Mahabharata · Chapter 12.101

kiṃśīlāḥ kiṃsamutthānāḥ kathaṃrūpāśca bhārata /
kiṃsannāhāḥ kathaṃśastrā janāḥ syuḥ saṃyuge nṛpāḥ //
bhīṣma uvāca /

yathācaritamevātra śastraṃ patraṃ vidhīyate /
ācārāddhīha puruṣastathā karmasu vartate //

gāndhārāḥ sindhusauvīrā nakharaprāsayodhinaḥ /
abhīravaḥ subalinastadvalaṃ sarvapāragam //

sarvaśastreṣu kuśalāḥ satvavanto hyuśīnarāḥ /
prācyā mātaṅgayuddheṣu kuśalāḥ kūṭayodhinaḥ //

tathā yavanakāmbhojā madhurāmabhitaśca ye / ete'śvayuddhakuśalā dākṣiṇātyā'sicarmiṇaḥ /
sarvatra śūrā jāyante mahāsatvā mahābalāḥ //

āvantikā mahāśūrāścaturaṅge ca mālavāḥ /
eko'pi hi sahasrasya tiṣṭhatyabhimukho raṇe //

prāyo deśāḥ samuddiṣṭā lakṣaṇāni tu me śṛṇu //

siṃhaśārdūlavāṅgetrāḥ siṃhaśārdūlagāminaḥ / pārāvatakuliṅgākṣāḥ sarve śūrāḥ pramāthinaḥ /

mṛgasvarā dvīpinetrā ṛṣabhākṣāstathā pare /
pramāthinaśca mandrāśca krodhanāḥ kiṅkiṇīsvanāḥ //

meghasvanāḥ krūramukhāḥ kecicca kalanisvanāḥ /
jihmanāsāgrajihvāśca dūragā dūrapātinaḥ //

biḍālakubjāḥ stabdhākṣāstanukeśāstanutvacaḥ /
śīghrāścapalacittāśca te bhavanti durāsadāḥ //

gaurā nimīlitāḥ kecinmṛduprakṛtayastathā /
turaṅgagatinirghoṣāste narāḥ pārayiṣṇavaḥ //

susaṃhatāḥ pratanavo vyūḍhoraskāḥ susaṃsthitāḥ /
pravāditeṣu kupyanti hṛṣyanti kaladdeṣu ca //

gambhīrākṣā nisṛṣṭākṣāḥ piṅgākṣā bhrukuṭīmukhāḥ /
nakulākṣāstathā caiva sarve śūrāstanutyajaḥ //

jihnākṣāḥ pralalāṭāśca nirmāṃsahanavo'vyathāḥ /
vakrabāhvaṅgulīsakthāḥ kṛśā dhamanisantatāḥ //

praviśanti ca vegena sāmparāye hyupasthite /
vāraṇā iva sammattāste bhavanti durāsadāḥ //

dīptasphuṭitakeśāntāḥ sthūlapārśvahanūmukhāḥ /
unnatāṃsāḥ pṛthugrīvā vikaṭāḥ sthūlapiṇḍikāḥ //

udbandhā iva sugrīvā vinatāvihagā iva /
piṇḍaśīrṣātivakrāśca pṛṣadaṃśamukhāstathā //

agrasvarā manyumanto yuddheṣvārāvasāriṇaḥ /
adharmajñā'valiptāśca ghorā raudrapradarśanāḥ //

tyaktātmānaḥ sarva ete udagrā hyanivartinaḥ /
puraskāryāḥ sadā sainye hanyante ghnanti cāpi te //

adhārmikā bhinnavṛttāḥ sāntvenaiṣāṃ parābhavaḥ /
evameva pradūṣyante rājño'pyete hyabhīkṣṇaśaḥ //