Mahabharata · Chapter 12.157

anarthānāmadhiṣṭhānamukto lobhaḥ pitāmaha /
ajñānamapi kauravya śrotumicchāmi tattvataḥ //
bhīṣma uvāca /

karoti pāpaṃ yo'jñānānnātmano vetti ca kṣamam /
dviṣate sādhuvṛttāṃśca sa lokasyaiti vācyatām //

ajñānānnirayaṃ yāti tathā jñānena durgatim /
ajñānātkleśamāpnoti tathā'patsu nimajjati //
yudhiṣṭhira uvāca /

prajānāmapravṛttiṃ ca jñānavṛddhikṣayodayān /
mūlaṃ sthānaṃ gatiṃ kālaṃ kāraṇaṃ hetumeva ca //

śrotumicchāmi tattvena yathāvadiha pārthiva /
ajñānaprasavaṃ hīdaṃ yadduḥkhamupalabhyate //
bhīṣma uvāca /

rāgo dveṣastathā moho harṣaḥ śoko'bhimānitā /
kāmaḥ krodhaśca darpaśca tandrī cālasyameva ca //

icchā dveṣastathā tāpaḥ paravṛddhyupatāpitā /
ajñānamennirdiṣṭaṃ pāpānāṃ caiva yāḥ kriyāḥ //

etasya vā pravṛtteśca vṛddhyādīnyāṃśca pṛcchasi /
vistareṇa mahārāja śṛṇu tacca viśeṣataḥ //

ubhāvetau samaphalau samadoṣau ca bhārata /
ajñānaṃ cātilobhaścāpyevaṃ jānīhi pārthiva //

lobhaprabhavamajñānaṃ vṛddhaṃ bhūyaḥ pravardhate /
sthāne sthānaṃ kṣayetkṣīṇamupaiti vividhāṃ gatim //

mūlaṃ lobhasya moho vai kālātmagatireva ca / [chinne bhinne tathā lobhe kāraṇaṃ kāla eva ca // ]

tasyājñānāddhi lobho hi kāmātmā gatireva ca /
sarve doṣāstathā lobhāttasmāllobhaṃ vivarjayet //

janako yuvanāśvaśca pṛṣadaśvaḥ prasenajit / lobhakṣayāddivaṃ prāptāstathaivānye narādhipāḥ /
chinne chinne tathā lobhe divaṃ prāptā janādhipāḥ //

pratyakṣaṃ tu kuruśreṣṭha tyaja lobhamihātmanā /
tyaktvā lobhaṃ sukhī loke pretya ceha ca modate //