Mahabharata · Chapter 12.10

śrotriyasyeva te rājanmandakasyāvipaścitaḥ /
anuvākahatā buddhirnaiṣā tattvārthadarśinī //

ālasye kṛtacittasya rājadharmānasūyataḥ /
vināśe dhārtarāṣṭrāṇāṃ kiṃ phalaṃ bharatarṣabha //

kṣamā'nukampā kāruṇyamānṛśaṃsyaṃ na vidyate /
kṣātramācarato mārgamapi bandhostvadantare //

yadīmāṃ bhavato buddhiṃ vidyāma vayamīdṛśīm /
śastraṃ naiva grahīṣyāmo na vadhiṣyāma kañcana //

bhaikṣamevācariṣyāma śarīrasyāvimokṣaṇāt /
na cedaṃ dāruṇaṃ yuddhamabhaviṣyanmahīkṣitām //

prāṇasyānnamidaṃ sarvamiti vai kavayo viduḥ /
sthāvaraṃ jaṅgamaṃ caiva sarvaṃ prāṇasya bhojanam //

ādadānasya cedrājyaṃ ye kecitparipanthinaḥ /
hantavyāsta iti prājñāḥ kṣatradharmavido viduḥ //

te sadoṣā hatā'smābhirannasya paripanthinaḥ /
tānhatvā bhuṅkṣva dharmeṇa yudhiṣṭhira mahīmimām //

yathā hi puruṣaḥ khātvā kūpamaprāpya codakam /
paṅkadigdho nivartet karmedaṃ nastathopamam //

yathā'ruhya mahāvṛkṣamapahṛtya tato madhu /
aprāśya nidhanaṃ gacchetkarmedaṃ nastathopamam //

yathā mahāntamadhvānamāśayā puruṣaḥ patan /
sa nirāśo nivarteta karmaitannastathopamam //

yathā śatrūnghātayitvā puruṣaḥ kurunandana /
ātmānaṃ ghātayetpaścātkarmedaṃ nastathopamam //

yathānnaṃ kṣudhito labdhvā na bhuñjīyādyadṛcchayā /
kāmī ca kāminīṃ labdhvā karmedaṃ nastathopamam //

vayamevātra garhyā hi yadvayaṃ mandacetasam /
tvāṃ rājannanugacchāmo jyeṣṭho'yamiti bhārata //

vayaṃ hi bāhubalinaḥ kṛtavidyā manasvinaḥ /
klībasya vākye tiṣṭhāmo yathaivāśaktayastathā //

agatīkagatīnasmānnaṣṭārthanarthasiddhaye /
kathaṃ vai nānupaśyeyurjanāḥ paśyata yādṛśam //

āpatkāle hi sannyāsaḥ kartavya iti śiṣyate /
jarayā'bhiparītena śatrubhirvyaṃsitena vā //

tasmādiha kṛtaprajñāstyāgaṃ na paricakṣate /
dharmavyatikramaṃ caiva manyante sūkṣmadarśinaḥ //

kathaṃ tasmātsamutpannāstanniṣṭhāstadupāśrayāḥ /
tadeva nindāṃ bhāṣeyurdhātā tatra na garhyate //

śriyā vihīnairadhanairnāstikaiḥ sampravartitam /
vedavādasya vijñānaṃ satyābhāsamivānṛt //

śakyaṃ tu maunamāsthāya bibhratā'tmānamātmanā / dharmacchajha samāsthāya cyavituṃ na tu jīvitum /

śakyaṃ punararaṇyeṣu sukhamekena jīvitum /
abibhratā putrapautrāndevarṣīnatithīnpitṝn //

neme mṛgāḥ svargajito na varāhā na pakṣiṇaḥ /
athānyena prakāreṇa puṇyamāhurna te janāḥ //

yadi sannyāsataḥ siddhiṃ rājā kaścidavāpnuyāt /
parvatāśca dumāścaiva kṣiptaṃ siddhimavāpnuyuḥ //

ete hi nityasannyāsā dṛśyante nirupadravāḥ /
aparigrahavantaśca satataṃ brahmacāriṇaḥ //

atha cedātmabhāgyeṣu nānyeṣāṃ siddhimaśrnute /
tasmātkarmaiva kartavyaṃ nāsti siddhirakarmaṇaḥ //

audakāḥ sṛṣṭayaścaiva jantavaḥ siddhimāpnuyuḥ /
teṣāmātmaiva bhartavyo nānyaḥ kaścana vidyate //

avekṣasva yathā svaiḥ karmabhirvyāpṛtaṃ jagat /
tasmātkarmaiva kartavyaṃ nprasti siddhirakarmaṇaḥ //