Mahabharata · Chapter 12.105

atha cetpauruṣaṃ kiñcitkṣatriyātmani paśyasi /
bravīmyahaṃ tu te nītiṃ rājyasya pratipattaye //

tāṃ cacchakṣyasyanuṣṭhātuṃ karma caiva kariṣyasi /
śṛṇu sarvamaśeṣeṇa yatte vakṣyāmi tattvataḥ //

ācariṣyasi cetkarma mahato'rthānavāpsyasi / rājyaṃ vā rājyamantraṃ vā mahatīṃ vā punaḥ śriyam /
yadyetadrocate rājanpunarbrūhi bravīmi te //
rājovāca /

bravītu bhagavānnītimabhipanno'smyadhīhi bho /
amogha eva me'dyāstu tvayā saha samāgamaḥ //
muniruvāca /

hitvā mānaṃ ca dambhaṃ ca krodhaṃ harṣa bhayaṃ tathā / pratyamitrāṇi sevasva praṇipatya kṛtāñjaliḥ /
tamuttamena śaucena karmaṇā cāvadhāraya //

dātumarhati te vittaṃ vaidehaḥ satyavikramaḥ /
pramāṇaṃ sarvabhūteṣu pragrahaṃ ca gamiṣyasi //

tataḥ sahāyānsotsāhām̐llapsyase'vyasanāñśucīn / vartamānaḥ svaśāstre vai saṃyatātmā jitendriyaḥ /
abhyuddharati cātmānaṃ prasādayati ca prajāḥ //

tenaiva tvaṃ dhṛtimatā śrīmatā cāpi satkṛtaḥ /
pramāṇaṃ sarvabhūteṣu gatvā ca grahaṇaṃ mahat //

tataḥ suhṛdbalaṃ labdhvā mantrayitvā sumantritam / sāntvena bhedayitvā'rīnbilvaṃ bilvena śātaya /
parairvā saṃvidaṃ kṛtvā balamapyasya ghātaya //

alabhyā ye śubhā bhāvāḥ striyaścācchādanāni ca /
śayyāsanāni yānāni mahārhāṇi gṛhāṇi ca //

pakṣiṇo mṛgajātāni rasagandhāḥ phalāni ca /
teṣveva sajjayethāstvaṃ yathā naśyetsvayaṃ paraḥ //

yadyevaṃ pratiṣeddhavyo yadyupekṣaṇamarhati / sadaiva rājaśārdūla viduṣā hitamicchatā /
na jātu vivṛtaḥ kāryaḥ śatruḥ sunayamicchatā //

vasasva puramāmitraṃ viṣaye mitrasammataḥ /
bhajasva śvetakākīyairmitradharmamanathaikaiḥ //

ārambhāṃścāsya mahato duṣkarānsamprayojaya /
nadībandhavibhedāṃśca balavadbhirvirudhyatām //

udyānāni mahārhāṇi śayanānyāsanāni ca /
prītibhogamukhenaiva kośamasya virocaya //

yajñadāne praśaṃsāsmai brāhmaṇānanuvartaya /
te tvā priyaṃ kariṣyanti tacchetsyanti vṛkā iva //

asaṃśayaṃ puṇyaśīlāḥ prāpnoti paramāṃ gatim /
triviṣṭape puṇyatamaṃ sthānaṃ prāpnoti śāśvatam //

kośakṣaye tvamitrāṇāṃ vaśaṃ kausalya gacchati /
ubhayatra prayuktasya dharme cādharma eva ca //

phalārthamūlamucchidyāttena nandanti śatravaḥ /
na cāsmai mānuṣaṃ karma daivaprasyopavarṇaya //

asaṃśayaṃ daivaparaḥ kṣiprameva vinaśyati /
yājayainaṃ viśvajitā sarvasvena viyujyatām //

tato gacchatyasiddhārthaḥ pīḍayāno mahājanam /
tyāgadharmavidaṃ puṇyaṃ kañcidasyopavarṇaya //

api tyāgaṃ bubhūṣeta kaccidgacchedanāmayam / siddhenauṣadhiyogena sarvaśatruvināśinā /
gajānaśvānmanuṣyāṃśca kṛtakairupaghātaya //

ete cānye ca bahavo dambhayogāḥ sucintitāḥ /
śakyā vipahatā kartuṃ na klībena nṛpātmaja //