Mahabharata · Chapter 12.11

atraivodāharantīmamitihāsaṃ purātanam /
tāpasaiḥ saha saṃvādaṃ śakrasya bharatarṣabha //

śakyaṃ punararaṇyeṣu sukhametena jīvitum / kecidgṛhānparityajya vanamabhyāgamandvijāḥ /
ajātaśmaśravo mandāḥ kule jātāḥ pravavrajuḥ //

dharmo'yamiti manvānāḥ samṛddhā dharmacāriṇaḥ /
tyaktvā bhrātṝnpitṝṃścaiva tānindro'nvakṛpāyata //

sa tānbabhāṣe maghavānpakṣībhūtvā hiraṇmayaḥ /
suduṣkaraṃ manuṣyaistu yatkṛtaṃ vighasāśibhiḥ //

puṇyaṃ bhavati karmaiṣāṃ praśastaṃ caiva jīvitam /
siddhārthāste gatiṃ mukhyāṃ prāptāḥ karmaparāyaṇāḥ //
ṛṣaya ūcuḥ /

aho batāyaṃ śakunirvighasāśānpraśaṃsati /
asmānnūnamayaṃ śāsti vayaṃ ca vighasāśinaḥ //
śakuniruvāca /

nāhaṃ yuṣmānpraśaṃsāmi paṅkadigdhānrajasvalān /
ucchiṣṭabhojino mandānanye vai vighasāśinaḥ //
ṛṣaya ūcuḥ /

idaṃ śreyaḥ paramiti vayamevamamaṃsmahi /
śakune brūhi yacchreyo vayaṃ te śraddadhāmahe //
śakuniruvāca /

yadi māṃ nābhiśaṅkadhvaṃ vibhajyātmānamātmanā /
tato'haṃ vaḥ pravakṣyāmi yāthātathyaṃ hitaṃ vacaḥ //
ṛṣaya ūcuḥ /

śṛṇumaste vacastāta panthāno viditāstava /
niyoge caiva dharmātmansthātumicchāma śādhi naḥ //
śakuniruvāca /

catuṣpadāṃ gauḥ pravarā lohānāṃ kāñcanaṃ varam /
śabdānāṃ pravaro mantro brāhmaṇo dvipadāṃ varaḥ //

mantro'yaṃ jātakarmādirbrāhmaṇasya vidhīyate /
jīvato'pi yathākālaṃ śmaśānanidhanāntakaḥ //

karmāṇi vaidikānyasya svargyaḥ panthāstvanuttamaḥ / atha sarvāṇi karmāṇi mantrasiddhāni cakṣate /
āmnāyadṛḍhavādīni tathā siddhiriheṣyate //

māsārdhamāsā ṛtava ādityaśaśitārakam /
grasante karma bhūtāni tadidaṃ karmaśaṃsinām //

siddhikṣetramidaṃ puṇyamayamevāśramo mahān //

atha ye karma nindanto manuṣyāḥ kāpathaṃ gatāḥ /
mūḍhānāmarthahīnānāṃ teṣāmenastu vidyate //

devavaṃśānpitṛvaṃśānbrahmavaṃśāṃśca śāścatān /
santyajya mūḍhā vartante tato yāntyaśucīnpathaḥ //

etadvo'stu tapoyuktaṃ dadāmītyṛṣicoditam /
tasmāttadadhyāvasatastapasvitvamihocyate //

devavaṃśānbrahmavaṃśānpitṛvaṃśāṃśca śāśvatān /
saṃvibhajya guroścaryāṃ tadvai duṣkaramucyate //

devā vai duṣkaraṃ kṛtvā vibhūtiṃ paramāṃ gatāḥ /
tasmādgārhasthyamudvoḍhuṃ duṣkaraṃ prabravīmi vaḥ //

tapaḥ śreṣṭhaṃ prajānāṃ hi mūlametanna saṃśayaḥ /
kuṭumvavidhinā'nena yasminsarvaṃ pratiṣṭhitam //

etadvidustapo viprā dvandvātītā vimatsarāḥ /
etasmādvanamadhye tu lokeṣu tapa ucyate //

durādharṣaṃ padaṃ caiva gacchanti vighasāśinaḥ /
sāyamprātarvibhajyānnaṃ svakuṭumbe yathāvidhi //

dattvā'tithibhyo devebhyaḥ pitṛbhyaḥ svajanāya ca /
avaśiṣṭāni ye'śnanti tānāhurvighasāśinaḥ //

tasmātsvadharmamāsthāya suvratāḥ satyavādinaḥ /
lokasya guravo bhūtvā te bhavantyanupaskṛtāḥ //

tridivaṃ prāpya śakrasya svargaloke vimatsarāḥ /
vasanti śāśvatānvarṣāñjanā duṣkarakāriṇaḥ //
arjuna uvāca /

tataste tadvacaḥ śrutvā dharmārthasahitaṃ hitam /
utsṛjya nāstikamatiṃ gārhasthyaṃ dharmamāśritāḥ //

tasmāttvamapi sarvajña dhairyamālambya śāśvatam /
praśādhi pṛthivīṃ kṛtsnāṃ hatāmitrāṃ narottama //