Mahabharata · Chapter 12.107

brāhmaṇakṣatriyaviśāṃ śūdrāṇāṃ ca parantapa /
dharmavṛttaṃ ca vittaṃ ca vṛttyupāyāḥ phalāni ca //

rājñāṃ vṛttaṃ ca kośaṃ ca kośasañcayanaṃ jayaḥ /
amātyaguṇavṛttiśca prakṛtīnāṃ ca vardhanam //

ṣāṅguṇyaguṇakalpaśca senānītistathaiva ca /
duṣṭasya ca parijñānamaduṣṭasya ca lakṣaṇam //

samahīnādhikānāṃ ca yathāvallakṣaṇaṃ ca yat /
madhyamasya ca tuṣṭyarthaṃ yathā stheyaṃ vivardhatā //

kṣīṇagrahaṇavṛttiśca yathā dharmaṃ prakīrtitam /
laghunā'deśarūpeṇa granthayogena bhārata //

vijigīṣostathā vṛttamuktaṃ caiva tathaiva te /
gaṇānāṃ vṛttimicchāmi śrotuṃ matimatāṃ vara //

yathā gaṇāḥ pravardhante na bhidyante ca bhārata /
arīṃśca vijigīṣante suhṛdaḥ prāpnuvanti ca //

bhedamūlo vināśo hi gaṇānāmupalakṣaye /
mantrasaṃvaraṇaṃ duḥkhaṃ bahūnāmiti me matiḥ //

etadicchāmyahaṃ śrotuṃ nikhilena parantapa /
yathā ca te na bhidyeraṃstacca me vada bhārata //
bhīṣma uvāca /

gaṇānāṃ ca kulānāṃ ca rājñāṃ bharatasattama /
vairasandīpanāvetau lobhāmarṣau narādhipa //

lobhameko hi vṛṇute tato'marṣamanantaram /
tato hyamarṣasaṃyuktāvanyonyajanitāśayau //

cāramantrabalādānaiḥ sāmadānavibhedanaiḥ /
kṣayavyayabhayopāyaiḥ prakarṣantītaretaram //

tatrādānena bhidyante gaṇāḥ sanghātavṛttayaḥ /
bhinnā vimanasaḥ sarve gacchantyarivaśaṃ bhayāt //

bhede gaṇā vinaśyurhi bhinnāstu sujayāḥ paraiḥ /
tasmātsanghātayogena prayaterangaṇāḥ sadā //

arthāścaivādhigamyante sanghātabalapauruṣaiḥ /
brāhmāśca maitrīṃ kurvanti teṣu sanghātavṛttiṣu //

jñānavṛddhāḥ praśaṃsanti śuśrūṣantaḥ parasparam /
vinivṛttābhisandhānāḥ sukhamedhanti sarvaśaḥ //

dharmiṣṭhānvyavahārāṃśca sthāpayantaśca śāstrataḥ /
yathāvatpratipaśyanto vivardhante gaṇottamāḥ //

putrānbhrātṛnnigṛhṇanto vinayantaśca tānsadā /
vinītāṃśca pragṛhṇanto vivardhante gaṇottamāḥ //

cāramantravidhāneṣu kośasannicayeṣu ca /
nityayuktā mahābāho vardhante sarvato gaṇāḥ //

prājñāṃścārānmahotsāhānkarmasu sthirapauruṣān /
mānayantaḥ sadā yuktā vivardhante gaṇā nṛpa //

dravyavantaśca śūrāśca śastrajñāḥ śāstrapāragāḥ /
kṛcchrāsvāpatsu sammūḍhāngaṇāḥ santārayanti te //

krodho bhedo bhayaṃ daṇḍaḥ karṣaṇaṃ nigraho vadhaḥ /
nayatyarivaśaṃ sadyo gaṇānbharatasattama //

tasmānmānayitavyāste gaṇamukhyāḥ pradhānataḥ /
lokayātrā samāyattā bhūyasī teṣu pārthiva //

mantraguptiḥ pradhāneṣu cāraścāmitrakarśaṇa /
na gaṇāḥ kṛtsnaśo mantraṃ śrotumarhanti bhārata //

gaṇamukhyaistu sambhūya kāryaṃ gaṇahitaṃ mithaḥ //

pṛthaggaṇasya bhinnasya vitatasya tato'nyathā /
arthāḥ pratyavasīdanti tathā'narthā bhavanti va //

teṣāmanyonyabhinnānāṃ svaśaktimanutiṣṭhatām /
nigrahaḥ paṇḍitaiḥ kāryaḥ kṣiprameva pradhānataḥ //

kuleṣu kalahā jātāḥ kulavṛddhairupekṣitāḥ /
gotrasya nāśaṃ kurvanti gaṇabhedasya kārakam //

ābhyantaraṃ bhayaṃ rakṣyamasāraṃ bāhyato bhayam /
ābhyantaraṃ bhayaṃ rājansadyo mūlāni kṛntati //

akasmātkrodhamohābhyāṃ lobhādvā'pi svabhāvajāt /
anyonyaṃ nābhibhāṣante tatparābhavalakṣaṇam //

jātyā ca sadṛśāḥ sarve kulena sadṛśāstatha /
na codyogena buddhyā vā rūpadravyeṇa vā punaḥ //

bhedāccaiva pradānācca nāmyante ripubhirgaṇāḥ /
tasmātsanghātamevāhurgaṇānāṃ śaraṇaṃ mahat //