Mahabharata · Chapter 11.6

aho khalu mahadduḥkhaṃ kṛcchravāsaṃ vasatyasau /
kathaṃ tasya ratistatra tuṣṭirvā vadatāṃ vara //

sa deśaḥ kvanu yatrāsau vasate dharmasaṅkaṭe /
kathaṃ vā sa vimucyeta narastasmānmahābhayāt //

etanme sarvamācakṣva sādhu ceṣṭāmahe tadā /
kṛpā me mahatī jātā tasyābhyuddharaṇena hi //
vidura uvāca /

upākhyānamidaṃ rājanmokṣavidbhirudāhṛtam /
sugatiṃ vindate yena paralokeṣu mānavaḥ //

ucyate yattu kāntāraṃ mahāsaṃsāra eva saḥ /
vanaṃ durgaṃ hi yaccaitatsaṃsāragahanaṃ hi tat //

ye ca te kathitā vyālā vyādhayaste prakīrtitāḥ //

yā sā nārī bṛhatkāyā adhyatiṣṭhata tatra vai /
tāmāhustu jarāṃ prājñā rūpavarṇavināśinīm //

sa yastu kūpo nṛpate sa tu dehaḥ śarīriṇām / yastatra vasate'dhastānmahāhiḥ kāla eva saḥ /
antakaḥ sarvabhūtānāṃ dehināṃ prāṇāhāryasau //

kūpamadhye ca yā jātā vallī yatra sa mānavaḥ /
proto yayā'bhavallagno jīvitāśā śarīriṇām //

sa yastu kūpapīnāhe taṃ vṛkṣaṃ parisarpati /
ṣaḍvaktraḥ kuñjaro rājansa tu saṃvatsaraḥ smṛtaḥ //

mukhāni ṛtavo māsāḥ pādā dvādaśā kīrtitāḥ /
ye tu vṛnkṣaṃ nikṛntanti mūṣikāḥ pannagāstathā //

rātryahāni tu tānyāhurbhūtānāṃ paricintakāḥ /
ye te madhukarāstatra kāmāste parikīrtitāḥ //

yāstu tā bahuśo dhārāḥ sravanti madhunisravam /
tāṃstu kāmarasānvindyādyatra sajjanti mānavāḥ //

evaṃ saṃsāracakrasya parivṛttiṃ vidurbudhāḥ /
yena saṃsāracakrasya pāśāṃśchindanti sarvathā //