Mahabharata · Chapter 12.134

atrāpyudāharantīmamitihāsaṃ purātanam / atra kāmandavacanaṃ kīrtayanti purāvidaḥ /
pratyakṣāveva dharmārthau kṣatriyasya vijānataḥ //

tau tu na vyavadhātavyau parokṣā dharmayātanā /
adharmo dharma ityetadyathā vṛkṣaphalaṃ tathā //

dharmādharmaphale jātu dadarśeha na kaścana /
vubhūṣedbalamevaitatsarvaṃ balavato vaśe //

śriyaṃ balamamātyāṃśca balavāniha vindati /
yo hyanāḍhyaḥ sa patitastaducchiṣṭaṃ yadalpakam //

bahvapathye balavati na kiñcitkriyate bhayāt /
ubhau satyādhikārau tau trāyete mahato bhayāt //

ati dharmādbalaṃ manye balāddharmaḥ pravartate /
bale pratiṣṭhito dharmo dharaṇyāmiva jangamaḥ //

dhūmo vāyoriva vaśe balaṃ dharmo'nuvartate /
anīśvaro balaṃ dharmo drumaṃ vallīva saṃśritā //

vaśe balavatāṃ dharmaḥ sukhaṃ bhogavatāmiva /
nāstyasādhyaṃ balavatāṃ sarvaṃ balavatā jitam //

durācāraḥ kṣīṇabalaḥ parimāṇaṃ na gacchati /
atha tasmādudvijate sarvo loko vṛkādiva //

apadhvasto hyavamato duḥkhaṃ jīvati jīvitam /
jīvitaṃ yadadhikṣiptaṃ yathaiva maraṇaṃ tathā //

yadevamāhuḥ pāpena cāritreṇa vivakṣitam /
subhṛśaṃ tapyate tena vāk्śalyena parikṣataḥ //

atraitadāhurācāryāḥ pāpasya parimokṣaṇe /
trayīṃ vidyāmupāsīta tathopāsīta vai dvijān //

prasādayenmadhurayā vācā cāpyatha karmaṇā /
mahāmanāścaiva bhavedvivahecca mahākule //

ityastīti vadedeva pareṣāṃ kīrtayedguṇān /
japedudakaśīlaḥ syātpeśalo nātijalpakaḥ //

brahma kṣatraṃ sampraviśedbahu kṛtvā suduṣkaram /
ucyamāno hi lokena bahu tattadacintayan //

upaprāpyaivamācāraṃ kṣipraṃ bahumato bhavet /
sukhaṃ ca vittaṃ bhuñjīta vṛttenaikena gopayet //

api tebhyo mṛgānhatvā nayecca satataṃ vane / yasminna pratigṛhṇanti dasyubhojanaśaṅkayā /
loke ca labhate pūjāṃ paratreha mahatphalam //