Scripture Library

Mahabharata · Chapter 11.27

11.27.1

te samāsādya gaṅgāṃ tu śivāṃ puṇyajalānvitām /
hlādinīṃ ca prasannāṃ ca mahārūpāṃ mahāvanām //

11.27.2

bhūṣaṇānyuttarīyāṇi veṣṭanānyavamucya ca /
kavacāni vicitrāṇi gaṅgāmavajagāhire //

11.27.3

tataḥ pitṝṇāṃ bhrātṝṇāṃ pautrāṇāṃ svajanasya ca /
putrāṇāmāryakāṇāṃ ca patīnāṃ ca kurustriyaḥ //

11.27.4

udakaṃ cakrire sarvā rudantyo bhṛśaduḥkhitāḥ /
suhṛdāṃ cāpi dharmajñāḥ pracakruḥ salilakriyām //

11.27.5

udake kriyamāṇe tu vīrāṇāṃ virapatnibhiḥ /
sūpatīrthā'bhavadgaṅgā bhūyo viprasasāra ca //

11.27.6

tanmahodadhisaṅkāśaṃ nirānandamanutsavam /
vīrapatnībhirākīrṇaṃ gaṅgātīramaśobhata //

11.27.7

tataḥ kuntī mahārāja rudantī śokakarśitā /
vrīḍayā mandayā vācā putrānvacanamabravīt //

11.27.8

yaḥ sa vīro maheṣvāso rathayūthapayūthapaḥ /
arjunena hataḥ saṅkhye vīralakṣaṇalakṣitaḥ //

11.27.9

yaṃ sūtaputraṃ manyadhvaṃ rādheyamiti pāṇḍavāḥ /
yo vyarājaccamūmadhye divākara iva prabhuḥ //

11.27.10

pratyayudhyata vaḥ sarvānpurā yaḥ sapadānugān /
duryodhanabalaṃ sarvaṃ yaḥ prakarṣanvyarocata //

11.27.11

yasya nāsti samo vīrye pṛthivyāmapi kaścana /
yo vṛṇīta yaśaḥ śūraḥ prāṇairapi sadā bhuvi //

11.27.12

karṇasya satyasandhasya saṅgrāmeṣvapalāyinaḥ /
kurudhvamudakaṃ tasya bhrāturakliṣṭakarmaṇaḥ //

11.27.13

sa hi vaḥ pūrvajo bhrātā bhāskarānmayyajāyata /
kuṇḍalī kavacī śūro divākarasamaprabhaḥ //

11.27.14

śrutvā tu pāṇḍavāḥ sarve māturvacanamapriyam /
karṇamevānuśocanto bhūyaścātyāturā bhavan //

11.27.15

tataḥ sa puruṣavyāghraḥ runtīputro yudhiṣṭhiraḥ /
uvāca mātaraṃ vīro niḥśvasanniva pannagaḥ //

11.27.16

yaḥ śarormirdhvajāvarto mahābhujamahāgrahaḥ /
talaśabdapraṇudito mahārathamahāgrahaḥ //

11.27.17

yasyeṣupātamāsādya ko'nyastiṣṭheddhanañjayāt / kathaṃ putro bhavatyāḥ sa devagarbhaḥ purā'bhavat /
kuṇḍalī kavacī śūro divākarasamaprabhaḥ //

11.27.18

yasya bāhupratāpena tāpitāḥ sarvato vayam /
tamagnimiva vastreṇa kathaṃ chāditavatyasi //

11.27.19

yasya bāhuprabhāvena vairamasmāsvarocayat /
suyodhanastu taṃ jyeṣṭhaṃ kathaṃ noditavatyasi //

11.27.20

tathā karṇaṃ maheṣvāsaṃ dhārtarāṣṭrairupāsitam /
upāsitaṃ yathā'smābhirbalaṃ gāṇḍīvadhanvanaḥ //

11.27.21

bhūmipānāṃ ca sarveṣāṃ balaṃ balavatāṃ varaḥ /
nānyaḥ kuntīsutātkarṇādagṛhṇādrathino rathī //

11.27.22

sa naḥ prathamajo bhrātā sarvaśastrabhṛtāṃ varaḥ /
asūta taṃ bhavatyagre kathamadbhutavikramam //

11.27.23

aho bhavatyā mantrasya gūhanena vayaṃ hatāḥ /
nidhanena hi karṇasya pīḍitāstu sabāndhavāḥ //

11.27.24

abhimanyorvināśena draupadeyavadhena ca /
pāñcālānāṃ vināśena, kurūṇāṃ ghātanādapi //

11.27.25

tataḥ śataguṇaṃ duḥkhamidamāpatitaṃ mahat /
karṇamevānuśocāpi dahyāmyagnāvivāhitaḥ //

11.27.26

neha sma kiñcidaprāpya bhavedapi divi sthitam /
na cedaṃ vaiśasaṃ ghorakaṃ kauravāntakaraṃ bhavet //

11.27.27

evaṃ vilapya bahulaṃ dharmarājo yudhiṣṭhiraḥ /
vyarudacchanakaiḥ rājaṃścakārāsyodakaṃ prabhuḥ //

11.27.28

tato vineduḥ sahasā striyastāḥ khalu sarvaśaḥ /
abhito yāḥ sthitāstatra tasminnudakakarmaṇi //

11.27.29

tata ānāyayāmāsa karṇasya saparicchadāḥ /
striyaḥ kurupatirdhīmānbhrātuḥ premṇā yudhiṣṭhiraḥ //

11.27.30

sa tābhiḥ saha dharmātmā pretakṛtyamanantaram /
sarvaṃ cakāra karṇasya vidhivadbhūridakṣiṇam //

11.27.31

sa rājā dhṛtarāṣṭraśca kṛtvā jalamatandritaḥ / samuttatāra gaṅgāyā bhāryayā saha bhārata //

11.27.32

[pāpenāsau mayā śreṣṭho bhrātā jñātirnipātitaḥ /
ato manasi yadguhyaṃ strīṇāṃ tanna bhaviṣyati //

11.27.33

ityuktvā sa tu gaṅgāyā uttatārākulendriyaḥ / bhrātṛbhiḥ sahitaḥ sarvairgaṅgātīramupeyivān // ] //

11.27.1

ataḥ paraṃśāntiparva bhaviṣyati tasyāyamādyaḥ ślokaḥ /
vaiśampāyana uvāca /
kṛtvodakaṃ te suhṛdāṃ sarveṣāṃ pāṇḍunandanāḥ /
vidure dhṛtarāṣṭraśca sarvāśca bharatastriyaḥ //

Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0