Mahabharata · Chapter 11.10

krośamātraṃ tato gatvā dadṛśustānmahārathān /
śāradvataṃ kṛpaṃ drauṇiṃ kṛtavarmāṇameva ca //

te tu dṛṣṭvaiva rājānaṃ prajñācakṣuṣamīśvaram /
aśrukaṇṭhā viniḥśvasya rudantamidamabruvan //

putrastava mahārāja kṛtvā karma suduṣkaram /
gataḥ sānucaro rājañśakralokaṃ mahīpate //

duryodhanabalānmuktā vayameva trayo rathāḥ /
sarvamanyatparikṣīṇaṃ sainyaṃ te bharatarṣabha //

ityevamuktvā rājānaṃ kṛpaḥ śāradvatastataḥ /
gāndhārīṃ putraśokārtāmidaṃ vacanamabravīt //

abhītā yudhyamānāste ghnantaḥ śatrugaṇānbahūn /
vīrakarmāṇi kurvāṇāḥ putrāste nidhanaṃ gatāḥ //

dhravaṃ samprāpya lokāṃste nirmalāñśastranirjitān /
bhāsvaraṃ dehamāsthāya viharantyamarā iva //

sarve hyabhimukhā rājñi yudhyamānā hatā yudhi / na hi kaściddhi śūrāṇāṃ yudhyamānaḥ parāṅmukhaḥ /
śastreṇa nidhanaṃ prāpto na ca kaścitkṛtāñjaliḥ //

etāṃ tāṃ kṣatriyasyāhuḥ purāṇāḥ paramāṃ gatim /
śastreṇa nidhanaṃ saṅkhye tānna śocitumarhasi //

na cāpi śatravasteṣāṃ mucyante rājñi pāṇḍavāḥ /
śṛṇu yatkṛtamasmābhiraśvatthāmapurogamaiḥ //

adharmeṇa hataṃ śrutvā bhīmasenena te sutam /
suptaṃ śibiramāsādya pāṇḍūnāṃ kadanaṃ kṛtam //

pāñcālā nihatāḥ sarve dhṛṣṭadyumnapurogamāḥ /
drupadasyātmajāścaiva draupadeyāśca pātitāḥ //

tathā viśasanaṃ kṛtvā putraśatrugaṇasya te /
prādravāma raṇe sthātuṃ na hi śakṣyāmahe trayaḥ //

te hi śūrā maheṣvāsāḥ kṣiprameṣyanti pāṇḍavāḥ /
amarṣavaśamāpannā vairaṃ pratijihīrṣavaḥ //

te hatānātmajāñśrutvā pramattāḥ puruṣarṣabhāḥ /
anviṣyantaḥ padaṃ śūrāḥ kṣiprameṣyanti pāṇḍavāḥ //

teṣāṃ tu kilbiṣaṃ kṛtvā saṃsthātuṃ notsahāmahe /
anujānīhi no rājñi mā ca śoke manaḥ kṛthāḥ //

rājaṃstvamanujānīhi dhairyamātiṣṭha cottamam /
diṣṭāntaṃ paśya cāpi tvaṃ kṣātraṃ dharmaṃ ca kevalam //

ityevamuktvā rājānaṃ kṛtvā cābhipradakṣiṇam /
kṛpaśca kṛtavarmā ca dromaputraśca bhārata //

avekṣamāṇā rājānaṃ dhṛtarāṣṭraṃ manīṣiṇam /
gaṅgāmanu mahārāja tūrṇamaśvānacodayan //

apakramya tu te rājansarva eva mahārathāḥ /
āmantryānyonyamudvignāstridhā te prayayustadā //

jagāma hāstinapuraṃ kṛpaḥ śāradvatastadā /
svameva rāṣṭraṃ hārdikyo drauṇirvyāsāśramaṃ yayau //

evaṃ te prayayurvīrā vīkṣamāṇāḥ parasparam /
bhayārtāḥ pāṇḍuputrāṇāmāgaskṛtvā mahātmanām //

sametya vīrā rājānaṃ tadā tvanudite raṣau /
viprajagmurmahātmāno yatheṣṭakamarindamāḥ //

[samāsādyātha vai drauṇiṃ pāṇḍuputrā mahārathāḥ / vyajayaṃste raṇe rājanvikramya tadanantaram // ] //