Mahabharata · Chapter 12.114

vidvānmūḍhapragalbhena mṛdustīkṣṇena bhārata /
ākruśyamānaḥ sadasi kathaṃ kuryādarindam //
bhīṣma uvāca /

śrūyatāṃ pṛthivīpāla yathai'ṣortho'vagamyate /
sadā sacetāḥ sahate narasyehālpacetasaḥ //

ākruśya dūṣyamāṇaśca sukṛtaṃ tasya vindati /
duṣkṛtaṃ cātmano marṣī tasminneva pramārjati //

garhitaṃ tamupekṣeta vāśyamānamivāturam /
loke vidveṣamāpanno niṣphalaṃ pratipadyate //

iti saṃślāghate nityaṃ tena pāpena karmaṇā / idamukto mayā kaścitsarvato janasaṃsadi /
sa tatra vrīḍitaḥ śuṣko mṛtakalpo'vatiṣṭhate //

ślāghannaślāghanīyena karmaṇā nirapatrapaḥ /
upekṣitavyo dāntena tādṛśaḥ puruṣādhamaḥ //

yadyadbrūyādalpamatistattadasya sahettadā //

prakṛtyā hi praśaṃsanvā nindanvā kiṃ kariṣyati /
vane kāka ivābuddhirvāśyamāno nirarthakam //

yadi vāgbhiḥ prayogaḥ syātprayojyaḥ pāpakarmaṇā /
vāgevārtho bhavettasya na hyevārtho jighāṃsataḥ //

niṣekaṃ vai parasyāsāvācaṣṭe vṛttaceṣṭayā /
mayūra iva kaupīnaṃ nṛtyaṃ sandarśayanniva //

yasyāvācyaṃ na loke'sminnākāryaṃ cāpi kiñcana /
vācaṃ tena na sandadhyācchuciḥ saṃśliṣṭakarmaṇā //

pratyakṣaṃ guṇavādī yaḥ parokṣaṃ tu vinindakaḥ /
sa mānavaḥ śvavalloke naṣṭalokaparāyaṇaḥ //

tādṛgdinaśataṃ cāpi yaddadāti juhoti ca /
parokṣeṇāpavādena taṃ nāśayati tatkṣaṇāt //

tasmātprājño naraḥ sadyastādṛśaṃ pāpacetasam /
varjayenmatimānvarjyaṃ sārameyāmiṣaṃ yathā //

parivādaṃ bruvāṇo hi durātmā vai mahājane /
prakāśayati doṣānsvānsarpaḥ phaṇamivonnatam //

taṃ svakarmaṇi kurvāṇaṃ pratikartuṃ ya icchati /
bhasmakūṭa ivābuddhiḥ kharo rajasi majjati //

manuṣyasālāvṛkamapraśāntaṃ janāpavāde satataṃ niviṣṭam /
mātaṅgamunmattamivonnadantaṃ tyajeta taṃ śvānamivātiraudram //

anāryajuṣṭe pathi vartamānaṃ damādapetaṃ vinayācca pāpam /
arivrataṃ nityamabhūtikāmaṃ dhigastu taṃ pāpamatiṃ manuṣyam //

pratyucyamānastvatha bhūya eva niśāmya mābhūstvamathārtarūpaḥ /
uccasya nīcena hi samprayogaṃ vigarhayanti sthirabuddhayo ye //

kruddho daśedvā'pi ca tāḍayedvā sa pāṃsubhirvā vikirettuṣairvā /
vivṛtya dantāṃśca vibhīṣayedvā siddhaṃ hi mūḍhe kupite nṛśaṃse //

vigarhaṇāṃ nā'pi durātmanā kṛtāṃ saheta yaḥ saṃsadi durjanānām /
paṭhedidaṃ cāpi nidarśanaṃ sadā na vāṅbhayaṃ sa labhati kiñcidapriyam //