Mahabharata · Chapter 11.9

gate vyāse tu dharmātmā dhṛtarāṣṭro mahīpatiḥ /
kimaceṣṭata viprarṣe tanme vyākhyātumarhasi //
vaiśampāyana uvāca /

etacchrutvā naraśreṣṭhaściraṃ dhyātvā tvacetanaḥ /
sañjayaṃ yojayetyuktvā viduraṃ pratyabhāṣata //

kṣipramānaya gāndhārīṃ sarvāśca bharatastriyaḥ /
kuntīṃ caiva tathā kṣattaḥ samānaya mamā'ntikam //

evamuktvā sa dharmātmā viduraṃ dharmavittamam /
śokaviprahatajñāno yānamevānvarohata //

gāndhārī putraśokārtā bharturvacananoditā /
saha kuntyā yato rājā saha strībhirupādravat //

tāḥ samāsādya rājānaṃ bhṛśaṃ śokasamanvitāḥ /
āmantryānyonyamāyastā bhṛśamuccukruśustataḥ //

tāḥ samāśvāsayatkṣattā tābhyaścārtataraḥ svayam /
aśrukaṇṭhīḥ samāropya tato'sau niryayau purāt //

tataḥ praṇādaḥ sañjajñe sarveṣu kuruveśmasu /
ākumāraṃ puraṃ sarvamabhavacchokakarśitam //

adṛṣṭapūrvā yā nāryaḥ purā devagaṇairapi /
pṛthagjanena dṛśyante tāstadā nihateśvarāḥ //

prakīrya keśānsuśubhānbhūṣaṇānyavamucya ca /
ekavastradharā nāryaḥ paripeturanāthavat //

śvateparvatarūpebhyo gṛhebhyastā nirākraman /
guhābhya iva śailānāṃ pṛṣatyo hatayūthapāḥ //

tānyudīrṇāni nārīṇāṃ tadā vṛndānyanekaśaḥ /
śokārtānyadravanrājankiśorīṇāmivāṅgaṇe //

pragṛhya bāhūnkrośantyaḥ putrānbhrātṝnpitṝnapi /
darśayanti hatā hi sma yugānte lokasaṅkṣayam //

vilapantyo rudantyaśca dhāvamānāstatastataḥ /
śokenopahatajñātāḥ kartavyaṃ na prajajñire //

vrīḍāṃ jagmuḥ purā yāḥ sma sakhīnāmapi yoṣitaḥ /
tā ekavastrā nirlajjāḥ śvaśrūṇāṃ purato'bhavan //

parasparaṃ susūkṣmeṣu śokeṣvāśvāsayanti yāḥ /
tāḥ śokavihvalā rājannavaikṣanta parasparam //

tābhiḥ parivṛto rājā rudatībhiḥ sahasraśaḥ /
niryayau nagarāddīnastūrṇamāyodhanaṃ prati //

śilpino vaṇijo vaiśyāḥ sarve karmopajīvinaḥ /
te pārthivaṃ puraskṛtya niryayurnagarādbahiḥ //

teṣāṃ vikrośamānānāmārtānāṃ kurusaṅkṣaye /
prādurāsīnmahāñśabdo vyathayanbhuvanānyuta //

yugāntakāle samprāpte bhūtānāṃ dahyatāmiva /
abhāvasyodayaḥ prāpta iti bhūtāni menire //

bhṛśamudvignamanasaste paurāḥ kurusaṅkṣaye /
prākrośanta mahārāja svanuraktāstadā bhṛśam //

vidurasya tu tadvākyaṃ śrutvā tu puruṣarṣabhaḥ /
yujyatāṃ yānamityuktvā punarvacanamavravīt //
dhṛtarāṣṭra uvāca /

śīghramānaya gāndhārīṃ sarvāśca bharatastriyaḥ /
vadhūṃ kuntīmupādāya yāścānyāstatra yoṣitaḥ //