Mahabharata · Chapter 12.126

praviśya ca mahāraṇyaṃ tāpasānāmathāśramam /
āsasāda tato rājā śrāntaścopāviśattadā //

taṃ kārmukadharaṃ dṛṣṭvā śramārtaṃ kṣudhitaṃ tadā /
sametya ṛṣayastasmai pūjāṃ cakruryathāvidhi //

sa pūjāmṛṣibhirdattāṃ pratigṛhya narādhipaḥ /
apṛcchattāpasānsarvāṃstapovṛddhimanuttamām //

te tasya rājño vacanaṃ pratigṛhya tapodhanāḥ /
ṛṣayo rājaśārdūlamapṛcchaṃstatprayojanam //

kena bhadramukhārthena tapovanamupāgataḥ /
padātirbaddhanistriṃśo dhanvī bāṇī nareśvara //

etadicchāmahe śrotuṃ kutaḥ prāpto'si mānada /
kasminkule tu jātastvaṃ kinnāmā cāsi brūhi naḥ //

tataḥ sa rājā sarvebhyo dvijebhyaḥ puruṣarṣabha /
ācakhyau tadyathāvṛttaṃ paricaryāṃ ca bhārata //

haihayānāṃ kule jātaḥ sumitro'mitrakarśanaḥ /
carāmi mṛgayūthāni nighranbāṇaiḥ sahasraśaḥ //

balena mahatā brahmansāmātyaḥ sāvarodhakaḥ /
mṛgastu viddho bāṇena mayā sarati śalyavān //

taṃ dravantamanuprāpto vanametadyadṛcchayā /
bhavatsakāśaṃ naṣṭaśrīrhatāśaḥ śramakarśitaḥ //

kinnu duḥkhamato'nyadvai yadahaṃ śramakarśitaḥ /
bhavatāmāśramaṃ prāpto hatāśo bhraṣṭalakṣaṇaḥ //

na rājalakṣaṇatyāgaḥ punarasya tapodhanāḥ /
duḥkhaṃ karoti me tīvraṃ yathā'śā vihatā mama //

himavānvā mahāśailaḥ samudro vā mahodadhiḥ /
mahattvānnānvapadyetāṃ rodasyorantaraṃ yathā //

āśāyāstapasi śreṣṭhāstathā nāntamahaṃ gataḥ /
bhavatāṃ viditaṃ sarvaṃ sarvajñā hi tapodhanāḥ //

bhavantaḥ sumahābhāgāstasmātpṛcchāmi saṃśayam /
āśāvānpuruṣo yaḥ syādantarikṣamathāpi vā //

kinnu jyāyastaraṃ loke mahattve pratibhāti vaḥ /
etadicchāmi tattvena śrotuṃ kimiha durlabham //

yadi guhyaṃ na vo nityaṃ tadā prabrūta mā ciram /
na hi guhyatamaṃ śrotumicchāmi dvijapuṅgavāḥ //

bhavattapovighāto vā yena syādvirame tataḥ /
yadi vā'sti kathāyogo yo'yaṃ praśno mayeritaḥ //

etatkāraṇasāmarthyaṃ śrotumicchāmi tattvataḥ /
bhavanto'pi taponityā brūyuretatsamāhitāḥ //