Mahabharata · Chapter 11.5

yadidaṃ dharmagahanaṃ buddhyā samanubudhyate /
etadvistarataḥ sarvaṃ buddhimārgaṃ praśaṃsa me //
vidura uvāca /

atra te sarvayiṣyāmi namaskṛtvā svayambhuve /
yathā saṃsāragahanaṃ vadanti paramarṣayaḥ //

kaścinmahati kāntāre vartamāno dvijaḥ kila //
mahaddurgamanuprāpto vanaṃ kravyādasaṅkulam //

siṃhavyāghragajarkṣaughairatighoramahāsvanaiḥ /
piśitādairatibhayairmahogrākṛtibhistathā //

samantātsamparikṣiptaṃ yasmāddraṣṭurmahadbhayam /
tadasya dṛṣṭvā hṛdayamudvegamagamatparam //

abhyucchrayanti ramāṇi vikriyāśca parantapa /
sa tadvanaṃ vyanusaransampradhāvannitastataḥ //

vīkṣamāṇo diśaḥ sarvāḥ śaraṇaṃ kva bhavediti / sa teṣāṃ nāśamanvicchanpradruto bhayapīḍitaḥ /
na ca niryāti vai dūraṃ na vā tairviprayujyate //

athāpaśyadvanaṃ gūḍhaṃ samantādvāgurāvṛtam /
bāhubhyāṃ sampariṣvaktaḥ striyā paramaghorayā //

pañcaśīrṣadharairnāgaiḥ śailairiva samunnataiḥ /
nabhaḥspṛśairmahāvṛkṣaiḥ parikṣiptaṃ mahāvanam //

vanamadhye ca tatrābhūdudapānaḥ samāvṛtaḥ /
vallībhistṛṇanaddhābhirgūḍhābhirabhisaṃvṛtaḥ //

papāta sa dvijastatra nigūḍhe salilāśaye /
vilagnaścābhavattasmim̐llatāsantānasaṅkule //

panasasya yathā jātaṃ vṛntabaddhaṃ mahāphalam /
sa tathā lambate tatra hyūrdhvapādo hyadhaḥ śirāḥ //

atha tatrāpi cānyo'sya bhūyo jāta upadravaḥ /
kūpamadhye mahānāgamapaśyata mahābalam //

kūpapīnāhavelāyāmapaśyat mahāgajam //

ṣaḍvaktraṃ kṛṣṇaśabalaṃ dviṣaṭkapadacāriṇam /
krameṇa parisarpantaṃ vallīvṛkṣasamāvṛtam //

tasya śākhāpraśākhāsu vṛkṣaśākhāvalambinaḥ /
nānārūpā madhukarā ghorarūpā bhayāvahāḥ //

āsate madhu saṃvṛtya pūrvameva niketajāḥ /
bhūyobhūyaḥ samīhante madhūni bharatarṣabha //

svādanīyāni bhūtānāṃ yairbālo na vitṛpyate /
teṣāṃ madhūnāṃ bahudhā dhārā prasravate tadā //

ālambamānaḥ sa pumāndhārāṃ pibati sarvadā /
na cāsya tṛṣṇā viratā pibamānasya saṅkaṭe //

abhīpsati ca tāṃ nityamatṛptaḥ sa punaḥ punaḥ /
na cāsya jīvite rājannirvedaḥ samajāyata //

tatraiva ca manuṣyasya jīvitāśā pratiṣṭhitā /
kṛṣṇāḥ śvetāśca taṃ vṛkṣaṃ nikṛntanti sma mūṣikāḥ //

vyālaiśca tadvanaṃ durgaṃ striyā ca paramograyā /
kūpādhastācca nāgena pīnāhe kuñjareṇa ca //

vṛkṣaprapātācca bhayaṃ mūṣikebhyaśca pañcamam /
madhulobhānmadhukaraiḥ ṣaṣṭhamāhurmahadbhayam //

evaṃ sa vasate tatra kṣiptaḥ saṃsārasāgare /
na caiva jīvitāśāyāṃ nirvedamupagacchati //