Mahabharata · Chapter 12.127

tatasteṣāṃ sametānāmṛṣīṇāmṛṣisattamaḥ /
ṛṣabho nāma viprarṣirvismayannidamabravīt //

purā'haṃ rājaśārdūla tīrthānyanucaranprabho /
samāsāditavāndivyaṃ naranārāyaṇāśramam //

yatra sā badarī ramyā saro vaihāyasaṃ tathā /
yatra cāśvaśirā rājanvedānpaṭhati śāśvatān //

tasminsarasi kṛtvā'haṃ vidhivattarpaṇaṃ purā /
pitṛṇāṃ devatānāṃ ca tatośramamiyāṃ tadā //

ramāte yatra tau nityaṃ naranārāyaṇāvṛṣī /
adūrādāśramātkiñcidvāsārthamagamaṃ tadā //

atra cīrājinadharaṃ kṛśamuccamatīva ca /
adrākṣamṛṣimāyāntaṃ tanuṃ nāma taponidhim //

anyairnarairmahābāho vapuṣā'pratimaṃ tadā /
kṛśatā cāpi rājarṣe na dṛṣṭā tādṛśī mayā //

śarīramapi rājendra tanu kāniṣṭhikāsamam /
grīvā bāhū tathā pādau keśāścādbhutadarśanāḥ //

śiraḥ kāyānurūpaṃ ca karṇau netre tathaiva ca /
tasya vākcaiva ceṣṭā ca sāmānye rājasattama //

dṛṣṭvā'haṃ taṃ kṛśaṃ vipraṃ bhītaḥ paramadurmanāḥ /
pādau tasyābhivādyātha sthitaḥ prāñjaliragrataḥ //

nivedya nāmagotre ca tathā kāryaṃ nararṣabha /
pradiṣṭe cāsane tena śanairahamupāviśam //

tataḥ sa kathayāmāsa dharmārthasahitāḥ kathāḥ /
ṛṣimadhye mahārāja tatra dharmabhṛtāṃ varaḥ //

ta--stu kathayatyeva rājā rājīvalocanaḥ /
upayājjavanairaśvaiḥ sabalaḥ sāvarodhanaḥ //

smaramputramaraṇye vai naṣṭaṃ paramadurmanāḥ /
bhūvidyumnapitā śrīmānvīradyumno mahāyaśāḥ //

iha drakṣyāmi taṃ putraṃ drakṣyāmīheti bhārata /
evamāśākṛśo rājā caranvanamidaṃ purā //

durlabhaḥ sa mayā draṣṭuṃ bhūya eva ca dhārmika /
ekaḥ putro mahāraṇye naṣṭa ityasakṛttadā //

na sa śakyo mayā draṣṭumāśā ca mahatī mama /
tayā parītagātro'haṃ mumūrṣurnātra saṃśayaḥ //

etacchrutvā tu bhagavāṃstanurmunivarottamaḥ /
avāk्śirā dhyānaparo muhūrtamiva tasthivān //

tamanudhyāntamālakṣya rājā paramadurmanāḥ /
uvāca vākyaṃ dīnātmā mandamandamivāsakṛt //

durlabhaṃ kinnu devarṣe āśāyāścaiva kiṃ mahat /
bravītu bhagavānetadyadi guhyaṃ na cettadā //
tanuruvāca /

maharṣirbhagavāṃstena pūrvamāsīdvimānitaḥ / bāliśāṃ buddhimāsthāya mandabhāgyatayā'tmanaḥ /
arthayankuśalaṃ rājankāñcanaṃ valkalāni ca //

[avajñāpūrvakenāpi na sampāditavāṃstataḥ.] nirviṇṇaḥ sa tu viprarṣirnirāśaḥ samapadyata //

evamukto'bhivādyātha tamṛṣiṃ lokapūjitam /
śrānto'vasīdaddharmātmā yathā tvaṃ narasattama //

ardhyaṃ tataḥ samānīya pādyaṃ caiva mahāyaśāḥ /
āraṇyenaiva vidhinā rājñe sarvaṃ nyavedayat //

tatastamṛṣayaḥ sarve parivārya nararṣabham /
upāviśanpuraskṛtya saptarṣaya iva dhruvam //

apṛcchaṃścaiva tatrainaṃ rājānamaparājitam /
prayojanamidaṃ sarvamāśramasya praveśane //