Mahabharata · Chapter 12.149

abuddhipūrvaṃ yatpāpaṃ kuryādbharatasattama /
mucyate sa kathaṃ tasmādenasastadbravīhi me //
bhīṣma uvāca /

atra te vartayiṣyāmi purāṇamṛṣisaṃstutam /
indrotaḥ śaunako vipro yadāha janamejayam //

āsīdrājā mahāvīryaḥ pārikṣijjanamejayaḥ /
abuddhijā brahmahatyā tamāgacchanmahīpatim //

brāhmaṇāḥ sarva evainaṃ tatyajuḥ sapurohitāḥ /
sa jagāma vanaṃ rājā dahyamāno divāniśam //

prajābhiḥ sa parityaktaścakāra kuśalaṃ mahat /
ativelaṃ tapastepe dahyamānaḥ sa manyunā //

brahmahatyāpanodārthamapṛcchadbrāhmaṇānbahūn /
paryaṭanpṛthivīṃ kṛtsnāṃ deśedeśe narādhipaḥ //

tatretihāsaṃ vakṣyāmi dharmasyāsyopavṛṃhaṇam /
dahyamānaḥ pāpakṛtyā jagāma janamejayaḥ //

cariṣyamāṇa indrotaṃ śaunakaṃ saṃśitavratam /
samāsādyopajagrāha pādayoḥ paripīḍayan //

tato bhīto mahāprājño jagarhe subhṛśaṃ tadā /
kartā pāpasya mahato bhrūṇahā kimihāgataḥ //

kiṃ tavāsmāsu kartavyaṃ mā māṃ drākṣīḥ kathañcana /
gacchagaccha na te sthānaṃ prīṇātyasmāniti bruvan //

rudhirasyeva te gandhaḥ śavasyeva ca darśanam /
aśivaḥ śivasankāśo mṛto jīvannivāṭasi //

antarbhṛtyuraśuddhātmā pāpamevānucintayan /
prabudhyase prasvapipi vartase parame sukhe //

moghaṃ te jīvitaṃ rājanparikliṣṭaṃ ca jīvasi /
pāpāyaiva hi sṛṣṭo'si karmaṇeha yavīyase //

bahukalyāṇamicchanta īhante pitaraḥ sutān /
tapasā daivatejyābhirvandanena titikṣayā //

pitṛvaṃśamimaṃ paśya tvatkṛte nidhanaṃ gatam /
nirarthāḥ sarva evaiṣāmāśābandhāstvadāśrayāḥ //

yānpūjayanto vindanti svargamāyuryaśaḥ prajāḥ /
teṣu te santataṃ dveṣo brāhmaṇeṣu nirarthakaḥ //

imaṃ lokaṃ vimucya tvamavāṅbhūrdhā patiṣyasi /
aśāśvatīḥ śāśvatīśca samāḥ pāpena karmaṇā //

svādyamāno jantuśataistīkṣṇadaṃṣṭrairayomukhaiḥ /
tataśca punarāvṛttaḥ pāpayoniṃ gamiṣyasi //

yadidaṃ manyase rājannāyamasti kutaḥ paraḥ /
pratismārayitārastvāṃ yamadūtā yamakṣaye //