Mahabharata · Chapter 12.133

svarāṣṭrātpararāṣṭrācca kośaṃ sañjanayennṛpaḥ /
kośāddhi dharmaḥ kaunteya rājyamūlaṃ pravartate //

tasmātsañjanayetkośaṃ satkṛtya paripālayet /
paripālyānugṛhṇīyādeva dharmaḥ sanātanaḥ //

sa kośaḥ śuddhabhāvena na nṛśaṃsena jāyate /
madhyamaṃ padamāsthāya kośasangrahaṇaṃ caret //

abalasya kutaḥ kośo hyakośasya kuto balam /
abalasya kuto rājyamarājye śrīrbhavetkutaḥ //

uccairvṛtteḥ śriyo hāniryathaiva maraṇaṃ tathā /
tasmātkośaṃ balaṃ mitramatha rājā vivardhayet //

hīnakośaṃ hi rājānamavamanyanti śatravaḥ /
na cāsyālpe tuṣyanti karmaṇā'pyutsahanti ca //

śriyo hi kāraṇādrājā satkriyāṃ labhate parām /
sā'sya gūhati pāpāni vāso guhyamiva striyāḥ //

ṛddhimasyānutapyante purā viprakṛtā narāḥ / sālāvṛkā ivājasnaṃ jighāṃsūneva vindati /
īdṛśasya kuto rājyaṃ sukhaṃ bharatasattama //

udyacchedeva na glāyedudyamo hyeva pauruṣam /
apyaparvaṇi bhajyeta na nameteha kasyacit //

apyaraṇyaṃ samāśritya carenmṛgagaṇaiḥ saha /
na tvevodriktamaryādairdasyubhiḥ sahitaścaret //

dasyūnāṃ sulabhā senā raudrakarmasu bhārata /
ekāntato hyamaryādātsarvo'pyudvijate janaḥ //

dasyavo'pyabhiśaṅkante niranukrośakāriṇaḥ //

sthāpayedeva maryādāṃ janacittaprasādinīm /
alpāpyartheṣu maryādā loke bhavati pūjitā //

nāyaṃ loko'sti na para iti vyavasito janaḥ /
nālaṃ gantumihāśvāsaṃ nāstikyabhayaśaṅkitaiḥ //

yathā sadbhiḥ parādānamahiṃsā dasyubhistathā /
anurajyanti bhūtāni samaryādeṣu dasyuṣu //

ayudhyamānasyādānaṃ dārāmarśaḥ kṛtaghnatā /
brahmavittasya cādānaṃ niḥśeṣakaraṇaṃ tathā //

striyā moṣaḥ pathisthānaṃ sādhuṣveva vigarhitam /
sadoṣa eva bhavati dasyuretāni varjayet //

abhisandadhate ye ca vināśāyāsya bhārata /
saśeṣamevopalabhya kurvantīti viniścayaḥ //

tasmātsaśeṣaṃ kartavyaṃ svādhīnamapi dasyubhiḥ /
na balastho'hamasmīti nṛśaṃsāni samācaret //

saśeṣakāriṇastatra śeṣaṃ paśyanti sarvaśaḥ /
niḥśeṣakāriṇo nityaṃ niḥśeṣakaraṇādbhayam //