Mahabharata · Chapter 12.150

evamuktaḥ pratyuvāca taṃ muniṃ janamejayaḥ /
garhyaṃ bhavāngarhayate nindyaṃ nindati māṃ punaḥ //

dhikkāryaṃ māṃ dhikkurute tasmāttvā'haṃ prasādaye /
sarvaṃ hīdaṃ svakṛtaṃ me jvalāmyagnāvivāhitam //

svakarmāṇyabhisandhāya nābhinandati me manaḥ /
prāptaṃ ghoraṃ bhayaṃ nūnaṃ mayā vaivasvatādapi //

tattu śalyamanirhṛtya kathaṃ śakṣyāmi jīvitum /
sarvaṃ manyuṃ vinīya tvamabhi māṃ vada śaunaka //

[mahānāsaṃ brāhmaṇānāṃ bhūyo vakṣyāmi sāmpratam.] gantā gatiṃ brāhmaṇānāṃ bhaviṣyāmyarthavānpunaḥ /
astu śeṣaṃ kulasyāsya mā parābhūdidaṃ kulam //

na hi no brahmaśaptānāṃ śeṣaṃ bhavitumarhati /
stutīralabhamānānāṃ saṃvidaṃ veda niścayāt //

nindamānaḥ svamātmānaṃ bhūyo vakṣyāmi sāmpratam /
bhūyaścaivābhimajjanti nirdharmā nirjalā iva //

na hyayajñā amuṃ lokaṃ prāpnuvanti kathañcana /
avākca prapatiṣyanti pulindaśavarā iva //

avijñāyaiva me prajñāṃ bālasyeva sa paṇḍitaḥ /
brahmanpiteva putrasya prītimānbhava śaunaka //
śaunaka uvāca /

kimāścaryaṃ yataḥ prājño bahukuryādasāmpratam /
iti vai paṇḍito bhūtvā bhūtānāṃ ko nu tapyate //

prajñāprāsādamāruhya aśocyaḥ śocate janān /
jagatīsthānivādristhaḥ prajñayā pratipatsyati //

na copalabhate kaścinna cāścaryāṇi paśyati /
nirviṇṇātmā parokṣo vā dhikkṛtaḥ sarvasādhuṣu //

viditvā bhavato vīryaṃ māhātmyaṃ caiva cāgame /
kuruṣveha yathāśānti brahmā śaraṇamastu te //

tadvai vāritrakaṃ tāta brāhmaṇānāmakupyatām /
athavā tapyase pāpe dharmaṃ cedanupaśyasi //
janamejaya uvāca /

anutapye ca pāpena na cādharmaṃ carāmyaham /
bubhūṣedbhajamānaṃ ca prītimānbhava śaunaka //
śaunaka uvāca /

chittvā dambhaṃ ca mānaṃ ca prītimicchāmi te nṛpa /
sarvabhūtahite tiṣṭha dharmaṃ caiva pratismaran //

na bhayānna ca kārpaṇyānna lobhāttvāmupāhvaye /
tāṃ me daivīṃ giraṃ satyāṃ śṛṇu tvaṃ brāhmaṇaiḥ saha //

so'haṃ na kenaciccārthī tvāṃ ca dharmādupāhvaye /
krośatāṃ sarvabhūtānāṃ hāhādhigiti jalpatām //

vakṣyanti māmadharmajñaṃ tyakṣyanti suhṛdo janāḥ /
tā vācaḥ suhṛdaḥ śrutvā sañjvariṣyanti me bhṛśaṃ //

kecideva mahāprājñāḥ pratijñāsyanti kāryatām /
jānīhi matkṛtaṃ tāta brāhmaṇānprati bhārata //

yathā te satkṛtāḥ kṣemaṃ labheraṃstvaṃ tathā kuru /
pratijānīhi cādrohaṃ brāhmaṇānāṃ narādhipa //
janamejaya uvāca /

naiva vācā na manasā punarjātu na karmaṇā /
drogdhā'smi brāhmaṇānvipra caraṇāveva te spṛśe //