavanāni ca /
tasminpathi mahārāja sevamāno drutaṃ yayau //

tato manuvrajaṃ nāma nagaraṃ śailatoraṇam /
śailaprākāravapraṃ ca śailayantrārgalaṃ tathā //

viditaścābhavattasya rākṣasendrasya dhīmataḥ /
prahitaḥ suhṛdā rājanprīyamāṇaḥ priyātithiḥ //

tataḥ sa rākṣasendraḥ svānpreṣyānāha yudhiṣṭhira /
gautamo nagaradvārācchīghramānīyatāmiti //

tasmātpuravarāttūrṇaṃ puruṣāḥ śvetaveṣṭanāḥ /
gautametyabhibhāṣantaḥ puradvāramupāgaman //

te tamūcurmahārāja rājapreṣyāstadā dvijam /
tvarasva tūrṇamāgaccha rājā tvāṃ draṣṭumicchati //

rākṣasādhipatirvīro virūpākṣa iti śrutaḥ /
sa tvāṃ tvarati vai draṣṭuṃ tatkṣipraṃ saṃvidhīyatām //

tataḥ sa prādravadvipro vismayādvigataklamaḥ /
gautamaḥ paramarddhi tāṃ paśyanparamavismitaḥ //

taireva sahito rājño veśma tūrṇamupādravat /
darśanaṃ rākṣasendrasya kāṅkṣamāṇo dvijastadā //